EWAIDA 1 - IJA KA TOGIJAWITA MANA

Jahja Emuwakita

¹ Kou dou Jesus Keristus ewaida awita mana kodo, Ugatameja menita, ewaa kidaa taineegai manaido jakei te-tai me emuwakaine tijake; jaetigo-tai me ebadikumita, jakei te-tai me Jahja kidiipa ete-tijake.

² Kii ke Ugatameja mana jawegai, daana Jesus Keristus jawegata mana maija; kou ko okaija dotaido utoma.

³ Ideide no, douja dou mana kii ke ebate-tai bagee ma, juwii bagee ma; daana ebijata mana utoma kegepa duba amoujo awii bagee ma; putuuda kaineega kouja.

Maakodo Gai Uguupuguu Pituwo

⁴ Jahja kidaa Asia dokoo ka maakodo gai uguupuguu pituwo kedeepa kijamakii: Jikoo bokouto ma, muka-muka bokouto ma kijaduwajawii, okai kii kidaa, kii ko tou to me, tota me, meitagi me kidi; daana jegeenaka animakaida jumaapa ka Roh pituwo kodaa maija.

⁵ Daana Jesus Keristus kidaa maija, enanauto mana wega-tai kidi, bokata bagee jupi make tuku-tuku me kidi, makiida ka iboudo kede ma ko okai ki wado etige me. Kii ke ipa nigajake iniija ka peu maida make okai kidaa emo ka nipipikajawijake.

⁶ Nakame Ugatame jumaapa jakimakita makiida ka imam neewita. Kii kidiipa ajiipi bokouto ma, bida bokouto ma, kii kidi imo to togoo. Amin.

⁷ Edodowei, okai jabai ma meete, daana me utoma edoutai; okai enokogita bagee kedaa maija; makiida ka tuma tumaija okai maida make jiijii taitai. Okai kou kojoka. Amin.

⁸ „Ani kii ke epautouda ma, momogiida ma,” e boko te boko duwa-tai Ugatame kidaa mana; tou to me, tota me, meitagi me kidi; e bida te bida me.

Patmos Makiida Make Ebijata

⁹ Ani ki Jahja ikiikeneka kidi, ikii ma enaimo Jesus maida make akagadime; kou ko gaagaa dubaiga ma, jakimakita makiida ma, daana kegepa mijaanimakai manaida ma; ani Patmos ebatita uwouja okogouda toojogo, Ugatameja mana maida make, daana Jesus jawegai manaida.

¹⁰ Tuhanja naagouda kodaa ani Roh duba kijake ani matokaatouga ibo mana wuu juwii, mitoopi dani bukaa,

¹¹ eneete mana, „Aki doupage agijo kapogeije ebijamakai, tijake maakodo gai uguupuguu pituwo kedeepa wado jamakii; kii ko Epesus ma, Smirna ma, Pergamus ma, Tiatira ma, Sardis ma, Filadelfia ma, Laodikea ma,” enita.

Me Joka Kidi Ewaida Edota

¹² Mana wuu eneete kodo doune tijake ani amouga kai. Ani amouga kijake mas ka ebijata lampu make-taida pituwo dou.

¹³ Lampu make-tai jupiida kodaa me joka idaana dani bukaa jooni-toojogo, woja kagaba makijawita, daana mas piti boko jato tagimijawita.

¹⁴ Migo ma ijo ma pokade, domba ijo dani, saldju dani; peka ko bodija wii dani bukaa.

¹⁵ Bado ko pute wakii dani, ibo bodija duba enaanaa tijawijake dani bukaa. Mana wuu kou ko uwo gee wedaba dani bukaa.

¹⁶ Etikaato ganeida ijapu pituwo jaki-toojogo; ebe duba make kataana aitaato jokoutaato emuu kodo kago atita; ebepeka tiigi puugi dani bukaa.

¹⁷ Ani edojake ani okaija bado jato bokata me dani bukaa apaipu tidoke tai. Kodeja okaija etikaato gane ani maida makijake eneete mana, „Weda te gai, ani ki epautouda make momogiida to.

¹⁸ Kii ke ajii bokouto jago; ani bokata kodeja nadodou, ito ani ija topa kii kidi imo to togoo. Boka ma, bokawouda ma, kebajawija agijo aneepa topai.

¹⁹ Ito kou aki dooge manaido ebijamakai, ito gaa ka mana maija, wado ka ewaa kaita ka mana maija.

²⁰ Ani etikaato ganeida ijapu pituwo boko jato kou ko, daana mas ka ebijata lampu make-taida pituwo kodo, kou ko ijapu pituwo kei ke maakodo gai uguupuguu pituwo jaetigo-tai bagee kede, daana lampu make-taida pituwo kei ke maakodo gai uguupuguu pituwo kede.