JAKUB 1 - IJA KA TOGIJAWITA MANA

Edoga Mana Go-motii

¹ Ani ki Jakub kidi Ugatame ma Tuhan Jesus Keristus ma jakei te-tai kidi, wudepapa tikumita ka Israil epa wija ma gaati kedeepa kojáá kitii.

Gaado Duba Ideide

² Ei, noogeimaido, ikii kii ka gaado, kou ka gaado duba ki-toojogo ideide puki to gajawii.

³ Ikiija ka maakodo gai kodo kigaado tijake ko bo kiwejawii kojoka gajake.

⁴ Bo wei mana kodo bo we-wado enaa, ikii boko kijaduwa-makijake ena ma beu te ke-tijake.

Maakodo Gajake Dimi Boko Ediimai

⁵ Me idaana ikii jupi dimi boko beu kipi okai Ugatameepa ediimai enaa; okai bunu enaa kidi me utoma menii to, te ewidogijake, meniipagi kojoka.

⁶ Kodeja okai maakodo gamakijake ediimai beu kai peu, dimi wija te kijake; dimi wija me kidi peku ka dokegaa dani bukaa kouja, ukija ka amo dokii joko dokii tijake.

⁷ Kii dani ka me kidi tumaana agijo Tuhanpa make motija dimi kodo te gai.

⁸ Dimi wija me kidi utoma takaida wo gojake joko gojake to.

Daba Bagee ma, Tonawi Bagee ma

⁹ Daba me kidi ibo eewita kijoka kobidoke tai enaa;

¹⁰ daana tonawi me kidi daba eewita kouja; gai wagi ka pi dani bukaa igadoke taineegi kijoka.

¹¹ Meuka tani umina kodaa wadoujo kijake gei wagi kodo weikogi tijake pi kodo juwidaa, tijake okaija diiti kodo beu kidaa tai; okai kou dani maija tonawi me kidi utoma takaa maida make wo igai.

Egaado Tita Bagee

¹² Ideide no! kojáá peu kidi gaado agijo gaduwagoo te-tai me kidi. Egaado timakijake petee kita me kidi ajii tai petege go-motiitagi kouja, Ugatame ei egai bageepa jatogijawita mana kodo.

¹³ Me idaana egaado ti-toojogo, „Ugatame nagaado teegi” mana kodo te wegai; Ugatame kidi peu ka egaado beu tita, daana meena ma egaado tai beu.

¹⁴ Kodeja me gakita egaado tita, okai kidaa kibigi dimi kodaa edokijake.

¹⁵ Tijake kibigi dimi kodo modo kijake peu kei tai agijo pamakai, daana peu kei tai agijo kodo ibo kijake bokai kodo pamakai.

Enaa ka Niimita Agijo

¹⁶ Uneune te tai, ei, noogei dideemaido.

¹⁷ Utoma ka enaa niimija agijo, daana boko duwajawita ka niimita agijo kodo waikaato make, awe epauto Iniitaipa make mijo niimita; okai kidi iginikiniki te tijake ajá begoo na te tija.

¹⁸ Okai kidaa gata dimi epeepeidaiga nipamakita, okaija maakodo mana kodaa, okaija ugata agijo jupi inii ke tumaana agijo ka ookajawii uta ke-tita.

Emoge Ipee

¹⁹ Kou mana kodo gai, ei, noogei dideemaido, me gakita juwii ko egaa, mana wegai ko ipee, daana emoge ko ipee.

²⁰ Me ka emoge kodaa Ugatameja maakodo bokouto jaduwajawii ko beu kouja.

²¹ Okai kouja jimu anija ma, peu abuma kodo ma, jamo jaikidokijake ikii duba wejawita mana kodo debuu kegepa ka jakimakai, ikiija dimi mana kodo ajii kitijawii bida jago mana kodo.

Mana Kodo Kei Te-tai Bagee Kai

²² Ikii mana kodo kei te-tai bagee kai, mana juwe-tai bagee to ko beu, akaato kadee makijake.

²³ Me idaana kidi mana juwe-tai kipi, tijake kei te-tai beu kipi, okai me idaana ebepeka papaadouda dou kodo danite;

²⁴ okai akaato kidi dojake uwii, tijake kawe dani toogi juwa wo adaku.

²⁵ Kodeja meija boko duwajawita mana kodo igi jakimakipi, kou ko me epipikajawii mana kodo, tijake bo wemakipi, okai mana juwijake adaku tijawii me kidi ki beu, kodeja kei te-tai me kidi, kii kidi kei tai agijo enaa ke-wo.

Jimubeu Dijo Douja Mana

²⁶ Me idaana kidi ani dijo do-tai kijoka dimi gapi, kodeja etá emunai beu tijake akaato kadee makipi, okaija dijo do-tai kodo wogidaa.

²⁷ Jimubeu ka dijo dou kodo, daana Iniitai Ugatame jumaapa anaani beu ka kodo, kou dani kojoka: Dobija joka ma, mijáá jagamoudo ma gaagaa duba eedadai, daana makiida maida make akaato anaani beu kidi munii.