Mariko 1 - EBIBILIA ENCHENU

Yohana Omobatisi na amang’ana aye

¹ Oyo noro omochakano bw’enchili ya Yesu Kristo, Omwana o Nyasae,

² buna erikire ase ebuku y’omobani Isaya. “Rora, natomire omotomwa one agotang’anere, oyo oraroisie enchera yao;

³ eriogi ri’oyogoaka egeturi ase erooro: Roisia enchera y’Omonene, rongeyia oboeto bwaye!”

⁴ Erio Yohana Omobatisi akaoroka ase erooro, okorandia, okobatebia, “Onchoka, mobatiswe, monyore okwaberwa kw’ebibe.”

⁵ Abanto b’ense yonsi ya Boyahudi, na bonsi aba Yerusalemu bakamochiera, bakabatiswa nere ase orooche rwa Yorodan, bakoorokia ebibe biabo.

⁶ Na Yohana nigo arenge kobeka chianga chi’amarionya ’engamia, na kweboeria orokini rwe riiyo kenema kiaye. Nigo arenge koria chingige na obooke bw’orosana.

⁷ Akarandia, okobora, “Nache korwa nyuma yane oyore ne chinguru kombua, omonto inche ntaisaini gotung’ama na gosibora chinuga chi’ebikoroto biaye.

⁸ Inche nigo nkobabatisa ase amache, korende ere nababatise ase Omoika Omochenu.”

Okobatiswa kwa Yeso

⁹ Ase amatuko aria Yeso agacha korwa Nazareti ya Galili, akabatiswa na Yohana ase orooche rwa Yorodan.

¹⁰ Erio kegima, kagotiira korwa ase amache, akarora igoro amaanokire, na Omoika buna riruma ogoika igoro asare,

¹¹ na eriogi rikarwa igoro, rigateba, “Aye naye Omwana one omwanchwa, ngokirie naye.”

Ogoteemwa kwa Yeso

¹² Erio kegima Omoika okamoira ase erooro.

¹³ Akaba ase erooro amatuko emerongo ene, ogoteemwa na Saitani; ere nigo arenge amo ne ching’iti chi’orosana; na abamalaika bakaba nkomokorera bare.

Yeso ogochaka korandia

¹⁴ Goika nyuma Yohana kabekirwe echela ime, Yeso akagenda Galili, akarandia enchili ya Nyasae,

¹⁵ okobora, “Engaki yaikeranire, na oboruoti bwa Nyasae bwaikire ang’e; onchoka na mwegene enchili.”

Yeso okorangeria aborokigwa baye be ritang’ani

¹⁶ Ere ekero are goeta ensemo y’enyancha ya Galili, akarora Simion na Anderea, momura omwabo Simion, bakoruta ekeonga enyancha ime, ekiagera nabarubi barenge.

¹⁷ Yeso akabatebia, “Inchuo montunyane, na inche nimbakore mobe abarubi b’abanto.”

¹⁸ Erio kegima bagatiga ebionga biabo, bakamotunyana.

¹⁹ Akagenderera bosio ake, akarora Yakobo, omwana o Zebedi, na Yohana momura omwabo; barabwo nigo barenge obwato ime bakoroisia ebionga biabo.

²⁰ Erio kegima akabarangeria; barabwo bagatiga Zebedi ise ime ase obwato amo nabanto b’eng’eria, bakamotunyana.

Yeso okogwenia omonto obwatire nekerecha agwo Kapernaumu

²¹ Bakabwatia enchera goika Kapernaumu, na erio kegima ase rituko ri’Esabato Yeso agasoa ase esinagogi akorokereria.

²² Bagakumia ase okworokereria kwaye, ekiagera arenge koborokereria buna oyore nokobua, gose tari buna aborokia b’amariko.

²³ Erio kegima narengeo ase esinagogi yabo omonto obwatire nekerecha ki’eubi. Ere agaaka eriogi,

²⁴ akabora, “Inki tore naye, Yeso o Nazareti? Inee! Nigo gwachire gotosiria? Nakomanyire aye, Omochenu o Nyasae.”

²⁵ Yeso akagetogonyera, akabora, “Kira, omorwe!”

²⁶ Ekerecha keria ki’eubi gekamogaragaria, gekarera ase eriogi rinene, gekamorwa.

²⁷ Bagaichana bonsi, goika bakaborania, bakobora, “Inki eke? Nokworokereria okoyia! Omonto oyo nigo abwate okobua kw’ogochika nonya nebirecha bi’eubi, na birobio bikomoigwera.”

²⁸ Erio chinkuma chiaye chigasarera ase ense yonsi ensemo ya Galili.

Yeso okogwenia ng’ina biara Simion na abande abange

²⁹ Erio agwo kobasokire korwa ase esinagogi, bagasoa nyomba mwa Simion na Anderea, amo na Yakobo na Yohana.

³⁰ Ng’ina biara Simion oraire, orwarete esosera. Erio kegima bakamotebia amang’ana igoro yaye.

³¹ Akamoika ang’e, akamoimokia ase okomobwata okoboko. Erio esosera ekamotiga na ere akabakorera.

³² Riachia koba mogoroba, erioba korikogwa, bakamorentera bonsi abarenge abarwaire, na ababwatetwe nebirecha.

³³ Na omochie bwonsi okaba ngosangererekana ore gesieri.

³⁴ Akagwenia abange abarenge namarwaire ao ao, agaseria ebirecha ebinge; tatiga ebirecha bikwane, ekiagera biamomanyete.

Yeso ogweatanana gochia ensemo ase ogosaba, na gotiga Kapernaumu

³⁵ Mambia, botarakiamoka, akaimoka, agasoka, akagenda aase atari nabanto, agasabera aroro.

³⁶ Simion na abarenge amo nere bakamotunyana,

³⁷ bakamonyora, bakamotebia, “Abanto bonsi ngokorigia bare.”

³⁸ Akabatebia, “Togende aase aande goika ebichie bire ang’e, ninyare korandia na aroro boigo, ekiagera ase ayio naro nachicheire.”

³⁹ Agasoa ase chisinagogi chiabo ase ense yonsi ya Galili, okorandia na goseria ebirecha.

Okogwenigwa kw’omonto orenge noborwaire bwa ukoma

⁴⁰ Omonto oyomo orenge noborwaire bwa ukoma agacha asare, akamosorora na komotung’amera, akamotebia, “Onye ngwancha, nonyare gonsibia.”

⁴¹ Yeso akamororera amabera, akarambora okoboko kwaye, akamokuna, akamotebia, “Nanchire; sibeka.”

⁴² Erio agwo oborwaire bwaye bwa ukoma bokamotiga, agasibeka.

⁴³ Akamokania bokong’u, akamosokia agende,

⁴⁴ akamotebia, “Rigereria, totebia monto onde bwensi amang’ana aya; korende genda bweorokie ase omokuani, orue ekeng’wanso egiachigetwe na Musa ase ogosibeka kwao, erinde kebe kirori ase abanto.”

⁴⁵ Korende agasoka, agachaka korandia amang’ana aya na gosareria ring’ana riria, goika Yeso tanyara naende gosoa ase omochie ime maiso marore, korende akabeera isiko aase atari nabanto; na abanto bakamochiera korwa kera aase.