1 PIƐ 1 - Ebrié New Testament 1996

Piɛ ébhi néphan

¹ Mɛn hɛ́n li Piɛ, mɛn nɔn mɛn ni Jezwi-Krisi-mranchɛ́wo. Mɛn tɛ́ áhrɔ́ lókɔn sé néphan khúnbrɛn khɛ́n Yankan san, abha thwethwemɛn, néphan khɛ́n achranmanlé bha ákhúbhɛ́ khúnbrɛn abha Phɔn, Galáthi, Kaphadɔ́su, Azi le Bithini ɔ́nmɔn gotho.

² Lo The Yankan san hɔ́n sa lósi ńphrɛ khɔ tɔ lóbhwe tre, sa ɔ́n ní mɛ́n néphan mɛ́n Nánnánmi hɛ́n hrómɛn, ɔ́n ji Jezwi-Krisi, ló mɛ́n nká ochó hɔ́n phɔ chán. Tɛmɛ Yankan osé hɔ́n áphɔlíman le ńthɛ́nkhwálé ɔ́nmɔn othúbhɔ.

Tɛmɛ lo bhó lo mímíbhú tré Yankan tho

³ Tɛmɛ lo lri Yankan hwa, Yankan ali lo Hwánthe Jezwi-Krisi mɛ́n The. Mɛ́n thɛ́nbhwá khóo hrómɛn, ńse lo mɛpɔ́bhá pɔ́pɔ́, lóka ńchɛ Jezwi-Krisi chan khúnɔn mɛn fe. Lóhɛ́nthé lo bho lo mwasrui tre Yankan tho,

⁴ ló lo gɛ lí phɔhá áyíbhwá Yankan bho se mɛ́n néphan hɛ́nthé. Áyí ále lɔ áyí ále bhie, áyí ále liá Yankan bho tre ébo hɔ́n átho,

⁵ hɔ́n khúnbrɛn lókɔn khɛ́n Yankan bho mɛ́n sɛ́npɛ́ ébo hɔ́n mímíbhú hrómɛn, kábrɛ kábrɛ odi lóka ánman swa hɔ́n. Ló mímí nbrɛn, ácí ábha phúji, Yankan lie lo salé ánman swa lo.

⁶ Lóhɛ́nthé áchɛ áphɔ ehá hɔ́n, kasé khɛ́n thénthé ácí kpɛ́bɛn hromɛn, ásúwú yábhɛ yábhɛ khúnbrɛn jekhali hɔ́n khɛ́n áchɛ hɔ́n ma áphɔgbɔ́n hrómɛn.

⁷ Ásúwú khúnbrɛn lókɔn, lónɔn echɛ́ néphan yɛ́n salé hɔ́n mímíbhú gɛlé. Ńcí lókɔn wo ewú ábha liá, lókhɛ́n átɛn hromɛn nɔn ábha sakhɔ́. Lóyábhɛ brɛ, hɔ́n mímíbhú lókɔn khɛ́n ali áyíbɛn ayɔn brɛn ńcí, lólɔ ábha sakhɔ́ ásúwú hrómɛn, lónɔn ógɛ bhó yɛ́n salé áli áyíbɛn agɛlé. Lóhɛ́nthé ɔ́n ma gɛ áhwalri, ńguhá le ájí, lóka Jezwi-Krisi bha sáji bhá.

⁸ Jezwi-Krisi lókɔn ɔ́n pɔ́ nkɛ, lótɛ khɛ́n ɔ́n ne wui, ɔ́n mui mímí, lótɛ khɛ́n ɔ́n ne wui hɔ́n mɛbhí mɛn. Lóhɛ́nthé ɔ́n ma áphɔhá khóo hrómɛn, ló áphɔhá lókɔn ábanban, ló óle gɛ khɔ́ míthé mɛn tɔ lóbhwe,

⁹ átɛsalé lóyí hɔ́n énɛn hɔ́n mímíbhú hrómɛn, lónɔn ali salé: Yankan oswa hɔ́n nánnánmi.

¹⁰ Yankan swá ebhá swa néphan, bhwetɔ́trémán phrɛ ha lóbhwe mwanhɛ́n, wo nɛn lósi, ló Yankan yí lókɔn ebhá sé hɔ́n, wo phrɛ tɔ lóbhwe tre.

¹¹ Wo tɛ khekhremɛn salé wo yɛ́n lóka yábhɛ, le lóyí yábhɛ hromɛn khɛ́n wo bhá gɛ ábhwe Krisi Nánnánmi phrɛ tɔ; átɛsalé Nánnánmi lókɔn khɛ́n abha wo phɔ, áyíkhúphɔ khɛ́n Krisi ebhá gɛ le ńguhá lókɔn khɛ́n abha áyíkhúphɔ lókɔn mánji, ńphrɛ tɔ lóphɔ bhwe.

¹² Yankan kranman bhwetɔ́trémán salé, ábhwe khɛ́n mɛ́n mo se nkɔn, áleli nkɔn bhwe, lókhɛ́n áli hɔ́n bhwe. Ló thénthé ábhwe lókɔn khɛ́n nkpɔmanmán étɔ ali Ábhwe Bhwábhwá, wo tɔ se hɔ́n ye, Nánnánmi Créncré achantho sɛ́npɛ́ hrómɛn. Ló Yankan-mranchɛ́mán nbrɛn lɔ énɛn oyé Ábhwe Bhwábhwá lókɔn.

Tɛmɛ lo sinɛn otɛ́ créncré

¹³ Lóhɛ́nthé, tɛmɛ hɔ́n nánnánmi obhra ya obha lí júmán. Ló áyí khɛ́n Jezwi-Krisi ebhá sé hɔ́n lóka ánman sáji má, tɛmɛ ɔ́n bhra ya, ló ɔ́n mó hɔ́n mwasrui khúnbrɛn tre lótho.

¹⁴ Tɛmɛ ɔ́n ji Yankan ló áyí lócí ɔ́n phrɛ bho hɔ́n thɛ́n tre lótho ɔ́n chán lóphɔ féne, áyí khɛ́n ɔ́n tɛ lóka ɔ́n ne yɛn bhwe.

¹⁵ Lókhɛ́n hɔ́n yítɛ́ khúnbrɛn hrómɛn, tɛmɛ ɔ́n tɛ́ créncré sa lósi Yankan khɛ́n ache hɔ́n bha mɛ́n phɔ, mɛ́n nbrɛn ńkhɔ tɛ créncré a.

¹⁶ Ló mímí nbrɛn Yankan hrɔ́ étɔlé: “Tɛmɛ ɔ́n tɛ́ créncré, átɛsalé mɛn tɛ créncré.”

¹⁷ Hɔ́n yankanla hromɛn, ɔ́n che Yankan Nthe khɛ́n ebhɔ́ néphan khúnbrɛn kwa priman, lephan brɛ hɛ yí ɛtɛ, lótho nɔn ánya mɔ́ hɛ kwa. Lóhɛ́nthé hɔ́n mɛpɔ́bhá cí akha khɛ́n ɔ́n ma bhó bhá áthéji, tɛmɛ ɔ́n khɔ́ hɔ́n yítɛ́ hrómɛn bhó ájí se.

¹⁸ Mímí nbrɛn, ɔ́n yɛn salé Yankan tɛ khekhremɛn swa hɔ́n yɛn áyítɛ́ phromɛn hromɛn, áyítɛ́ phromɛn lókɔn khɛ́n hɔ́n jisɛmánhɔn bho se hɔ́n. Ló lóyí lókɔn, áleli áyíbɛn khɛ́n ágɛ lɔ sa jɛtɛn le ńcí,

¹⁹ lókhɛ́n Krisi nphaha khóo lókɔn phɔ nɔn wo khɔ swa hɔ́n. Ló Krisi lókɔn, mɛ́n nɔn ńni Gbankhran Mi bɛn mɛ́n phɔ simɛ́n, mɛ́n nɔn ńni Gbankhran Mi bɛn khɛ́n mɛ́n phɔ le pɛ ne.

²⁰ Yankan san Krisi lókhɛ́n wo tɛ áthéji, ló Yankan lókɔn, hɔ́n mwá hɛ́nthé, ńthándi se néphan wu ácí lókɔn aphuji hromɛn.

²¹ Mɛ́n phɔ nɔn ɔ́n khɔ hɔ́n ebhú Yankan mímí, ló Yankan lókɔn mɛ́n nɔn ńchɛ Krisi chan khúnɔn mɛn fe, ló ńmo nguhá se nkɛ. Lóhɛ́nthé, hɔ́n mímíbhú le hɔ́n mwasrui átre Yankan tho.

²² Ɔ́n ni néphan áphɔ chan, lóka hɔ́n éji ábhwe mímí, ochɛ́sé ɔ́n pɔ́ hɔ́n hɔnsɛ́nhɔn mímíbhú hrómɛn. Hɔ́n thɛ́n khúnbrɛn hrómɛn, tɛmɛ ɔ́n pɔ́ hɔ́n bɛn nbrɛn mwámwá.

²³ Mímí nbrɛn, wo ho hɔ́n pɔ́-npɔ́, áleli ńnánmí hrómɛn, lókhɛ́n áli Yankan bhwetɔ́ asé lephan mɛpɔ́bhá álephú hrómɛn.

²⁴ Sa lósi Yankan hrɔ́ khɔ étɔ a: “Néphan khúnbrɛn tɛsa ńbipɔ́ ló wo nguhá khúnbrɛn tɛsa ńbi nánnan abha bithe; lóka ńbi wɛ, ló ńbi nánnan gbɔn kálé,

²⁵ lókhɛ́n lo Hwánthe bhwetɔ́ átre lóne ákakhúnbrɛn.” Ló ábhwetɔ́ lókɔn, lónɔn ali Ábhwe Bhwábhwá obho bha se hɔ́n.