EBRENƐ́N 1 - Ebrié New Testament 1996

Yankan khɔ mɛ́n Bhi phɔ tɔ bhwe se lo ye

¹ Godo cí, bhwetɔ́trémán phɔ nɔn Yankan khɔ tɔ bhwe se lo jisɛmánhɔn, ńtɔ bhwe áka dɔndɔn hromɛn, saji ńkhɔ kɔ́nda dɔndɔn mɛn tɔ bhwe,

² lókhɛ́n thénthé ácí aphuji, Yankan khɔ mɛ́n Bhi phɔ tɔ bhwe se lo ye. Ló Yankan Mi lókɔn, mɛ́n phɔ nɔn Yankan khɔ tɛ áyí khúnbrɛn, mɛ́n nɔn ńni lephan Yankan san, ló Yankan bho áyí khúnbrɛn ha mɛ́n mɔ́n mɛn.

³ Yankan nguhá efí ká mɛ́n phɔ, ló mɛ́n nɔn ńni lephan akhɔ Yankan dianthé, ló mɛ́n bhwetɔ́ lókɔn apɛ sɛ́npɛ́, lónɔn ahɔn áyí khúnbrɛn pɛ. Lóka ńyɔ áthéjinɛ́n khúnbrɛn ne phɔ wo, ńno chre átho Yankan liémɔn si, ló Yankan lókɔn, mɛ́n nɔn ńni lephan mɛ́n sɛ́npɛ́ banbrɛn áyí khúnbrɛn.

Yankan Mi banbrɛn Yankan-mranchɛ́mán

⁴ Yankan Mi banbrɛn Yankan-mranchɛ́mán khúnbrɛn, lóhɛ́nthé Yankan se ńhɛ́n bɛn abanbrɛn Yankan-mranchɛ́mán khúnbrɛn hɛ́n ali.

⁵ Átɛsalé álepɛ Yankan-mranchɛ́wo bɛn khɛ́n Yankan kranman lée: “Hɛ nɔn ɛli mɛn Bhi, ló achan ncɛ́n élo, mɛn nɔn mɛn ni hɛ The.” Saji álepɛ Yankan-mranchɛ́wo brɛ khɛ́n Yankan kranman lée: “Mɛn mán ní hɛ The ló ɛ́bha lí mɛn Bhi.”

⁶ Lóka khɛ́n Yankan ebhá chɛ́ mɛ́n Bhi sithwáwo bhá áthéji, mɛ́n nkɛé: “Áyɔn sa Yankan-mranchɛ́mán khúnbrɛn obhɔ́ ntráhɛ́nlé la lephan lókɔn.”

⁷ Lókhɛ́n ábhwe Yankan tɔ mɛ́n mranchɛ́mán phɔ nɔn ali sa: “Yankan tɛ mɛ́n mranchɛ́mán tɛsa áphɛ́phrɛ elé, ló mɛ́n nɛnkhwɛ́nmán tɛsa átɛn ethɔ́n kránmɛn.”

⁸ Lókhɛ́n ábhwe Yankan tɔ se mɛ́n Bhi, lónɔn ali sa: “Ɛli Yankan, ló hɛ bhringbi khúbhɛ́ bha tré lóne godo. Ló áyíbhwátɛ́ hrómɛn nɔn ɛ́bha khɔ́ pɛ aféchwe khúnbrɛn.

⁹ Ɛpɔ áyíbhwá, ló ɛle pɔ áyíléle, lóhɛ́nthé Yankan, mɛn khɛ́n mɛn ni hɛ Yankan, hɛ nɔn mɛn san hɛ, hɛ gbemán hrómɛn ló mɛn ha hɛ fɛ́thi nɔ́n hɛ́n.”

¹⁰ Ló ńcu ántɔlé: “Hwánthe, hɛ nɔn ásithwá ɛtɛ áthéji ló átho lɔ li hɛ mɔ́n yí atɛ.

¹¹ Ló áyí khúnbrɛn lókɔn ɛtɛ, áli áyíbɛn ábha hɛ́n, lókhɛ́n hɛ, ɛ́bha bháne godo. Áthé le átho ɔ́nmɔn, cíbɛn wo bhá thwɛ phɛ́nphɛ́n, sa ádɛgɔn bwɛn;

¹² ɛ́bha khwɛ́n wo gbɛ yɛn, sa lósi okhɔ́ gbɛ khókhóthu bwɛn, ló wo bhá sɛ́ sa ádɛgɔn si ákhɔ́ sɛ́. Lókhɛ́n hɛ, ɛ́bha tré lóne ákakhúnbrɛn ló hɛ mɛpɔ́bhá bha tré lóne godo.”

¹³ Yankan-mranchɛ́mán hrómɛn, álepɛ brɛ khɛ́n Yankan kranman lée: “Hɛ lókɔn, tɛmɛ ɛbha chré mɛn liémɔn si, kábrɛ kábrɛ odi lóka, mɛn khwɛ́n hɛ nta tré hɛ mɛsamán khúnbrɛn tho, sa áyákhru bɛn hɛ nta tre lótho.”

¹⁴ Yán bánnɛ́n li Yankan-mranchɛ́mán ɛ? Wo nɔn wo li nánnánmi khúnbrɛn khɛ́n elí júmán sé Yankan, ló wo nɔn Yankan chɛ wo bha wo elí júmán sé néphan ánmán swa.