TITUS 1 - IJA KA TOGIJAWITA MANA

Edoga Mana Go-motii

¹ Ani ki Paulus kidi, Ugatame jakei te-tai me, daana Jesus Keristus eti-awita me kidi, Ugatameja ewitokita bagee ka maakodo gai kodo maida make, daana maakodo mana epi kijake Ugatame dijo do-tai maida make,

² ajii bokouto dimi kotopijawijake puja te godamake Ugatame kidaa togijawita mana kodo, kii wagi kou wagi jawii beu gaa kodaa;

³ tijake putu gaa kijake okaija mana ewaida awita, ajii bokouto nijaduwa-tai Ugatame kidaa enimakita manaidaiga nadokijawita ko, anija wudii mana kodo.

⁴ Inii enaimo maakodo gai manaidaiga ani joka didé Titus kidiipa kaamakii. Iniitai Ugatame ma, ajii bokouto nijaduwatai me Keristus Jesus ma ka jikoo bokouto ma, muka-muka bokouto ma boko kaduwajawii.

Douto-tai Bagee ma Tuku-tuku Bagee ma ka Enaa Ijee

⁵ Okai kouja ani Kerete makiida kajaikidokeetega, beu daniija aki boko jaduwajawe-tijake, daana maki gakita maakodo gai uguupuguu douto-tai bagee ewaa eewe-tijake, anija kateetega danite.

⁶ Kii ke peu beu kouja te ewidogija me, jagamo idaana to, daana jokaane maakodo gai bagee tijake utoopa wo uwe jawegai beu bagee, daana akaije te ootija.

⁷ Maakodo gai uguupuguu tuku-tuku me kidi ki Ugatameja mana jaete-tai me kouja, te ewidogija me; ibo puga beu, egaa emoge ko beu, utaadijo uneune beu, akaije akaije beu, oma jabokomai beu me.

⁸ Kodeja me oumidokii ide; enaa agijo ei gai; akaato domakai; boko petajawii; jimubeu; kojáá tou.

⁹ Maakodo mana etopita danite wo jakimakai; maakodo mana epeepite etope-tita, daana akaije bagee mana tagu etijawii maija.

¹⁰ Te juwe bagee ewaga topai kouja; wogidaa mana podomijake te-tai, daana puja euke-tai bagee; epauto ko iniitodo duwai mana jaki-topai bagee.

¹¹ Ebe jatakimijawii beu kai peu. Kou ko me ka uguwouto kigikuwa jatijawe-tai bagee, te etopija mana etopijake, oma jabokomaine kouja.

¹² Okeija ka me idaana, okei kedaa komoga-tai me kidaa wegata mana: „Kerete bagee kede puja mana epauto bagee, me no-tai jina, daana ena peu kijake egi ugo.”

¹³ Kou mana kou ko maakodo. Okai kouja okei bida peu kidi kegei-kegei etai, maakodo gai manaida boko duwajawe-tita;

¹⁴ Jahudi bagee ka mijo makii makii mana te jajuwijake, daana maakodo mana maida make wouga kidaa tita bagee ka mana maija.

¹⁵ Jimubeu bagee ka ko utoma agijo jimubeu to, kodeja jimu jago bagee ma, maakodo gai beu bagee ma ka ko kato ma jimubeu ko beu; kodeja okeija ka dimi gaja ma, dimi mana ma jimu to.

¹⁶ „Inii Ugatame epi” wegaigai kodeja kei tai agijoudaiga okei beu puga etai; nokii egaja bagee; te juwe; enaa kei tija agijo tumaana maida ma epa beu bagee kede.