Hosea 1 - EBIBILIA ENCHENU

Ogochakera

¹ Eri nario ring’ana ri’Omonene riacherete Hosea, mosinto o Beeri, ase amatuko aria Usia, na Yotamu, na Ahasi, na Hezekia, barenge abaruoti b’Abayuda, na ekero Yeroboamu, mosinto o Yehoasi, arenge omoruoti bw’Abaisraeli.

Moka Hosea na abana baye

² Agwo ekero Omonene achagete gokwana goetera ase Hosea, Omonene akamotebia iga: “Genda onyuome omokungu omotayayi, onyore abana b’obotayayi, ekiagera ense eye yantigire inche Omonene ase ogokora obotayayi obonene.”

³ Ase ayio Hosea akagenda, akanyuoma Gomeri, omoiseke o Dibulaimu, na omokungu oyio akaba morito, akamoiborera omwana omoisa.

⁴ Omonene agatebia Hosea, “Moroke Yesireeli, ekiagera engaki netigarete enke, ndarue egesusuro ase ororeria rwa Yehu, ndusie egesiomba ki’amanyinga aria abanto bamenyete Yesireeli baiterete. Ninsirie kegima oboruoti bw’Abaisraeli.

⁵ Ase rituko erio nimbune amata ’Abaisraeli agwo ase ense omweremo ya Yesireeli.”

⁶ Naende Gomeri akaba morito, akaibora omwana omoiseke. Erio Omonene agatebia Hosea, “Moroke Lo‐Ruhama, ekiagera tinkonyara kogenderera koba namabera ase Abaisraeli, gose tinkobaabera nonya ng’ake.

⁷ Korende nindorere Abayuda amabera. Inche Omonene, Nyasae obo, nimbatoorie ne chinguru chiane, gose tari ase okorwana namata, gose nemioro, gose ne chibarasi chi’esegi, gose nabariini be chibarasi.”

⁸ Ekero Gomeri atachire Lo‐Ruhama, akaba morito naende, akaibora omwana onde omoisia.

⁹ Omonene agatebia Hosea, “Moroke Lo‐Ami, ekiagera inwe timori abana baane, na inche tinkoba Nyasae oino.”

Abaisraeli bakoiranerigwa amaya abo

¹⁰ Korende nonya naboigo, Abaisraeli nigo barabuche mono, babe buna omokenye o nyancha, tibakorengeka gose kobareka. Nebe ng’a ase barenge gotebigwa: Inwe timori abana baane, bono mbatebigwe: Inwe nabana ba Nyasae ore moyo.

¹¹ Abayuda na Abaisraeli mbasangererekane amo, bechorere oyomo abe omotwe obo okobaraa, barue ase ense eye. Ee, rituko erio ria Yesireeli nigo rirabe rinene.