PILEMON 1 - IJA KA TOGIJAWITA MANA

Edoga Mana Go-motii

¹ Ani ki Paulus kidi, Keristus Jesus maida make buda nagadimimakita me kidi, daana iniikeneka Timotius kidi, inii ma neekei te-tai noogei didé Pilemon kidiipa kaamakii;

² daana inii paneka Appia kodo ma, daana japeepa inii ma enaimo Archipus kidi ma, daana akija owaapa kotuu te-tai ka maakodo gai uguupuguu kodoopa kijamakii.

³ Kou danite Iniitai Ugatame ma, Tuhan Jesus Keristus ma, jikoo bokouto kijaduwajawii, daana muka-muka bokouto maija.

Pilemon Ideide Etai

⁴ Ani Ugatame nagajaweege ete-tai to, anija sembahjang duba kajakigoo gaa kodo.

⁵ Akija ipa dimi mana kodo kajuwai kouja, daana akija Tuhan Jesus maakodo egai, daana jimubeu bagee utoma maija.

⁶ Akija maakodo gaidaiga akagadime tijawii kou ko epaago ke-tijake sembahjang katei tita, wo ka enaa agijo utoma epi kija manaida Keristus maida make, inii duba topa ka kodo.

⁷ Akija ipa dimi maida make ani awe kadee natijawijake ideide umina; jimubeu bagee aki kegepa mobu jaaweige kouja, ei, noogei.

Onesimus Maida Make Ediimai

⁸ Okai kouja aki kei tija agijo ani Keristus duba bida peu katimakija kodeja,

⁹ ipa dimi kouja ani kadiimaine, ani ki Paulus adama kidi, daana ito kou Keristus Jesus maida make buda nagadimimakita topa.

¹⁰ Ani joka maida make kadiimai, ani kiija buda nagadimimakitaida kodaa nakame kidi kita, kii ke Onesimus kidi.

¹¹ Itookei akeepa epa beu kidija, ito kou akeepa ma aneepa ma epaago kita.

¹² Okai akeepa jawe-tijake kaaebadikumii; ani tine kidi.

¹³ Aneepa ejakimakaine kodeja, ajii mana maida make buda nagadimimakitaida kodaa aki komouto naadade-tita.

¹⁴ Kodeja kadiimai beu gaa tumaana ma te kei taine, aki enaa agijo kei tai ko, me ka tapa-tapa katijakeidaiga ko beu, kodeja ide gajake to kei tai.

¹⁵ Okai kou maida make mijo gaa akeepa make akawude kitijawita; aki umina kidi joko ebuke-tita.

¹⁶ Ito kou kei te-tai dabaa dani ko beu, kodeja kei te-tai ma ko euga ibo dani ka kidi, kii ke ei egata keneka kidi, edoga ko anija ei egata kidi, kojoka aki na umina kidi, me ka ijeida na, Tuhan duba na.

¹⁷ Okai kouja, aki noogei nagape, ani nabukija danite ebukai.

¹⁸ Okai kauwajawijake aki maida ebé jago kipi, ani maida naadokijawii.

¹⁹ Ani ki Paulus kidaa gane ka kaaebijai, ani amo kaaedaita; ani maida aki ebé tope te wegaine kodeja.

²⁰ Ei, noogei, Tuhan duba akeepa make enaa agijo goune. Keristus duba ani kegepa ideide naawii.

Paulus Kidaa Pilemon Maida Dimi Ekotopijawii

²¹ Akija ani najuwidoke kou ani gajake kapogeije kaaebijai; ani kadiimai agijo to ko beu kodeja euga maija kei taitage kagajake.

²² Okai kou gaa kodo maija ani umiida epeepi naatijawii, akija sembahjangdaiga ani akeepa jamo jawii dimi kotopijawii kouja.

Muumai Jago

²³ Keristus Jesus maida make ani ma enaimo buda egadimimakita noogei Epafras kidaa kojáá tou kiteegi;

²⁴ daana Markus ma, Aristarchus ma, Demas ma, Lukas ma, kei tai agijo maida noogeima kede.

²⁵ Tuhan Jesus Keristus jikoo bokouto ikiija roh maida tou to.