Luka 1 - EBIBILIA ENCHENU

Ogochakera

¹ Abanto abange beruete korika ebirage bi’amang’ana aria aikeranetigwe egati yaito.

² Nigo barigete buna abwo barenge abarori korwa omochakano na abakori emeremo be ring’ana batorenteire.

³ Naboigo nainche narorire buya, konaikire kwenyorera amang’ana onsi boronge korwa ritang’ani, gokorikera aye Theofilo bw’amasikani,

⁴ erinde onyare komanya oboene bw’amang’ana aria kworokereretigwe.

Obobani bw’okoiborwa kwa Yohana Omobatisi

⁵ Ekero Herode arenge omoruoti o Boyahudi, narenge omokuani oyomo, erieta riaye Zakaria, oyo bw’ensemo y’Abiya. Mokaye nomoiseke bw’ororeria rwa Haroni orenge, erieta riaye Elisabeti.

⁶ Na bonsi babere nabanyene oboronge baare ase obosio bwa Nyasae; nigo bagendererete ase amachiko ne chinchera chionsi chi’Omonene batari na komocha.

⁷ Barabwo tibarenge nomwana, ekiagera Elisabeti nigo arenge omogomba, na barabwo bonsi babere konya bagotire mono.

⁸ Na ekero rika ria Zakaria ri’ogokora emeremo y’obokuani ase obosio bwa Nyasae riarenge,

⁹ kobwatekana nengencho y’obokuani, obomera bokamogwera asoe ase Hekalu y’Omonene asambe ubani.

¹⁰ Na omoganda bwonsi bw’abanto nigo orenge isiko gosaba ekero ki’ogosamba ubani.

¹¹ Zakaria akaorokerwa nomomalaika bw’Omonene, oteneine ensemo ya borio y’egesasimero ki’ogosambera ubani.

¹² Ere agaichana gachia komorora, na omoondoko okamobwata.

¹³ Korende omomalaika oria akamotebia, “Toiroka, Zakaria, ekiagera ogosaba kwao kwaigurwe, na mokao Elisabeti nakoiborere omwana omoisia, na erieta riaye nomoroke Yohana.

¹⁴ “Aye nobe nomogoko na ogosasoka, na abanto abange nabagokere okoiborwa kwaye,

¹⁵ ekiagera nabe omonene ase obosio bw’Omonene. Takonywa edivai gose ekenyugwa kegotindia; ere naichorwe n’Omoika Omochenu, nonya nkorwa enda ya ng’ina.

¹⁶ Naonchore abange b’Abaisraeli gocha ase Omonene, Nyasae obo.

¹⁷ Ere natang’ane bosio bwaye ase omoika ne chinguru chi’Elija, aonchore chinkoro chi’abaise ase abana babo, na aonchore abamochi ase obong’aini bw’abanyene oboronge, abekere ang’e Omonene abanto baroisigwe.”

¹⁸ Zakaria agatebia omomalaika, “Naki ndakore imanye ayio? Ekiagera inche nomogotu, na mokane nomong’ina.”

¹⁹ Omomalaika akamoiraneria, “Ninche Gabirieli, ngotenena ase obosio bwa Nyasae; ninche natomwa nkwane naye, ngotebie amang’ana aya amaya.

²⁰ Rora, aye nobe rimama, tonyara gokwana goika rituko riria ayio agocha kooroka, ekiagera otegena amang’ana aane; ayio naikeranigwe ekero kiaye.”

²¹ Na abanto baria baganyete Zakaria, bagakumia ase ogotebana kwaye aroro Hekalu ime.

²² Goika ekero achia gosoka, tanyara gokwana nabarabwo; bakamanya ng’a nigo arora okorora aria Hekalu ime. Ere nigo arenge kobateberia nokoboko, akagenderera koba rimama.

²³ Naende amatuko aye ay’ogokora emeremo agachia koera, akagenda bwoye.

²⁴ Nyuma y’amatuko aria mokaye Elisabeti akaba morito, akebisa emetienyi etano, ogoteba,

²⁵ “Igo nabo Omonene ankoreire ase amatuko aya andigereretie, na konduseria obosooku bwane ase amasio ’abanto.”

Obobani bw’okoiborwa kwa Yeso

²⁶ Omotienyi bw’etano nomo omomalaika Gabirieli agatomwa na Nyasae kogenda omochie o Galili, okorokwa Nazareti,

²⁷ ase omoiseke omwekungi oriereire boko nomosacha, erieta riaye Yusufu, bw’eamate ya Daudi, na erieta ri’omoiseke oria Mariamu.

²⁸ Agacha asare, akabora, “Mbuya ore aye, oyokwaeirwe obuya. Omonene nigo are amo naye.”

²⁹ Mariamu agaichana mono ase ring’ana eri, akarota‐rotia omoyo oye ime, “Ngokwania ki oko?”

³⁰ Omomalaika akamotebia, “Toiroka Mariamu, ekiagera kwanyorire obuya ase Nyasae.

³¹ Rora, nobe morito, noibore omwana omoisia, nomoroke erieta riaye Yeso.

³² “Oyio nabe omonene, narokwe Omwana bw’Oyore Igoro Mono; na Omonene Nyasae namoe ekerogo ki’obonene gia Daudi sokoro yaye;

³³ nagambere enyomba ya Yakobo goika kare na kare; nonya noboruoti bwaye tibokoba nomoerio.”

³⁴ Mariamu akaboria omomalaika oria, “Naki rirabe ring’ana eri, ekiagera tindaba nomosacha?”

³⁵ Omomalaika akamotebia, “Omoika Omochenu nogochere, ne chinguru chiaye Oyore Igoro Mono nachikobekere ekiriri. Ase ayio, oyoraiborwe narokwe Omochenu, Omwana o Nyasae.

³⁶ Rora, Elisabeti omoamate oo, nere boigo nare noborito bw’omwana omoisia ase obogotu bwaye; na omotienyi oyo noyo bw’etano nomo asare ere oyorogetwe omogomba.

³⁷ Naki ing’ana tiriri ritanyarekane ase Nyasae.”

³⁸ Mariamu akabora, “Rora, inche nomoiseke omosomba bw’Omonene; abe asende buna ring’ana riao.” Omomalaika akaimoka akarua asare.

Mariamu ogochia gokwania Elisabeti, naende ogotogia Nyasae

³⁹ Mariamu akaimoka ase amatuko ayio, akagenda bwango ase ebitunwa goika omochie oyomo o Yuda,

⁴⁰ agasoa nyomba mwa Zakaria, agakwania Elisabeti.

⁴¹ Ekaba Elisabeti agachia koigwa ogokwania kwa Mariamu, omwana omoke agatuma ase enda yaye ime; Elisabeti agaichorwa n’Omoika Omochenu,

⁴² agaaka eriogi ase chinguru, agakwana, “Gwasesenigwe aye ase abakungu, na oroiboro rw’enda yao rwasesenigwe.

⁴³ Ng’ai ring’ana eri riarure, ng’ina Omonene one anchicheire inche?

⁴⁴ Ekiagera rora, eriogi ri’ogokwania kwao riachia gosoa ase amato aane, omwana omoke otuma ase omosasoko ase enda yane ime.

⁴⁵ Nasesenirie oyobwegenete ng’a amang’ana ayio atebigwe n’Omonene naikeranigwe.”

⁴⁶ Mariamu agateba, “Omoyo one otogirie Omonene,

⁴⁷ omoika one ogokeire Nyasae, Omotooria one,

⁴⁸ ekiagera origereirie obwororo bw’omoiseke omosomba oye. Naki ekeene, korwa rero ebigori bionsi nabindoke omosesenigwa,

⁴⁹ ekiagera ere oyore ne chinguru onkoreire amanene, na erieta riaye nerichenu.

⁵⁰ Amabera aye nigo are ase abwo bamoirogete korwa ebigori goika ebigori.

⁵¹ Okorire ogokora gwe chinguru, oserebanirie abaenenu ase ebirengererio bie chinkoro chiabo.

⁵² Okeeirie abanene korwa ase ebirogo biabo bi’obonene, oimokereirie igoro abaitongo.

⁵³ Abare nenchara obaigotirie amaya; abanyene enibo obaseririe bare namaboko amasa.

⁵⁴ Okonyire Israeli, omosomba oye, ase okoinyora amabera aye,

⁵⁵ buna atebetie chisokoro chiaito, Ibrahimu na oroiboro rwaye, goika kare na kare.”

⁵⁶ Mariamu akamenya nere emetienyi etato, akairana sobo.

Okoiborwa kwa Yohana Omobatisi. Zakaria ogotogia Nyasae

⁵⁷ Kegaika ekero gi’okoibora kwa Elisabeti, akaibora omwana omoisia.

⁵⁸ Abatureti baye na eamate yaye bakaigwa ng’a Omonene omororeire amabera amange, bakagoka amo nere.

⁵⁹ Rituko ria gatano na gatato bakaira omwana komosara, bakarigia bamoroke erieta ria ise, Zakaria,

⁶⁰ korende ng’ina akairaneria, akabora, “Taibo; nigo ararokwe Yohana.”

⁶¹ Bakamotebia, “Tari nonya noyomo ase eamate yao okorokwa erieta erio.”

⁶² Bakorokia ise ase ogokwana kw’ebimanyererio bi’amaboko, komoboria buna arigetie arokwe.

⁶³ Agasaba ebao y’okorika, akarika “Yohana, nario erieta riaye.” Bagakumia bonsi.

⁶⁴ Erio kegima agasiborwa omonwa na oromeme rwaye, agakwana, ogotogia Nyasae.

⁶⁵ Obwoba bogasoa ase abatureti babo bonsi. Amang’ana aya onsi agasarera ase ense yonsi y’ebitunwa bia Boyahudi.

⁶⁶ Na bonsi abayaigwete bakayabeka ase chinkoro chiabo ime, bakabora, “Mwana ki rende arabe oyo?” Naki okoboko kw’Omonene nigo kwarenge amo nere.

⁶⁷ Zakaria ise agaichorwa n’Omoika Omochenu, akabana, okobora,

⁶⁸ “Omonene, Nyasae o Israeli, atogigwe, ekiagera obacheire abanto baye na kobabooria.

⁶⁹ Naende ototeneneirie Omotooria bw’okobua ase eamate ya Daudi, omosomba oye.

⁷⁰ Buna atebete korwa omochakano goetera ase emenwa y’ababani baye abachenu,

⁷¹ ng’a natotoorigwe korwa ase ababisa baito, na korwa ase amaboko abo bonsi abatogechete,

⁷² erinde abakorere amabera chisokoro chiaito, na koinyora okobwatana kwaye ogochenu.

⁷³ Emuma eria arierete sokoro yaito Ibrahimu,

⁷⁴ ng’a natoe ribaga ri’okomosasima totari nobwoba, gatoratoorigwe korwa ase amaboko ’ababisa baito,

⁷⁵ ase obochenu na ase oboronge ase obosio bwaye amatuko aito onsi.

⁷⁶ Naye, Omwana, norokwe omobani bw’Oyore Igoro Mono, ekiagera notang’ane ase obosio bw’Omonene. Oroisie chinchera chiaye,

⁷⁷ omanyie abanto baye ogotooreka ase okwaberwa kw’ebibe biabo.

⁷⁸ Ase amabera aye Nyasae oito, ekero amasase a igoro aratochere,

⁷⁹ abarere abamenyete ase omosunte na ase ekiriri ki’amakweri, na koraa amagoro aito ase enchera y’omorembe.”

⁸⁰ Omwana oria agakina, akamenteka chinguru ase omoika, akaba ase erooro goika rituko riria aorogete ase Abaisraeli.