१ युहन्ना 1 - पुर्वीय मगरजीवनौ बचन 1 सुरुलकीङ न लेच, कानै सेच अनी लहौ न मीमीकै डाङ्च अनी सेम्हजा ङोस्च र लहो न मीहुटै छुच जीवन याछ बचनौ बारेयाङ कान नाखुरीककी रीक्ङन ले। 2 जब होसे जीवन प्रकट छाना, टब कानै डाङा र कान गबाही याल्हे अनी नाखुरीककी र डेले, इसे सेन्र मासीच जीवन परमेश्वर बोइ खाटा लेया, र कान लेठाङ डाङा। 3 नाखुरीक र कान खाटा सङ्गटी जाट्नी डेयार कानै ही डाङने र सेमने, होसे नाखुरीककी सेटाक्ले। कानुङ सङ्गटी चहीँ परमेश्वर बोइ र होसकुङ मीजा येशू ख्रीष्ट खाटा ले। 4 कानुङ आनन्द पुरा अटछानै डेयार न इसे कुराको रीक्ङन ले। परमेश्वर ज्योति हो 5 अब येशू ख्रीष्ट लकीङ सेच खबर कान नाखुरीकुङ मीघ्याङ सेटाक्ले: परमेश्वर न ज्योति हो, होसको खाटा चेक्जा र छुम्छ माले। 6 इडीक परमेश्वर खाटा कानुङ सङ्गटी ले डेयार चहीँ डेले टर छुम्ठाङ न व्हाले डेनाङ, कानै झुट ङाक्ले र सत्य कुराङ माव्हाले। 7 टर कुटजाट्न परमेश्वर ज्योतियाङ ले, होटजाट्न न कान र ज्योतियाङ व्हाले डेनाङ कानुङ र अरु विश्वासीको खाटा सङ्गटी छान्ले। अनी होसकुङ मीजा येशूओ य्हुये कानुङ पट्ट न पापको लकीङ कानकी शुद्ध खास्ले। 8 इडीक कान खाटा हीर पाप माले डेले डेनाङ कानै लाहाकी न ढोका याल्हे, र कान खाटा सत्य माछान्ने। 9 इडीक कानै लहो पापको परमेश्वरौ म्याहासाङ सुइकार जाटा डेनाङ होसकै कानुङ पट्ट न पापको क्षमा जाट्न याल्हे, र पट्ट न मास्च कुराको लकीङ शुद्ध जाट्न याल्हे, हीजैडेनाङ होसको विश्वासयोग्य र धर्मी ले। 10 इडीक कानै पाप माजाट्ने डेले डेनाङ कानै परमेश्वरकी झुटो ठहरीले, र होसकुङ बचन कानखाटा माछान्ले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.