2 PETERUS 1 - IJA KA TOGIJAWITA MANA

Edoga Mana Go-motii

¹ Ani ki Simon Peterus kidi, Jesus Keristus jakei te-tai ma, eti-awita ma, kapogeije kijamakii, iniija ka maakodo gai kodo ma utuutu ka agakato dani maakodo gai kodo go-motita bageepa; iniija Ugatame ma, ajii bokouto nijaduwa-tai me Jesus Keristus ma maakodo bokouto kodo duba.

² Jikoo bokouto ma, muka-muka bokouto ma, ikeepa abuma ke-wo, Ugatame kidi ma, e boko te boko nijaduwa-tai me Jesus kidi ma, epi kai manaida.

Inii Ugatame Ijeida Akagadime

³ Inii dijo dojaidaiga ume-wo te-tijake okaija ka ajii ka bida bokouto kouja utoma agijo niimijawita; okaija ka ajiipi bokouto ma, enaa bokouto ma, maidaiga mana nitita me kidi egamakaidaiga.

⁴ Okai kou maidaiga okaija ka umina ibo ka agakato dani manaido nijatogijawita, koudaiga inii Ugatame ijeida akagadime te-tijake, makiida ka peu kaine utoopa ijee maida make petii tidaa tijake.

⁵ Okai kouja ikiija ka maakodo gai maida kodaa enaa ka ijeida tawajawiine umina ekowa-motii; daana enaa ka ijeida kodaa gamakai amo tawajawii;

⁶ daana gamaki maida akaato munii amo tawajawii; daana akaato munii maida bo wemakai amo tawajawii; daana bo wemakai maida dijo domakai amo tawajawii;

⁷ daana dijo domakai maida enakeneka bagee ipa akaga amo tawajawii; daana enakeneka bagee ipa akaga maida kodaa ipa bokouto kodo amo tawajawii.

⁸ Kei manaido ikii duba topai ko, daana abuma kidaa tipai ko, iniija Tuhan Jesus Keristus kidi egamakai manaida ikii ena peu juwa, epa beu juwa, te ke-tijake kitimakai.

⁹ Kei manaido beu me kidi peka wanee; okai kapa to dou tijake mijaato ka peudo maida make witogikumita kodo adaku.

¹⁰ Okai kouja, ei, noogeimaido, kiwitokijake mana kitita kodo umina epaapa timakaine ekowa-motii; ikii kou kei tipa ko ikii umina kidi jagii te taita.

¹¹ Kou dani tijake iniija Tuhan Jesus Keristus ajii bokouto nijaduwa-tai me kidi imo to togoo jakimakita makiida goudaiga woujo keewii.

Peterus Ga-meniine Kapogeije Ebijai

¹² Okai kouja kei manaido ani umina kidi ga-kiniine to, ikii epi kodeja, daana ikii jakimakita ka maakodo mana kodo duba bo wemakita.

¹³ Ani kedaa owaa duba topa gaa kodo ga-kinijake mabiki kitaine enaa gai.

¹⁴ Anija kedaa owaa kodo jaikidokii egaa kaita gajake, iniija Tuhan Jesus Keristus kidi namuwakita danite.

¹⁵ Okai kouja ani umina ekowa-motiine, ani bokajake wadouto utoma wagiida ikii kei manaido ga-to-tita.

Keristusja Ajiipi Agijo Ewaida Jadota

¹⁶ Me ka dimi ka kuba-mote mana inii epei beu, iniija Tuhan Jesus Keristusja bida bokouto ma, meitagi mana ma, kitita gaa kodo; kodeja inii kede peka ka okaija ka ajiipi bokouto kodo jadomakita.

¹⁷ Nakame Ugatame kidaa ajiipi agijo menijake ibo ejaikai, e ibo te ibo ka ajiipi duba make mana wuu kodo juwita gaa kodo, „Kii ke ani Joka didé; ani umina juma dege-dege etai.”

¹⁸ Inii kede mana wuu kodo epa maida make juwii, inii okai ma enaimo jimubeu bagouda ootootege gaa kodaa.

¹⁹ Tijake euga ka pigu atita ka douja dota mana kodo inii tope; ikii kou ko epeepite juwimakai beu kai peu, bunita tapa lampu ganii danite, awe digii kaita gaa to, daana awega kodo ikiija kegepa duba ewaa kaita gaa.

²⁰ Kou mana kodo tiga gai, ugata mana ka douja dota mana ena ma me ka gaijaidaiga ko beu.

²¹ Douja dota mana ena ma me ka gajake mei ko beu kouja, kodeja epauto ko Ugatameepa make, Rohulkudus ka me gokobaki etijawijake.