JAKHI 1 - Ebrié New Testament 1996

Jakhi ébhi néphan

¹ Mɛn hɛ́n li Jakhi, mɛn nɔn mɛn tɛ áhrɔ́ lókɔn, mɛn ni Yankan nɛnkhwɛ́nwo, saji mɛn ni lo Hwánthe Jezwi-Krisi nɛnkhwɛ́nwo. Mɛɛ́n mi Yankan-gbemán achranmanlé pi áthéji khúnbrɛn.

Mímíbhú le ábhweyɛ́n

² Mɛn hɔnsɛ́nhɔn, tɛmɛ áphɔ ohá hɔ́n, lóka ágbrelí yábhɛ yábhɛ khúnbrɛn bha gɛ hɔ́n.

³ Hɔ́n nbrɛn lɔ ɔ́n yɛn salé kasé ɔ́n gɛ ásúwú hɔ́n mímíbhú hrómɛn, lónɔn ábha chɛ́ hɔ́n nɔ́nthɛ́n gɛlé ya.

⁴ Tɛmɛ ɔ́n mú mímí salé hɔ́n thɛ́nnɔ́n lókɔn bha yalí hɔ́n di lómɛ́n, abha le pɛ áyíbɛn ábha khrɛ hɔ́n lóhrómɛn, lónɔn ábha chɛ́ hɔ́n ní néphan bɛn wo phɔ chan, néphan bɛn wo yítɛ́ khúnbrɛn simɛ́n, khɛ́n álepɛ yí emián wo.

⁵ Ló kasé hɔ́n hrómɛn ábhweyɛ́n emián lephan bɛn, tɛmɛ anna Yankan, ló Yankan bha se ábhweyɛ́n, átɛsalé áphɔlíman hromɛn, Yankan bhó mɛ́n yí sé néphan khúnbrɛn wɛ́-nwɛ́.

⁶ Lókhɛ́n lóka hɔ́n esá yíbɛn Yankan yé, tɛmɛ ɔ́n mú mímí, ló hɔ́n thɛ́n ole sókhú. Átɛsalé lephan mɛ́n thɛ́n esókhú, lephan lókɔn ńtɛsa gwe phran khɛ́n áphɛ́phrɛ ehɔ́n jika ló hɛ́nmɛn, khɛ́n ehɔ́n jika bhá mánji.

⁷ Ló lephan yábhɛ lókɔn annɛn mú salé ánman gɛ yíbɛn lo Hwánthe yé,

⁸ átɛsalé ńni lephan bɛn mɛ́n bhwetɔ́ le ya sibrɛ, ló mɛ́n yítɛ́ hrómɛn, ánnɛn yɛ́n mɛ́n si ńya.

Gbrewo le bhringbi

⁹ Tɛmɛ lo hɔnsɛ́n gbrewo olí phɔhá, lóka Yankan bha hɔ́n-ɛn chánfe tho,

¹⁰ saji lo hɔnsɛ́n ali bhringbi, mɛ́n lɔ tɛmɛ anní phɔhá, lóka Yankan bha hɔ́n-ɛn bháthé. Átɛsalé bhringbi bhwe bha phú gbraa sa ńbi nánnan abha bithe.

¹¹ Ńyóka di kránmɛn, lótɛn hɔ́n áyá wɛ́, ló ńbi nánnan khúnbrɛn abha lóphɔ áfɔ́khwá, ńbi nánnan lókɔn khɛ́n élimán néphan, lóyámɛ́n áliá.

Ágbrelí le ásúwú

¹² Áphɔhá gɛ lephan khɛ́n ábha gɛlé ya ágbrelí hrómɛn, átɛsalé lóka ánman chán ágbrelí hrómɛn thándi, mɛ́n pɛnsɔ́n ánman gɛ, lónɔn ali ńmɛpɔ́bhá, ló ńmɛpɔ́bhá lókɔn, néphan apɔ Yankan, lónɔn ali ápɛnsɔ́n Yankan bho tre wo lé.

¹³ Kasé lephan ásúwú gɛ hɛ, ɛlé tɔlé: “Yankan nɔn esú mɛn wú.” Átɛsalé áyíléle le gɛ sú Yankan wú, ló Yankan nbrɛn lɔ le sú lephan wú.

¹⁴ Lókhɛ́n kasé wo étɔlé ásúwú gɛ lephan, lóthé nɔn ali salé lephan lókɔn, mɛ́n bɛn nbrɛn thɛ́n yí apɔ, ali áyíléle, lónɔn etí lo ká ábhwe hromɛn,

¹⁵ lómánji lephan thɛ́n yí apɔ khɛ́n ali áyíléle, lónɔn áchɛ́ ńne bhwe di mwanhɛ́n, ló antɛ́ ne. Ló ńne lókɔn lóka lómɛ́lu gɛlé phu, lónɔn ásranmán ákhú.

¹⁶ Mɛn hɔnsɛ́nhɔn mɛn pɔ, ábhwe lókɔn hromɛn, áleyɔn sa ɔ́n khrɛ phɔ:

¹⁷ áyí khúnbrɛn khɛ́n ali áyí bhwábhwá obhó sé lephan, áyí khúnbrɛn khɛ́n ali ápɔ́ yí, lóyí khúnbrɛn lókɔn áli áyí achan átho, áli áyí achan Yankan yé, ló Yankan lókɔn, mɛ́n nɔn ńni lephan atɛ átho yéfí khúnbrɛn abha lóne, ló ńni lephan bɛn ále jrɛn. Ló mɛ́n si khúnbrɛn ńma, álepɛ dubhlékhu.

¹⁸ Mɛ́n nbrɛn thɛ́npɔ́ hrómɛn nɔn ńkhɔ ábhwetɔ́ ali ábhwe mímí phɔ se lo ńmɛpɔ́bhá, ló ochɛ́sé áyí khúnbrɛn ńtɛ, lóhrómɛn lo thwási.

Tɛmɛ ɔ́ndi njɛlé, ló ɔ́n ní júmán

¹⁹ Mɛn hɔnsɛ́nhɔn mɛn pɔ, tɛmɛ ábhwe lókɔn odi hɔ́n mwanhɛ́n: hɔ́n hrómɛn, kasé elí ábhweyé, tɛmɛ lephan brɛ brɛ khúnbrɛn owá lo yé bhwe gbraa, lókhɛ́n kasé elí ábhwetɔ́, ɔ́n ne fa phɔ tɔ bhwe, ló saji kasé elí ńthɛ́nyan lɔ, ɔ́n ne fa phɔ do thɛ́nyan,

²⁰ átɛsalé kasé lephan édo thɛ́nyan, ánnɛn tɛ́ áyí apriman Yankan hɛ́nmɛn.

²¹ Lóhɛ́nthé tɛmɛ ɔ́n chán áyí krɔ́-nkrɔ khúnbrɛn phɔ féne, ɔ́n chán abhúrɛ yítɛ́ phɔ féne, ló ɔ́n khɔ́ ńfɛkhu mɛn do ábhwetɔ́ Yankan ebhó ká hɔ́n thɛ́n hrómɛn, átɛsalé ábhwetɔ́ lókɔn áli áyíbɛn ábha gɛ swa hɔ́n.

²² Ɔ́n ne khrɛ hɔ́n bɛn nbrɛn lóka hɔ́n eyé Yankan bhwe lópán hɔ́n nkɛé áphu, léliló. Lókhɛ́n énɛn salé ɔ́n tɛ́ lóyí abha lóhrómɛn.

²³ Átɛsalé lephan eyé Yankan bhwe, lókhɛ́n ále tɛ́ lóyí, lephan lókɔn ńtɛsa lephan abho mɛ ewú hɛ́nmɛn, khɛ́n ewú mɛ́n hɛ́nmɛn si yábhɛ akhɔ tɛ.

²⁴ Lóka ńwu mɛ́n hɛ́nmɛn phu, lókhɛ́n ńyɔ mɛ kalé no, lóyámɛ́n mɛ́n hɛ́nmɛn si akhɔ tɛ áliɛli.

²⁵ Lókhɛ́n lephan ewú ábidí apriman, ábidí lókɔn khɛ́n éswa néphan, kasé ńgɛlé ya lótho, lephan lókɔn, áleli salé anyé bhwe pán lókhɛ́n lómánji oliɛli, lókhɛ́n kasé ábhwe lókɔn ńye antɛ́ lóyí, Yankan bha bhɔ-ɛ ndu mɛ́n yítɛ́ hrómɛn.

²⁶ Kasé lephan ɛbhú salé ɛyɛn Yankan lókhɛ́n ɛ́le gɛ há hɛ lɛ́ mwanhɛ́n, lephan lókɔn ɛ́khrɛ hɛ bɛn nbrɛn: ló hɛ Yankan lókɔn ɛyɛn abha le gɛ tɛ́ yíɛkɛ sé hɛ.

²⁷ Yankan ali lo The, mɛ́n yí anmú salé ali Yankan si okhɔ́ yɛ́n, lónɔn ali lókɔn: tɛmɛ ɔ́n há npɛ́tɛ mwanhɛ́n, ló grwanyá khɛ́n áyí ekhú wo phɔ, tɛmɛ ɔ́n há wo mwanhɛ́n, ló ɔ́n ne dɛn áthéji yí krɔ́-nkrɔ khɛ́n élɔ néphan ogalí hɔ́n.