2 KHORƐ́NTHI KHÚBHƐ́NƐ́N 1 - Ebrié New Testament 1996

Phɔ́lu ébhi néphan

¹ Mɛn Phɔ́lu nɔn mɛn tɛ áhrɔ́ lókɔn, mɛn le lo hɔnsɛ́n Thimote ɔ́nmɔn. Mɛn ni lephan bɛn Yankan nbrɛn san mɛ́n thɛ́npɔ́ hrómɛn salé mɛn ní Jezwi-Krisi-mranchɛ́wo. Mɛn tɛ́ áhrɔ́ lókɔn thu Yankan-gbemán abha Khorɛ́nthi khúbhɛ́ le krethiɛnmán nánkhɛ khúnbrɛn abha Akayi gotho.

² Tɛmɛ lo The Yankan le lo Hwánthe Jezwi-Krisi ɔ́nmɔn osé hɔ́n áphɔlíman le ńthɛ́nkhwálé.

Phɔ́lu elá Yankan nansi

³ Yankan ali lo Hwánthe Jezwi-Krisi mɛ́n The, tɛmɛ áhwalri ogɛ hɛ. Hɛ nɔn ɛli Nthe apɛ ńfɛkhuwú, hɛ nɔn ɛli Yankan asé néphan thɛ́nkhwálé.

⁴ Hɛ nɔn ɛdɔnmán lo mɔ́n lo yíkhúphɔ khúnbrɛn hrómɛn, ochɛ́sé ńmɔ́ndɔ́nman lókɔn ɛse lo, lo lɔ lo bhó sé néphan khɛ́n abha áyíkhúphɔ dɔndɔn hromɛn.

⁵ Lósi yábhɛ brɛ khɛ́n Krisi hɛ́nthé lo gɛ áyíkhúphɔ búdúbúdú, lóyábhɛ brɛ Krisi hɛ́n hrómɛn, lo bhá gɛ mɔ́ndɔ́nman búdúbúdú.

⁶ Kasé áyí ekhú lo phɔ, lónɔn ali ńthɛ́nkhwálé se hɔ́n, ló ochɛ́sé Yankan okhɔ́ lóphɔ swa hɔ́n. Ló kasé lo gɛ thɛ́nkhwálé, hɔ́n lɔ ɔ́n ma gɛ thɛ́nkhwálé, ló ńthɛ́nkhwálé lókɔn nɔn ábha sé hɔ́n sɛ́npɛ́ ɔ́n ma khɔnmán phɔ ńthɛ́nnɔ́n hrómɛn, ló áyíkhúphɔ lókɔn lo gɛ, hɔ́n lɔ ɔ́n ma sakhɔ́ lóhrómɛn thándi.

⁷ Lo bho lo mwasrui khúnbrɛn tre hɔ́n tho; lo yɛn salé lósi yábhɛ brɛ khɛ́n lo yí lókɔn ekhú lo phɔ, hɔ́n lɔ ɔ́n ma lóhrómɛn, lóyábhɛ brɛ lo thɛ́nkhwálé lo gɛ, hɔ́n lɔ ɔ́n ma lóhrómɛn.

⁸ Lo hɔnsɛ́nhɔn, áyíkhúphɔ lókɔn lo gɛ Azi gotho: áyɔn salé lo tɔ lóphɔ bhwe sé hɔ́n yé: ńnɔnkwá lókɔn wo hɔn the lo lóne, áli ńnɔnkwá khóo bɛn ésrɛn lo, ló lo le bhu salé lo bhá cu bhá mɛpɔ́.

⁹ Lóka lókɔn, lo hɛ́nmɛn etɛ́ salé wo bhɔ lo wɛ́n kwa phu. Lókhɛ́n áyí khúnbrɛn lókɔn atɛ, áli áyíbɛn echɛ́ lo yɛ́n salé áleyɔn sa lo bhó lo mwasrui tré lo bɛn nbrɛn tho, lókhɛ́n áyɔn salé lo bhó lo mwasrui tré Yankan míbrɛ tho, mɛ́n nɔn anchɛ́ mɔngumán chán khúnɔn mɛn fe.

¹⁰ Yankan lókɔn mɛ́n nɔn ńswa lo yɛn ákhú yábhɛ lókɔn hromɛn, ló mɛ́n nɔn ánman cu swa lo yɛn áyí yábhɛ lókɔn hromɛn. Lo bho lo mwasrui khúnbrɛn tre mɛ́n tho salé ánman cu swa lo npɔ.

¹¹ Hɔ́n lɔ áyɔn salé ɔ́n na Yankan sé lo, lónɔn ábha chɛ́sé lóka Yankan bha yé néphan búdúbúdú Yankan éla sé lo, ánman mɔ́ lo ndu, ló mɛ́n mwá ńtɛ lo hɛ́nthé, néphan búdúbúdú bha lɛ nansi.

Phɔ́lu jrɛn mɛ́n bhwetɔ́

¹² Thénthé, lo bhwe lo ya lótho lo efúmɛ́n lónɔn ali sa: lo thɛ́n ékranmán lo lée, lo si lo khɔ lo énɛnsi áthéji krɛn, saji lo le hɔ́n ɔ́nmɔn thethé, lósi lo khɔ gɛ hɔ́n ɔ́nmɔn nɛ́nsi, áchan Yankan yé, ásakhɔ ńthɛ́nbhwá le ńfɛkhu ɔ́nmɔn yítɛ́ hrómɛn. Lóyí khúnbrɛn lókɔn, áchan Yankan phɔlíman hromɛn, lée ále chan lephanmi bhweyɛ́n hrómɛn.

¹³ Lo hrɔ́ khúnbrɛn lo tɛ thu hɔ́n, ábhwe khɛ́n ɔ́n ma kán lókhɛ́n ɔ́n ma gɛ yé lóthé, lónɔn lo lrɛ thu hɔ́n. Lókhɛ́n thénthé lo bhwe lókɔn lo étɔ, ɔ́n ma lé gɛ yé lóthé khúnbrɛn phú,

¹⁴ – lókhɛ́n ácí abha hɛ́nmɛn ebhá, mɛn mú salé lo bhwe lókɔn lo étɔ, ɔ́n ma lé gɛ yé lóthé khúnbrɛn phú: ló ábha chɛ́sé lóka lo Hwánthe Jezwi bha sáji bhá, lóka lókɔn lo hɛ́nthé ɔ́n ma lí phɔhá, sa lósi yábhɛ brɛ lo lɔ, hɔ́n hɛ́nthé lo bhá lí phɔhá.

¹⁵ Ábhwe khúnbrɛn lókɔn, áli ábhwe bɛn mɛn mu mímí, lóhɛ́nthé nɔn mɛn tɔ salé lóka mɛn mán má, mɛn mán phrɛ nó hɔ́n yé, ochɛ́sé ɔ́n gɛ ndubhɔ́ osí ndɔn mɔn.

¹⁶ Mɛn phrɛ kranman hɔ́n lée, lóka mɛn mán nó Masedwánɛn gotho, lónɔn mɛn mán sakhɔ́ hɔ́n yé wú hɔ́n, lókhɛ́n mɛn mán nó lóne, ló saji lóka mɛn chan lóne mɛn má, ló lɔ mɛn mán cu sakhɔ́ hɔ́n yé. Ló lóka mɛn nó Jude gotho, ɔ́n ma lo yalí mɛn.

¹⁷ Lóka khɛ́n mɛn mu hɛ́nphe yábhɛ lókɔn, wú áli ábhwe pán mɛn tɔ kalé? Ló lóka khɛ́n mɛɛ́n tɔ mɛn júmán phɔ bhwe, wú mɛɛ́n nbrɛn mwanhɛ́n nɔn mɛn mu tɔ bhwe lókɔn, ochɛ́sé lóyámɛ́n mɛn tɔlé “Mɛn dɛn mɛn dɛn”, lókhɛ́n lómánji mɛn cu tɔlé “Mɛn nɛn dɛn mɛn nɛn dɛn”?

¹⁸ Yankan li lephan áya mɛ́n bhwetɔ́ tho, ló ábhwe lókɔn khɛ́n mɛn tɔ se hɔ́n, áleli ábhwe bɛn ógɛ hɔ́n jrɛn, lókhɛ́n ncɛ́n ógɛ tɔlé ee, lókhɛ́n npi ógɛ tɔlé hóo.

¹⁹ Átɛsalé Jezwi-Krisi lókɔn ali Yankan Mi, lókhɛ́n mɛn Silási le Thimote ɔ́nmɔn lo tɔ mɛ́n phɔ bhwe se hɔ́n ye, Jezwi lókɔn, ńnɛ́n ni lephan bɛn ágɛ tɔlé ee, lókhɛ́n lómánji ácu tɔlé hóo, lókhɛ́n mɛ́n nɔn ńni Yankan bhwetɔ́ ali ee.

²⁰ Ló mímí, Yankan yí khúnbrɛn khɛ́n atɔlé ánman tɛ́ sé lo, Jezwi-Krisi phɔ nɔn ńkhɔ tɛ lóyí khúnbrɛn lókɔn. Lóhɛ́nthé mɛ́n hɛ́n hrómɛn nɔn lo khɔ lo ebhó nguhá sé Yankan lóka lo étɔlé “amɛn”.

²¹ Ló hɔ́n lɔ, le lo lɔ, Yankan nbrɛn nɔn akranman lo khúnbrɛn salé, lo li Krisi yíchwɛmán. Yankan nbrɛn nɔn asan lo, ló akhwɛn lo tre njɛ,

²² Yankan nbrɛn nɔn abho yí trɛ lo tre salé lo lí mɛ́n gbemán, ló ńmo Nánnánmi Créncré ka lo thɛ́n hrómɛn, lónɔn ali áyí ńníli tɛ thwasi, ló élie lo salé mɛ́n mwá lókɔn ńmo tre lo lé, ánman tɛ́ lóyí khúnbrɛn símɛ́n.

²³ Yankan nɔn aya tho, ló mɛ́n nɔn ńyɛn mɛn thɛ́n hrómɛn bhwe abháne. Mɛn nɛn pɔ salé mɛn tɛ́ yí okhú hɔ́n phɔ, lóhɛ́nthé nɔn mɛn nɛn pɔ salé mɛɛ́n cu nó Khorɛ́nthi khúbhɛ́.

²⁴ Lo hɛ́nphe lo ebhú, áleli salé lo bhá piɛn hɔ́n nɔ́ míthé, ló lo bhá chɛ́ hɔ́n mú mímí ádwasan mɛn. Lo yɛn salé ɔ́n gɛlé ya hɔ́n mímíbhú hrómɛn. Lókhɛ́n hɔ́n mwá hɛ́nthé nɔn lo énɛn lo gɛ hɔ́n ɔ́nmɔn lí júmán.