Zaburi 1 - EBIBILIA ENCHENU

EBUKU YE RITANG’ANI ( 1—41 ) Omogoko bw’ekeene

¹ Nasesenirie omonto oria otari gotunyana chingencho chi’abakori amabe, gose tari kobwatia chinchera chi’abanyabibe, gose tari gosanga amo nabagochecheria Nyasae,

² korende amachiko ’Omonene naro akomogokia mono, na amachiko ayio nigo akoyairanerera omobaso na obotuko.

³ Ere nigo anga buna omote osimekire rooche mbarabare, oyokwama okwama kwaye ekero engaki yaye egoika, na amato aye tari kwoma, na rinde rionsi agokora nigo agosesenigwa.

⁴ Abakori amabe tibari bo, korende nigo banga buna omoiriro okoirurukigwa nomwaga.

⁵ Ase ayio, abakori amabe tibagocha gwekengera ase rituko ri’ekina, gose abanyabibe ase omosangererekano bw’abanyene oboronge.

⁶ Omonene namanyete enchera y’abanyene oboronge, korende enchera y’abakori amabe nesire.