JUDE 1 - Ebrié New Testament 1996

Jude ébhi néphan

¹ Mɛn nɔn mɛn ni Jude, mɛn ni Jezwi-Krisi nɛnkhwɛ́nwo, ló mɛn ni Jakhi hɔnsɛ́n. Mɛn tɛ́ áhrɔ́ lókɔn sé néphan Yankan che bha mɛ́n phɔ, néphan abha lo The Yankan pɔ́ hrómɛn, khɛ́n ali néphan abha Jezwi-Krisi mɔ́n mɛn:

² Ló tɛmɛ Yankan osé hɔ́n ábhwe yɔ́phɔ́, ńthɛ́nkhwálé, le ápɔ́ othúbhɔ.

Yíliemán kpakprámán

³ Mɛn jɔn bhwá, mɛn tɛ́ khékhremɛn tɛ́ áhrɔ́ lókɔn thu hɔ́n, Yankan swá aswa lo khúnbrɛn hɛ́nthé. Áyɔn salé mɛn tɛ́ áhrɔ́ lókɔn thu hɔ́n, mɛn khɔnmán hɔ́n phɔ, ló ɔ́n tɛ́ khékhremɛn kútha sé mímíbhú. Ló mímíbhú lókɔn, lónɔn Yankan bho se néphan khúnbrɛn khɛ́n ali mɛ́n néphan.

⁴ Ló mímí nbrɛn, néphan fe khɛ́n ali abhúrɛmán, wo hrɔman waka lo hromɛn, ló ábhwetɔ́ lókɔn khɛ́n ali Yankan phɔlíman ase lo, wo ehɔ́n jrɛn, ló thénthé wo gbakhre yítɛ́ nɔn wo ebhó thándi, ló wo énɛn wo hɔ́n Jezwi-Krisi fɔ́nká bu. Jezwi-Krisi lókɔn khɛ́n ali lo Yíliéwo le lo Hwánthe míbrɛ aphu. Ló néphan lókɔn, wo kwabhɔ́ khɛ́n atre ébo wo, Yankan hrɔ́ phrɛ tɔ lóbhwe ámɔn.

⁵ Ábhwe lókɔn ɔ́n phrɛ ye, lókhɛ́n mɛɛ́n nɛn salé lósi lo Hwánthe khɔ swa Izraɛ khúbhɛ́nɛ́n chan Ejiphithi khúbhɛ́ thándi ɔn, mɛn tɛ́ lóbhwe odi hɔ́n mwanhɛ́n. Lómánji, lósi ńkhɔ wɛn néphan khɛ́n ale dɛn bhu mímí, mɛn tɛ́ lóbhwe lɔ odi hɔ́n mwanhɛ́n.

⁶ Ló néphan khɛ́n ńkhwɛn tre ánbo Ácí khó, ali ákwabhɔ́ cí, wo nɔn wo li Yankan-mranchɛ́mán khɛ́n ale tɛ yí priman, khɛ́n ayɔ wo chrési kalé: wo bha dubhlékhu hromɛn, ló Yankan gɛ wo mɛ́ tre ábha sé godo.

⁷ Sodɔmɛn, Gomɔ le ákhúbhɛ́ khúnbrɛn khɛ́n agbali lóne, tɛmɛ wo bhwe odi hɔ́n mwanhɛ́n, wo néphan khúnbrɛn lókɔn, wo tɛ yí sa Yankan-mranchɛ́mán lókɔn yí atɛ. Wo waka ágbakhrelí hrómɛn, wo waka áthéji mɛnɔ́n hrómɛn, ló ńsɛ gɛ wo jɔn nsɛ ɔ́nmɔn elí gbakhre: wo yí Yankan tɛ dri wo phɔ, lónɔn ali átɛn atre ethɔ́n ákakhúnbrɛn, ló wo bha lóhrómɛn. Áyí lókɔn Yankan tɛ se wo wu, lónɔn ali áyíbɛn Yankan etɛ́ lie lephan khúnbrɛn.

⁸ Lótɛ khɛ́n néphan lókɔn bháne etɛ́ lóyí yábhɛ brɛ: áyí khɛ́n wo mɛbhí ewú, echɛ́ wo tɛ́ ne sé wo bɛn nbrɛn phɔ nánmí, wo gɛ Yankan ɔ́nmɔn wo éswan, ló wo etá átho néphan abha nguhá hrómɛn.

⁹ Ló Yankan-mranchɛ́wo bhrɔ́khó óche Michɛ, mɛ́n bɛn nbrɛn lɔ ńnɛn tɛ áyí yábhɛ lókɔn. Lóka mɛ́n le logbo ɔ́nmɔn wo épɛgbo, wo étalí bhwe, lókhɛ́n wo énɛn lephan ábha hɔ́n Moyízi nkwá, lóka lókɔn Michɛ le tɔ ábhwe phromɛn bɛn se logbo. Lókhɛ́n mɛ́n bhwe ńkránman logbo nɔn ali salé: “Tɛmɛ lo Hwánthe otɛ́ yí dri hɛ phɔ!”

¹⁰ Lókhɛ́n néphan lókɔn, wo ábhwe wo le yé lóthé, lótho nɔn wo ya tɔ bhwe phromɛn phromɛn, ló wo bhweyɛ́n bhri lókɔn wo pɛ sa ńnán abha bithe bhweyɛ́n, lónɔn élɔ wo.

¹¹ Muswe ogɛ wo! Átɛsalé wo sakhɔ Kaɛn sitó, ló jɛtɛn hɛ́nthé, wo khrɛ phɔ sa Balamɛn si akhɔ khrɛ phɔ. Wo khu, átɛsalé wo gɛ Yankan ɔ́nmɔn swan sa Kore yí atɛ.

¹² Lóka néphan elí nɛn fɛ́thi gɔn khɛ́n wo bha lómɛ́n, wo yí wo tɛ́ ágo phɔ, lókhɛ́n ále tɛ́ wo hɛ́ndɛ, ló wo bɛn nbrɛn nɔn wo há wo bɛn nbrɛn mwanhɛ́n. Wo tɛsa mɔngú mɔngú khɛ́n áphɛ́phrɛ éthu, lókhɛ́n ále gɛ chɛ́ átho ndu khwálé. Wo tɛsa ńyá khɛ́n kasé lópá di lɔ, wo le sómí. Wo tɛsa áyá afi halé lókhɛ́n akhu.

¹³ Wo tɛsa gwe elé phran, ló wo yítɛ́ tɛsa gwe prígbɔ ali hɛ́ndɛ yí. Wo tɛsa pɛmwe khɛ́n eliábu. Ló ási khɛ́n Yankan bho tre wo lé ákakhúnbrɛn, lónɔn ali dubhlékhu jwan khóo hrómɛn.

¹⁴ Enɔ́khi ali Ádan njibhi asi ńdɔn khwache, wo hóthóbhɛ́ hrómɛn ɔn, mɛ́n nɔn lócí ńphrɛ tɔ wo phɔ bhwe lóka ántɔlé: “Tɛmɛ ɔ́ndi njɛlé: lo Hwánthe le mɛ́n Yankan-mranchɛ́mán créncré akpɛn akpɛn ɔ́nmɔn bha bhá,

¹⁵ wo bhá bhɔ́ néphan khúnbrɛn kwa, ló wo bhá tɛ́ yí dri bhúrɛmán phɔ, wo yíléle khúnbrɛn wo tɛ hɛ́nthé, lóka wo gɛ Yankan ɔ́nmɔn wo éswan, ló wo bhwe phromɛn phromɛn khúnbrɛn lókɔn wo tɔ se Yankan khɛ́n alepɛ ájí lóhrómɛn.”

¹⁶ Néphan lókɔn, ákakhúnbrɛn wo thɛ́n le nɔ́n, ló wo bha ábhwe táli hromɛn, ló wo thɛ́n yí apɔ, lónɔn wo etɛ́; wó tɔ bhwe fúmɛ́n, ló wo bhó jɛtɛn khrɛ néphan.

Jude éha krethiɛnmán

¹⁷ Lókhɛ́n hɔ́n, mɛn jɔn bhwá, ábhwe khɛ́n lócí lo Hwánthe Jezwi-Krisi-mranchɛ́mán phrɛ tɔ se hɔ́n ye, tɛmɛ lóbhwe odi hɔ́n mwanhɛ́n.

¹⁸ Mímí nbrɛn, wo kranman hɔ́n lée: “Ácí khɛ́n ábha phúji, ábha pɛ néphan ábha ha hɔ́n lia, ló wo bhá tɛ́ wo thɛ́n yí apɔ.”

¹⁹ Wo néphan lókɔn, wo nɔn wo ébhuri krethiɛnmán, wo nbrɛn nánmí nɔn apɛ wo, áleli Yankan Nánnánmi.

²⁰ Lókhɛ́n mɛn jɔn, tɛmɛ ɔ́n ní júmán ló hɛ́nmɛn, ló hɔ́n mímíbhú lókɔn áli áyíbɛn atɛ créncré. Tɛmɛ ɔ́n na Yankan Nánnánmi Créncré sɛ́npɛ́ hrómɛn,

²¹ ló tɛmɛ ɔ́n má Yankan pɔ́ hrómɛn, kábrɛ kábrɛ odi lóka lo Hwánthe Jezwi-Krisi mɛ́n thɛ́nbhwá hrómɛn, ansé hɔ́n mɛpɔ́bhá álephú.

²² Néphan ale gɛlé ya mímíbhú hrómɛn, tɛmɛ ɔ́n wú wo nfɛkhu:

²³ tɛmɛ ɔ́n nó átɛn hromɛn khwɛ́n wo yɛn, ló ɔ́n do wo ká. Tɛmɛ ɔ́n wú néphan nankhɛ khúnbrɛn nfɛkhu, ló ńfɛkhuwú lókɔn osakhɔ́ ákhúsó hrómɛn, lókhɛ́n wo yí nánkhɛ lókɔn ali wo dɛgɔn abha wo phɔ, lókhɛ́n wo ne tɛ bhie, tɛmɛ ɔ́n chán lóphɔ féne.

Jude krethiɛnmán élri hwa aphuji

²⁴ Lephan khɛ́n abha le dɛn hɔ́n hálé ńne hrómɛn, lephan khɛ́n ábha chɛ́ hɔ́n ya Yankan hɛ́nmɛn, hɔ́n phɔ chan hromɛn, lephan khɛ́n ábha chɛ́ hɔ́n thándi ya áphɔhá hrómɛn, lephan khɛ́n ábha chɛ́ hɔ́n thándi Yankan nguhá hrómɛn,

²⁵ Yankan logro brɛ lókɔn khɛ́n ali lo Dókáwo akhɔ lo Hwánthe Jezwi-Krisi phɔ do lo ka, tɛmɛ angɛ: nguhá, ńkhólí, ńsɛ́npɛ́ ájí ácí abha hɛn hromɛn, thénthé le ákakhúnbrɛn! Amɛn.