MARKUS 1 - IJA KA TOGIJAWITA MANA

Baptis Tei Tita Me Jahja Kidi

¹ Kii dei edoga kidi ajii mana Jesus Keristus maida make, Ugatame Joka kidi.

² Tikauwa ka mana wudei tita me Jesaja ka kapogeije ebijamakita danite: Juwidou, naaetigo-tai me tiga aki jumaapa kaaebadikumii; Akija ita epeepite kaawadiitagi.

³ Gei tapa mana emeeme tina: Tuhanja ita epeepi jawadijawii; Kago-pagooja maija doodoo jaawii.

⁴ Jahja gei tapa meido baptis etaine mei, daana tedemijake baptis tai mana pitokai, peu awitaido ipa jajaike-tijake.

⁵ Tijake Jahudi ma, Jerusalim ma, maki utoma podomijake Jahja edou uwii. Okai Jarden oneiga baptis etai, okeija ka peu awitaido odajake.

⁶ Jahjaja kagaba ko unta ijo, daana piti ko kado ka. Okaija naija agijo ko kobeepa ma, buguwa ka dokone odijo ma.

⁷ Okai meidoopa mana wudii, kii dani eteete mana, „Ani ma ko okai ki bida jago me ani nemouga meitagi. Okaija bado awii ani tudumijake jaekegai ko nadou peu.

⁸ Ani ki uwo ka baptis kitai kodeja, okaija ko Rohulkudus ka baptis kitaitagi,” etii.

Tuhan Jesus Baptis Etita

⁹ Okai kou gaa kodo Jesus Galilea dokoo Nazaret makijo make mei. Tijake Jahja Jarden oneiga baptis etai.

¹⁰ Okai uwo duba make wadouwe keetigo gaa kodaa epa damo kebadoke tijake Ugatameja Roh kodo wonou dani tijake okai maida mijouwe kai dou.

¹¹ Tijake epa duba make mana wuu tijake, eteete mana, „Aki ki ani Joka didé. Ani umina juma dege-dege katai,” etii.

Tuhan Jesus Egaado Tita

¹² Okai kou gaa kodaa Roh ka Jesus me beuda ouwiine umina etai.

¹³ Uno mepiija me beuda tojake Teege ka egaado tai. Okai ego jago jinaido ma enaida tou, kodeja Ugatameja jaetigo-tai bagee ka eedadai.

Jesus Meido Etopai Go-motii

¹⁴ Jahja ejakimakijake wado, Jesus Galilea dokoo mejake Ugatameja ajii mana wudikumii;

¹⁵ kei teete mana, „Putu duwadoke keega; Ugatameja jakimakita makiida kapa keega. Tedemiwei, ajii mana kou maakodo gawei,” etii.

Binei Muga-tai Bagee Manaa-tai

¹⁶ Okai Galilea iteida ita uwina uwina teetigo, Simon ma, kenekame Andereas ma ebai peku duba mijouwe aweetigo edou; okejai binei aamuga-tai bagee kouja.

¹⁷ Tijake Jesus eteete mana, „Aamewei, aanaapewei; ani me mugai kijaikaita no,” etii.

¹⁸ Okai kou gaa kodaa okejai ebai aajaikidokijake Jesus aepei.

¹⁹ Jesus wo dani kijake Zabdi jokaaneija Jakub ma, kenekame Jahja ma komaida ebai aapuumeetigo edou.

²⁰ Okai kou gaa kodaa okai manaa-tijake okejai nakame Zabdi ma, ookei te-tai meido ma komaida aajaikidokijake Jesus aepei.

Enija Jago Me

²¹ Okei Kapernaum makijo uwii. Sabbat naago Jesus sembahjang owaapa wadoujo kijake meido etopai.

²² Okaija etopita mana okei ego takuu-takuu umina, okai bida jago me bukaa danite etopai kouja, kapogeije epi bagee dani bukaa ko beu.

²³ Okai kou gaa kodaa okeija sembahjang owaa duba enija jago me idaana tojake emeeme

²⁴ teete mana, „Ei, Jesus, Nazaret ka me, aki ma inii ma má imee? Aki peu neewiine meege, mee? Aki ki ani epi no, Jimubeu kidi Ugatameepa make meta,” etii.

²⁵ Tijake Jesus ewidogeete mana, „Gabo! Me kidi duba make podomidou,” etii.

²⁶ Tijake enija kodaa me kidi wo gojawii jamo gojawii umina etai. Kuutakaa umina emeeme tijake okai duba make podomai.

²⁷ Meido utoma ego takuu-takuu umina timakijake okei kede wegaate mana, „Jee! Kou ko magijo? Ija mana muto kojoka. Okai mana bida peu etimakijake enija maija jajuweegai kou ko,” wegai.

²⁸ Tijake egaa kodo Jesus maida make mana kodo Galilea dokoo maki utoma wudigi tidoke tai.

Peterus Baakame Beu Jaawita

²⁹ Okai kou gaa kodo okei sembahjang owaapa make podomijake, Simon ma Andereas ma ka owaapa woujo kai, Jakub ma Jahja ma enaimo.

³⁰ Simon baakame gobi ka pakuti-toojogo, tijake okei egaa kou mana kodo Jesus etii.

³¹ Tijake Jesus mejake gane ejakijake eenigojawii, tijake gobi kodo beu kidoke tai, daana jagamo kodaa eedadai.

Uwaataa Digii Me Wedaba Beu Jaawita

³² Uwaataa digii, meuka wakoujo kijake, didi bagee ma, enija jago bagee ma utoma me ka Jesuspa oomei.

³³ Kou makiida ka bageido utoma damoutoopa kotuu timakai.

³⁴ Didi tuma tumaija ejakita bagee wedaba beu jaawii, daana enija wedaba jaemigimakai. Enijaido kodo mana te wegai etii. Enija kodo okai kidi epi kouja.

Jesus Mana Wudina Tai

³⁵ Abata digii, makiida awii beu gaa Jesus anigou. Okai podomijake me beuda uwii. Kouda kodaa okai sembahjang tai.

³⁶ Simon ma, okai ma enaimo bageido ma eepei.

³⁷ Okei edomakijake eteete mana, „Kuduu, meido utoma kaubaate,” etii.

³⁸ Tijake Jesusja „Mewei” etii. „Joko ka kapa ka makiida maija ani mana wude-uwiine no. Okai kou maida make ani podomai,” etii.

³⁹ Tijake okai uwijake Galilea dokoo utoma ka sembahjang owaido duba mana wudina, daana enija maija jaemigimakai.

Tomo Jago Dani Me Ojawii

⁴⁰ Tomo dani me idaana Jesuspa mejake okai jumaapa maki jato mijouga kijake ediimeete mana, „Kou danite aki enaa gape ko, aki bida jago kojoka naojawii,” etii.

⁴¹ Tijake okai ipa egajake gane mapido atii. Ejakidojake, „Ani ide. Aki oodoke ti,” etii.

⁴² Okai kou gaa kodaa tomo dani kodo me kidi maida make igajake oodoke tai.

⁴³ Tijake Jesus bida peu umina mana etijake, „Egaa uwii,” etimakai.

⁴⁴ Daana eteete mana, „Epeepite gai; me idaana ma te etii, kodeja aki akaato imampa emuwake-uwijake oodoke keege kouja Musaja nitimakita agijo menii, okei dimi ga-tijake,” etii.

⁴⁵ Kodeja me kidi uwijake okai kou mana kodo aiko amuko wegakumijake mana kodo wudigi tidoke tai. Tijake Jesus maki okogoopa ewaida jokoujo te kimake kouja me beuda to tou. E butu te butu ka bageido okaapa megoo tai.