سوّم یوحنا 1 - کتاب مقدس به زبان مازندرانی - گویش شرقی

¹ شیخِ جِم، عزیزِ گایوسِ که مِن وه ره ’حَییقتِ‘ دِله دوس دارمه.

² ای عزیز، مِ دعا اینِ که همه چی شِمه وسه خوار پیش بوره و سِلامت بوئین، و همین طی تِ جان هم سِلامَتیِ دِله دَووه.

³ چوون خِشال بَیمه اون مووقه که بِرارون بَییَمونه و تِ وِفاداری که حییقتِ دِله زندگی کاندی ره گِواهی هِدانه.

⁴ هیچ‌چی مِ ره اینِ جِم ویشتر خِشال نَکانده که بِشنُئِم مِ وَچون ’حَییقَتِ‘ دِله زندگی کانِدنه.

⁵ ای عزیز، تِ تِمومِ کارائه دِله بِرارونِ وِسه، شه اَمانتِ سِراغ دِنی، بخصوص اینکه تِ پَلی غریبِنه.

⁶ وِشون هم کلیسائه پَلی تِ مِحبَّتِ گِواهی هِدانه؛ پَس خوب کاری کاندی اگه وِشونِ اون طی که خِدائه شَئنِ، سَفِرِ وِسه راهی هاکانی.

⁷ چوون وِشون اون اسمِ خاطِری سَفِر هاکاردِنه و غیر یَهودیونِ جِم هیچ کُمِکی نَییتِنه.

⁸ پَس اِما وِنه این طی آدِمونِ واری ره کَمِک هاکانیم تا بَتونیم وِشونِ هِمراه، حَییقتِ وِسه هَمکار بوئیم.

⁹ مِن یه چی کلیسائه وِسه بَنوِشتمه، ولی دیوتْرِفیس که دوس دارنه شه ره اَوِّل بَدونه، اَمه اِقتدارِ اَهمیَّت نَدِنه.

¹⁰ پَس اگه مِن بِیِّم، کارایی که وه کانده ره رسیدگی کامبه، چوون غَرِضِ هِمراه اَمه علیه گانه و اینِ هم قانع نَییه، بِرارونِ هم قبول نَکانده؛ و وه، بِرارونی هَم که خوانِنه وِشونِ قبول هاکانِنه ئه دَمِ گِرنه و کلیسائه جِم بیرون کانده.

¹¹ ای عزیز، بَدی ره شه سَرمخش نَکِن، بلکه خواریِ جِم سَرمخش بَیر؛ اونی که خوارِ کار کانده، خِدائه جِم هَسه، ولی اونی که بَدِ کار کانده، خِدا ره نَدیئه.

¹² همه دیمیتریوسِ خَوِری خوار گِواهی دِنِنه، حَتَّی خِدِ حَییقت. اِما هَم این طی گِواهی دِمبی و دوندی که اَمه گِواهی راسِ.

سَرآخِر

¹³ خَله چیا داشتِمه تِ وِسه بَنویسِم، ولی نِخوامبه قَلِم و مِرَکّبِ هِمراه بوئه.

¹⁴ امید دارمه خَله زود تِ ره بَوینِم و رو در رو گَب بَزِنیم.

¹⁵ سِلامت بوئین! رَفِقون تِ وِسه سِلام رِسِندِنِنه. تَک تَک رَفِقونِ به اسم سِلام بَرِسون.