GALÁTHI KHÚBHƐ́NƐ́N 1 - Ebrié New Testament 1996

Phɔ́lu ébhi néphan

¹ Mɛn Phɔ́lu khɛ́n mɛn ni Krisi-mranchɛ́wo ɔn, mɛn nɔn mɛn tɛ áhrɔ́ lókɔn. Mɛn Krisi-mranchɛ́wo lókɔn mɛn ni, léli néphan nɔn achɛ mɛn ni, saji léli lephan bɛn phɔ nɔn okhɔ chɛ mɛn ni. Néphan achɛ mɛn ni nɔn ali Jezwi-Krisi le Nthe khɛ́n achɛ ńchan khúnɔn mɛn fe.

² Mɛn le hɔnsɛ́nhɔn khúnbrɛn khɛ́n abha krɛn nɔn obhɔha ló otɛ́ áhrɔ́ lókɔn sé Yankan-gbemán abha Galáthi gotho, ló lo ékranmán wo salé:

³ Tɛmɛ lo The Yankan le lo Hwánthe Jezwi-Krisi ɔ́nmɔn osé hɔ́n áphɔlíman le ńthɛ́nkhwálé.

⁴ Krisi hɔn mɛ́n nbrɛn khu se lo sa answa lo yɛn lo ne hrómɛn, ochɛ́sé answa lo yɛn ncɛ́n théji phromɛn lókɔn hromɛn, sa lo The Yankan si akhɔ pɔ.

⁵ Tɛmɛ ńguhá ogɛ Yankan ákakhúnbrɛn! Amɛn.

Ábhwe Bhwábhwá brɛ ali mímí

⁶ Ló ábhwe khɛ́n etán mɛn hɛ́nmɛn nɔn ali salé, lephan khɛ́n akhɔ Krisi phɔlíman hromɛn che hɔ́n, ále mɔn lɔ khɛ́n ɔ́n yɔ-ɛ kalé, ló hɔ́n égɛ Ábhwe Bhwábhwá nánkhɛ-ɛ thá.

⁷ Álepɛ Ábhwe Bhwábhwá nánkhɛ bɛn abháne npɔ a. Néphan khɛ́n abháne ékhrɛ hɔ́n, wo hɛ́nthé nɔn mɛɛ́n tɔ bhwe yábhɛ lókɔn. Átɛsalé, wo énɛn wo hɔ́n Krisi Bhwe Bhwábhwá lókɔn jrɛn.

⁸ Áyɔn! lókhɛ́n kasé lephan bɛn – kasé áli lo bɛn nbrɛn lɔ, kasé áli Yankan-mranchɛ́wo bɛn chantho bha – étɔ Ábhwe Bhwábhwá nánkhɛ bɛn, khɛ́n ále khɔ́ ló a, lo tɔ lóbhwe se hɔ́n, mɛ́n lephan lókɔn, áyɔn sa muswe ogɛ!

⁹ Mɛn phrɛ tɔ lóbhwe se hɔ́n, ló thénthé mɛn cu mɛɛ́n tɔ npɔ sa: kasé lephan étɔ Ábhwe Bhwábhwá bɛn sé hɔ́n, khɛ́n ále khɔ́ ló ɔ́n phrɛ ye ɔn, mɛ́n lephan lókɔn áyɔn sa muswe ogɛ!

¹⁰ Mɛn bhwe mɛɛ́n tɔ, wú lóthé nɔn ali salé mɛɛ́n nɛn mɛn chɛ́ néphan odo mɛn? Chɛchɛ, mɛɛ́n nɛn sa Yankan nɔn odo mɛn. Wú mɛɛ́n nɛn sa mɛn bhwe okhwá néphan hɛ́nmɛnlé? Kasé mɛɛ́n nɛn salé mɛn bhwe okhwá néphan hɛ́nmɛnlé, ka mɛn man nɛ́n khwɛn Krisi hɛ́nmɛn nɛn.

Phɔ́lu si akhɔ li Krisi-mranchɛ́wo

¹¹ Hɔnsɛ́nhɔn, mɛɛ́n kranmán hɔ́n gbée salé: Ábhwe Bhwábhwá khɛ́n mɛɛ́n tɔ sé hɔ́n, ále chan lephanmi yé.

¹² Léli lephan bɛn nɔn abho ábhwe lókɔn ha mɛn mɔ́n mɛn, saji álepɛ lephan alie mɛn lóbhwe, lókhɛ́n Jezwi-Krisi nɔn aphwan lóbhwe lókɔn se mɛn ye.

¹³ Mímí nbrɛn, mɛn si lócí mɛn khɔ nɛnsi Jwifunɛ́n yankanla yítɛ́ hrómɛn ɔn, ɔ́n yɛn. Ɔ́n yɛn lósi mɛn khɔ ńthɛ́nyan mɛn nri Yankan-gbemán gbre. Mɛn pɔ sa mɛn tɛ́ wo mɔ́.

¹⁴ Mɛn jɔn Jwifunɛ́n khɛ́n mɛn le wo ɔ́nmɔn oli bhɛ́ brɛ bha Jwifunɛ́n yankanla yítɛ́ hrómɛn ɔn, mɛn banbrɛn fe, saji mɛn ya lo jisɛmánhɔn bidí yítɛ́ tho lɔ kpɛ́ɛ́n.

¹⁵ Lóka wo ka ho mɛn-áan, Yankan san mɛn tre, mɛ́n phɔlíman hromɛn, ló ńche mɛn sa mɛn man khwɛn mɛ́n hɛ́nmɛn nɛn.

¹⁶ Lóka ńmo mɛ́n Bhi nie mɛn sa mɛn tɔ Ábhwe Bhwábhwá ali nkɛ phɔ bhwe sé néphan aleli Jwifunɛ́n, mɛn nɛn mi lephan bɛn bhwe ye.

¹⁷ Néphan aphrɛ li Krisi-mranchɛ́mán khɛ́n ase mɛn ɔn, wo lɔ mɛn nɛn no Jeruzalɛ́mɛn nɔn wu wo. Lókhɛ́n lóyámɛ́n tɛɛ mɛn yalisi no Arabi gotho, lómánji khɛ́n mɛn saji ma Damási khúbhɛ́.

¹⁸ Ámɔn ɔɔ, áli npá bhwaliá nbrɛn-áan, khɛ́n mɛn no Piɛ yé Jeruzalɛ́mɛn khúbhɛ́, sa mɛn yɛ́n nkɛ. Mɛn gɛ ɔ́nmɔn chre lóne áli ácído mɔn.

¹⁹ Mɛn nɛn wu Krisi-mranchɛ́wo nankhɛ, kasé áleli Jakhi brɛ ali lo Hwánthe mɛ́n hɔnsɛ́n.

²⁰ Ábhwe lókɔn khɛ́n mɛn tɛ lóhrɔ́ mɛɛ́n thu hɔ́n, áli ábhwe mímí, ló mɛɛ́n tɔ Yankan hɛ́nmɛn salé mɛn nɛn nitan.

²¹ Lómánji, mɛn no Siri le Silisi ɔ́nmɔn gotho.

²² Lóka khúnbrɛn lókɔn, Yankan-gbemán ali krethiɛn khɛ́n abha Jude gotho ɔn, wo le yɛn mɛn mɛbhí mɛn.

²³ Lókhɛ́n ábhwe wo eyé mɛn phɔ nɔn ali sa: “Lephan khɛ́n lócí élri lo gbre ɔn, thénthé mɛɛ́n nbrɛn lɔ ántɔ mímíbhú bhwe khɛ́n lócí mɛ́n nkɛé mɛ́n tɛ́ olɔ.”

²⁴ Ló mɛn hɛ́nthé, wo élri Yankan hwa.