Matayo 1 - EBIBILIA ENCHENU

Chisokoro ne chisokororia chia Yeso

¹ Oyo noro omoroberio bw’ororeria rwaye Yeso Kristo, omwana o Daudi, omwana o Ibrahimu.

² Ibrahimu akaibora Isaka, na Isaka akaibora Yakobo, na Yakobo akaibora Yuda na abamwabo,

³ na Yuda akaibora Peresu na Zera ase Tamari, na Peresu akaibora Hezironi, na Hezironi akaibora Aramu,

⁴ na Aramu akaibora Aminadabu, na Aminadabu akaibora Nashoni, na Nashoni akaibora Salimoni,

⁵ na Salimoni akaibora Boazi ase Rahabu, na Boazi akaibora Obedi ase Rutu, na Obedi akaibora Yese,

⁶ na Yese akaibora omoruoti Daudi. Na Daudi akaibora Sulemani ase oyio orenge omokungu o Uria,

⁷ na Sulemani akaibora Rehoboamu, na Rehoboamu akaibora Abiya, na Abiya akaibora Asa,

⁸ na Asa akaibora Yehosafati, na Yehosafati akaibora Yoramu, na Yoramu akaibora Usia,

⁹ na Usia akaibora Yotamu na Yotamu akaibora Ahasi, na Ahasi akaibora Hezekia,

¹⁰ na Hezekia akaibora Manase, na Manase akaibora Amoni, na Amoni akaibora Yosia,

¹¹ na Yosia akaibora Yekonia na abamwabo ekero ki’ogosakorwa na okong’anyigwa gochia Babeli.

¹² Na nyuma y’ogosakorwa na okong’anyigwa gochia Babeli Yekonia akaibora Salatieli, na Salatieli akaibora Serubabeli,

¹³ na Serubabeli akaibora Abihudi, na Abihudi akaibora Eliakimu, na Eliakimu akaibora Azoro,

¹⁴ na Azoro akaibora Zadoki, na Zadoki akaibora Akimu, na Akimu akaibora Eliudi,

¹⁵ na Eliudi akaibora Eleazari, na Eleazari akaibora Matani, na Matani akaibora Yakobo,

¹⁶ na Yakobo akaibora Yusufu, omosacha o Mariamu oyo oiborete Yeso, oyokorokwa Kristo.

¹⁷ Na ebigori bionsi korwa Ibrahimu goika Daudi nigo biarenge ebigori ikomi na bine: na korwa Daudi goika ogosakorwa na okong’anyigwa gochia Babeli nebigori ikomi na bine: na korwa ogosakorwa na okong’anyigwa gochia Babeli goika Kristo nebigori ikomi na bine.

Okoiborwa kwa Yeso

¹⁸ Okoiborwa kwa Yeso Kristo nigo kwarenge iga: Ekero Mariamu ng’ina ariereire boko na Yusufu, bataraikana ang’e, akarorekana ore morito ase Omoika Omochenu.

¹⁹ Na omosacha oye Yusufu nigo arenge omonto omoronge, tarigetie komoa obosooku, akarengereria komotiga bobisi.

²⁰ Korende ekero arenge orengereretie aya, rora, omomalaika bw’Omonene akamochiera ase chindoto akamotebia. “Aye Yusufu, omwana o Daudi, toiroka koira Mariamu abe mokao, ekiagera oborito obwo bwatongirwe inda yaye nobw’Omoika Omochenu.

²¹ Ere naibore omwana omoisia, nomoroke erieta riaye Yeso, ekiagera nere oratoorie abanto baye korwa ase ebibe biabo.”

²² Aya onsi nigo abeire, erinde riikerane eriakwanetwe n’Omonene ase omonwa bw’omobani,

²³ “Rigereria, omoiseke omwekungi nabe morito, erio naibore omwana omoisia, na erieta riaye narokwe Imanueli” (engencho yaye: Nyasae amo naintwe).

²⁴ Na Yusufu agachia koboka korwa ase chitoro, agakora buna achigetwe nomomalaika bw’Omonene; akaira mokaye,

²⁵ korende tiriaba komo goika kaiboire omwana omoisia; Yusufu akamoroka erieta riaye Yeso.