LUKAS 1 - IJA KA TOGIJAWITA MANA

Edoga Mana Go-motii

¹ Inii jupi ewaa kita manaido me wedaba epeepite ebijamakaine ekowa-moteetegai kouja,

² mijo nijamakijake danite, edoga kidi peka dojake mana kodo wudita bagee ka;

³ okai kouja, kowaa ke, Teopilus ibo kidi, ani maija epauto kodaa make utoma agijo utoma epeepite igi jaki-motijake kouja, epautouda make kou mana kaboudaiga kaaebijamakaine dimi gai.

⁴ Katopita mana mutouja umina maakodo no! aki ga-tita tijake.

Baptis Tei Tita Me Jahja Kidi Pai Mana Douja Dojawita

⁵ Herodes Judea dokoo jakimakita gaa, imam idaana Abia jato ka me kidi eka ki Zakaria toojogo. Jagamome maija Harunja ekebata, eka ko Elisabet.

⁶ Okejai wija Ugatame pekaida enaa, daana Tuhanja mana mutouja anaanibeu kidi dijo aadou to.

⁷ Kodeja okejai wija joka aamakai beu, Elisabet pijaakita kouja, daana okejai wija umina adama.

⁸ Okai Ugatame jumaapa imam kei tai agijo kei teetigo, okai jato ka kei tai wagiida kodo.

⁹ Imam kei tei tita danite okai maida ateinita, Ugatameja owaa duba wadoujo kijake unu enaa jeboo jo-tijake.

¹⁰ Jeboo jota gaa kotuu timakita bagee utoma juwouda sembahjang teetigo.

¹¹ Tijake jeboo jooteida etikaato kodaa Tuhanja jaetigo-tai me idaana Zakaria jumaapa ewaida joonidoke tai.

¹² Zakaria edojake gootoki tai, daana weda umina okai maida kai.

¹³ Kodeja jaetigo-tai me ka eteete mana, „Weda te gai, kowaa ke, Zakaria, akija sembahjang ediimita mana kaajuwita kouja, tijake akuwaka Elisabet ko jame joka idaana paita, daana aki ki eka Jahja eebatai.

¹⁴ Aki umina ide gajake aki kaga gaitage, daana okai paitagiida me wedaba ideide umina taitai.

¹⁵ Okai Tuhan pekaida ibo kaitagi kouja. Okai utaadijo juwa, enege uwo juwa, te naitagi. Ukame ka modo duba make Rohulkudus ka ebetume tidoke ti-toutagi me kidi.

¹⁶ Israil jokaane wedaba okeija Tuhan Ugatameepa joko emejawiitagi.

¹⁷ Elias roh ma bidaidaiga ma Tuhan jumaapa uwina tijake me nakaane ka kegepa jokaaneepa joko emejawiitagi, daana te juwe bagee kede enaa bagee ka dimi kidiipa. Tijake Tuhan maida uguwoona epeepi jatijawiitagi.”

¹⁸ Tijake jaetigo-tai meepa Zakariaja eteete mana, „Kou mana kodo kawe dani tijake ani gamakaipiga? Ani adama kouja, daana anija jagamo maija umina adama,” etii.

¹⁹ Tijake jaetigo-tai me wo eteete mana. „Ani ki Djibrail Ugatame jumaapa joone-tai me, daana ani nabadikumijake enaa mana kodo kati-kaniine meega.

²⁰ Kojoka gai, aki mana beu kijake, kei agijoudo kobaitaida to aki mana te wegamake, anija mana aki maakodo nagai beu teege kouja. Putu gadimijawita gaa kodo ewaa kaita kojoka,” etii.

²¹ Kotuu timakita bageido kede Zakaria edoutoojogo, tijake okai Ugatameja owaa duba ipee teete kouja okei ego takuu-takuu umina.

²² Okai podomijake okai meido kedeepa manaana ma etii beu, tijake Ugatameja owaa duba dou beu agijo dopi gaa egai. Okai ganaabegouda to etigoo etigoo tijake mana beu tou to.

²³ Okaija kei tai wagi tiki tijake okaija owaapa jamo uwii.

²⁴ Kou wadoutouga jagamome Elisabet modo kijake agoo idibi boonidoke tijake wegaate mana,

²⁵ „Kou danite Tuhanja nakei tita, ani nadomakita gaa, anija ego dimi me jumaapa make beu naaweete kodo,” wegai.

Tuhan Jesus Pai Mana Douja Dota

²⁶ Benumaago agouda Ugatameja jaetigo-tai me Djibrail kidi ebadikumii, Galilea dokoo ka makijo eka ko Nasaret kodaa,

²⁷ api idaanaapa, jame idaana eka ki Jusuf wii etai kodo. Okai Daud ekebata me kidi. Api kodo eka ko Marjam.

²⁸ Tijake jaetigo-tai me kidaa Marjampa mejake eteete mana, „Kojáá, kowaa kau, Ugatameja mobu bokouto kaduwajawita me. Tuhan kidi aki ma enaimo,” etii.

²⁹ Kodeja okai kou dani etita kodo Marjam gootoki tijake kawe dani eneegi gajake gaagaa tai.

³⁰ Tijake jaetigo-tai me kidaa eteete mana, „Weda te gai, kowaa kau, Marjam, Ugatame ka juma dege-dege katai kouja.

³¹ Juwidou, aki modo kijake jame joka idaana paitage, tijake okaaka ki Jesus eebatai.

³² Okai ibo kaitagi. Monika Me Joka eebataitai. Aijame Daudja tonawi animakaida Tuhan Ugatameja meniitagi.

³³ Tijake Jakubja ekebata bagee ejakimakaitagi imo to togoo. Okaija boko duwajawii kou ko momogi ko beu,” etii.

³⁴ Tijake jaetigo-tai me kidiipa Marjam eteete mana, „Kawe dani tijake ewaa kaita? Ani jame ma aatou beu no,” etii.

³⁵ Tijake jaetigo-tai me kidaa wo eteete mana, „Rohulkudus aki maida kijake Monika Meja ka bida agijo kaapumimakaita. Okai kouja aki paitage me kidi Jimubeu Bokouto Jago Me eebataitai, Ugatame Joka kidi.

³⁶ Juwidou, aki ma me Elisabet kodo maija jame joka modo, adama gaa. Daana itookei pijaakita eebatita me kodo ito kou benumaago agouda modo keega.

³⁷ Ugatame tumaana agijo ma kaga te tija kouja,” etii.

³⁸ Tijake Marjamja eteete mana, „Beu maa kou, ani Tuhan jakei te-tai me kodo. Akaa eneege danite aneepa kei tidoke tai enaa,” etii. Tijake jaetigo-tai me kidi ejaikai.

Marjam Elisabet Edou Uwii

³⁹ Okai kou gaa kodo Marjam uwijake egaa kidi dimi katouda dakii, Jahuda ka maki katouda.

⁴⁰ Okai Zakariaja owaapa wadoujo kijake Elisabet kojáá etii.

⁴¹ Marjamja mana Elisabet juwijake joka kidi modo duba mukugu tai. Tijake Elisabet Rohulkudus ka ebetume tidoke tijake

⁴² kuutakaa emeeme teete mana, „Ei, aki ko epaago no! joko ka jagamoudo ma ko, Daana aki modo duba ka kidi maija muta etuwaja no!

⁴³ Kawe dani tijake aneepa kei tidoke tija, Anija Tuhan kidi ukame nado-meega kou ko?

⁴⁴ Akija kojáá eneege mana kodo ani juwijake Joka kidi ani modo duba ide gajake mukugu keegi kouja.

⁴⁵ Ideide no! maakodo gata jagamo kodo, Tuhanja etita mana kodo okaapa kobadoke taita kodaa.”

⁴⁶ Tijake Marjam kei teete mana, „Anija dimi mana ka Tuhan kidi ibo ejaikai,

⁴⁷ Daana anija kegepa ideide timakai, Ugatame ajii bokouto naduwa-tai kidi maida.

⁴⁸ Jakei te-tai me dabaa nadomakai kouja. Maa kou, ito make wado utoma bagee ka ideide no na wegaitai.

⁴⁹ Bida bokouto jago kidaa ibo agijo nakei tai kouja, Okaaka ki Jimubeu kidi.

⁵⁰ Okaija ipa dimi mijo makii makii Weda ega-tai bageepa.

⁵¹ Okaija gane ka bida kei tita agijoudo emuwakai, Daana kegepa ibo gaate bagee kede wudepapa etikumii.

⁵² Bida jago bagee tonawi animakaida make mijouwe eewii; Daana mijo bagee wadouwe eewii.

⁵³ Naidi bagee enaa agijo ka mobu eewii; Daana tonawi bagee agijo tagu eebakikumii.

⁵⁴ Jakei te-tai bagee Israil eedadi-motii; Okaija ipa dimi kodo ga-tojake.

⁵⁵ Iniija aijaane muumaane etita danite, Kii ke Ibrahim ma, ekebata bagee ma, imo to togoo.”

⁵⁶ Agoo wido dani Marjam Elisabet ma enaimo aumai, tijake okaija owaapa wo uwii.

Baptis Tei Tita Me Jahja Kidi Pata Mana

⁵⁷ Elisabet joka pai agouda kijake jame joka idaana pai.

⁵⁸ Kou makiida ka bagee ma okai ma bagee ma Tuhanja ipa dimi emuwakita kodo mana juwii, tijake ideide umina ootai.

⁵⁹ Waguwaago naago joka kidi okeitodo duwaine mei; okei nakame ekaidaiga Zakaria eebataine kodeja

⁶⁰ ukame wo eteete mana, „Beu, kodeja okaaka Jahja eebatai,” etii.

⁶¹ Tijake okei eteete mana, „Aki ma bagee jupi kou eka kou ko me idaana ma beu topi,” etii.

⁶² Tijake okei nakame kidi ganaabegouda egaado tai, kawi ka eka okai ide eebataine tijake.

⁶³ Okai pija kapoona ediimijake kii dani ebijai, „Okaaka Jahja.” Okei utoma ego takuu-takuu tai.

⁶⁴ Okai kou gaa kodo maija eta kotopidoke tijake mana godadoke tai. Tijake Ugatame muta etuwaate okai mana wegai.

⁶⁵ Okai kou watija tota bagee weda umina gai. Tijake kei manaido Judea ka dimiido utoma ugo uwidoke tai.

⁶⁶ Juwita bagee utoma kegepa duba dimi gaawe tijake wegaate mana, „Kii joka kidi kawe dani taitagi?” wegai. Tuhanja gane okai maida kouja.

⁶⁷ Nakame Zakaria Rohulkudus ka ebetume tidoke tijake douja dojawita mana kodo,

⁶⁸ „Israilja Tuhan Ugatame kidi umina muta etuwai! Okaija uguupuguu edo-mejake epipikajawii kouja.

⁶⁹ Jakei te-tai Daud kidi uguwo dubaiga Ajii bokouto nijaduwajawita.

⁷⁰ Gokobaki tijawiidaiga wegai tita bagee jimubeu kede Ebeidaiga tika kodaa make wegata kouja.

⁷¹ Kou ko, jape bageepa make nipipikajawiine tijake Daana be nigai bagee utoma ka gane duba make maija.

⁷² Okaija ipa dimi kodo inii aijaane muumaaneepa emuwakijake, Daana jimubeu togijawita mana kodo ga-tojake.

⁷³ Kou ko inii aijame Ibrahimpa baita jamakita mana kodo, Kei nitijaweete mana,

⁷⁴ Jape bagee ka gane duba make nipipikajawijake Inii weda beu kidi dijo jadou to,

⁷⁵ Jimubeu kidi ma maakodo bokoutoudaiga ma Okai jumaapa, iniiwogi bokaiwogi kodaa.

⁷⁶ Daana aki ki, ei, joka kidi, Monika Meja ka Gokobaki tijawiidaiga wega-tai kidi kaabataitai. Aki tiga Tuhan jumaapa ita jawadeete uwiitage kouja.

⁷⁷ Ajii bokouto mana okaija uguupuguu epi eewe-tita tijake, Okeija peu awitaido ipa jajaikai manaidaiga.

⁷⁸ Inii Ugatameja ka bunu enaa ipa dimiidaiga Monika jato make awe kadee nitijawijake.

⁷⁹ Bunita duba bokawouda ka dipumitaida tota bagee Aweida jaganimake-tita tijake. Daana muka-muka ka itaiga migougu nijamakii.”

⁸⁰ Joka kidi ejajake dimi mana epi kai. Okai me beuda to tou, Israil bageepa okai akaato emuwakitaida to.