Rutu 1 - EBIBILIA ENCHENU

Elimeleki na abanto baye bagochia komenya ase ense ya Moabu

¹ Ase amatuko aria, ekero abagambi ebina barenge kogambera Abaisraeli, enchara enene ekaba ase ense yabo. Ase ayio, omonto oyomo o Bethlehemu, ase ense y’Abayuda, akaimoka amo na mokaye na abamura baye babere, akagenda komenya ase ense y’Abamoabu ase engaki gete.

² Omonto oria nigo arenge korokwa Elimeleki, na mokaye Naomi, na abamura baye babere Mahaloni na Kilioni. Barabwo n’Abaefarati barenge. Ekero bamenyete aaria Moabu,

³ Elimeleki agakwa, agatiga Naomi ore omoboraka, ore nabamura baye babere.

⁴ Barabwo bakanyuoma abaiseke b’Abamoabu; oyomo nigo are korokwa Oripa na oyonde Rutu. Nyuma kabamenyire aroro koreng’ana emiaka ikomi,

⁵ Mahaloni na Kilioni nabarabwo bagakwa. Igo Naomi agakwerwa omosacha oye na abamura baye babere.

Naomi okoirana gochia Bethlehemu, na Rutu okogenda amo nere

⁶ Naomi kare agwo ase ense y’Abamoabu akaigwa ng’a Omonene ororeire abanto baye amabera, obaeire endagera naende; ase ayio akamanora korua ense eria amo na baka bamura baye.

⁷ Barabwo bagatiga aase aaria bamenyete, korende ekero barenge kogenda gochia ase ense y’Abayuda,

⁸ Naomi agatebia baka bamura baye ng’a bairane, na kera oyomo agende komenya mwa ng’ina. Naende akabora, “Omonene abakorere amaya, buna inwe mwakorerete baria bakwete, mogankorera nainche.

⁹ Omonene abanchere kera oyomo oino anyuomwe naende, na anyore mwaye.” Erio Naomi akabanyunyunta ase okobatiga. Korende barabwo bagachaka korera mono,

¹⁰ bakamotebia, “Yaya, titokogotiga! Nigo torigetie kogenda amo naye ase abanto baino.”

¹¹ Korende Naomi akabairaneria, akabatebia, “Abana baane, irana mogende seino! Nase ki moganetie kogenda amo nainche? Inee! Ninyare naende korwa ase enda yane koibora abana bagochia koba abasacha baino?

¹² Abana baane, irana mogende seino, ekiagera inche nagotire mono, tinkonyuomwa naende. Nonya nare korengereria ng’a ninde nogosemeria, na onye nare konyora omosacha rero, nyibore abana abamura.

¹³ Inee, nkoganya mware goika bakine? Gose ngwetanga mware timonyuomwa nabasacha bande? Taibo, abana baane. Omonene ong’onchokeire na kong’a emechando, nainche nabechandeire mono.”

¹⁴ Naende bagachaka korera mono goetania. Erio Oripa akanyunyunta ng’ina biara, akamotiga, korende Rutu akaanga komotiga.

¹⁵ Ase igo Naomi agatebia Rutu, “Naama! Oripa, moka momura omwabo omosacha oo, oiranire ase abanto baye, na ase enyasae yaye. Naye irana, mogende komo!”

¹⁶ Korende Rutu akamoiraneria, “Tagonsorora ng’a ngotige. Tiga ngende amo naye. Aande onsi ase aye ogochia, nainche nao ndachie; na aande onsi ase aye oramenye, nainche nao ndamenye. Abanto bao mbabe abanto baane, na Nyasae oo nabe Nyasae one.

¹⁷ Aase aye orakwere, nainche nao ndakwere, na ntindekwe aroro. Tiga Omonene ang’e egesusuro bono na kogenderera onye gento kende kegochia konyatanana korwa asore, otatiga amakweri oka.”

¹⁸ Ekero Naomi aroche ng’a Rutu otenenire bokong’u ase ebirengererio biaye bi’okogenda amo nere, takwana gento kende.

¹⁹ Ase igo barabwo babere bakagenderera orogendo rwabo, bagaika Bethlehemu. Ekero baigete aroro, abanto bonsi b’omochie bakaeegaeega ase engencho yabo, na abakungu bakaborania, bagoteba, “Inee! Oyo Naomi?”

²⁰ Naomi akabatebia, “Timondoka Naomi, ndoke Mara, ekiagera Nyasae Omobui ondeteire obororo obonge.

²¹ Ekero nagendete nigo narenge omonda, korende Omonene ong’iranirie inde namaboko amasa. Nase ki rende mokondoka Naomi bono, ekero Omonene Omobui ang’onchokeire na ondeteire amaakwa?”

²² Naboigo Naomi airanete korwa ase ense y’Abamoabu amo na Rutu, oria Omomoabu, moka momura oye. Barabwo bagaika Bethlehemu ekero abanto konya bachakire kogesa esairi, endagera enga buna engano.