Sefania 1 - EBIBILIA ENCHENU

¹ Eri nario ring’ana ri’Omonene riachete ase Sefania, mosinto o Kusi, o Gedalia bw’Amaria, bw’Hezekia, ekero Yosia, mosinto bw’Amoni, arenge omoruoti bw’Abayuda.

Rituko ri’ekina ri’Omonene

² Omonene nigo agoteba iga: “Ninsirie kegima kera egento kerue ase ense.

³ Ninsirie mwanyabanto, ne ching’iti, ne chinyoni chia igoro, ne chinswe chi’enyancha. Ninsirie nebikorenta okogocha amo nabakori amabe; ee, ninsirie mwanyabanto korwa ase ense.” Nabo Omonene atebire.

⁴ “Nindambore okoboko kwane igoro y’Abayuda, na igoro y’abanto bonsi abamenyete Yerusalemu. Ninsirie korwa aase aiga abatigari abwo bagosasima Baali, na amarieta ’ababani na ay’abakuani abagokorera emegwekano.

⁵ Ninsirie baria bakoriina kerama igoro gosasima erioba, na omotienyi, ne ching’enang’eni boigo ninsirie abanto baria bagonsasima inche Omonene na batiana asende, naende batiana nase enyasae eria Milikomu.

⁶ Ninsirie abairanire nyuma batigire kombwatia inche Omonene, na baria batari kondigia inche Omonene, gose komboria amang’ana.”

⁷ Tegerera okire‐kiri ase obosio bw’Omonene Nyasae! Rituko ri’Omonene nigo rire ang’e; Omonene bwariganirie ekeng’wanso, bwatananire abwo arangeirie ase ekegeni kiaye na abasesenie.

⁸ Nigo agoteba iga: “Ase rituko riria ri’ekeng’wanso kiane inche Omonene nindue egesusuro ase abagambi, na ase abamura b’omoruoti, na ase bonsi ababegete chianga chie chinse chingeni.

⁹ “Boigo rituko erio nindue egesusuro ase bonsi abwo bagotamboka ase omoriibo bw’egesieri inse, na ase baria baichoirie ase chinyomba chi’abanene nebinto bi’obourereria, na ebi’obong’ainereria.”

¹⁰ Omonene nigo agoteba iga: “Ase rituko erio eriogi ri’okorera ndigugwe korwa ase Egeita gie Chinswe, na okweumia nkoigugwe korwa ase ensemo enyia y’omochie, na endumo enene korwa ase ebigoro.

¹¹ Inwe abamomenyete ase ensemo eye ekorokwa Ekonu, rera, ekiagera abaonchoreria bonsi basirigwe, na abasangereria bonsi be chibesa basirigwe.

¹² “Ase engaki eria nimbe nkorigarigia Yerusalemu ase okoyomoreka ne chitaya; nindue egesusuro ase abanto baria bamenyete bare nobotoereru, buna edivai ekirete ase eturubo, abwo bagwetebia ase chinkoro chiabo: Omonene takonyara gokora kende, amaya gose amabe.

¹³ Chinibo chiabo nchisakorwe, ne chinyomba chiabo nchisarigwe chitigwe bosa. Nabaisa koagacha chinyomba, tibagochimenya, nabaisa gosimeka emesabibu, tibakonywa edivai ekorwao.”

¹⁴ Rituko rinene ri’Omonene ng’ang’e rire, nigo rire ang’e mono rikoayerera. Tegerera oigwe, rituko ri’Omonene ngocha rire! Abarwani esegi chituoni nigo bakorera bare nobororo.

¹⁵ Rituko riria nigo rire eri’endamwamu, ne rituko ri’emechando na obororo, ne rituko ri’ogosirigwa na ogotigara bosa, ne rituko ri’omosunte na omorumbe, ne rituko ri’amare na omosunte ekerima.

¹⁶ Rituko riria neri’okobugigwa kw’ebitureri na okorera gw’esegi igoro y’emechie egiteire chindwaki, na igoro y’emerobiri emetambe mono.

¹⁷ “Nindete emechando emenene igoro ya mwanyabanto goika babe bagotaba‐taba buna emeuko, ekiagera bakorire ebibe asende inche Omonene. Amanyinga abo naumorwe buna eogoto, na emebere yabo netugutwe buna esike.”

¹⁸ Ase rituko riria ri’endamwamu y’Omonene chifeta chiabo ne chitahabu chiabo tibikonyara kobatooria. Ense yonsi nesambwe esirigwe nomorero bwe risemi riaye. Mobosokano narente omoerio bw’okoondokia ase abanto bonsi bamenyete ase ense.