Filemoni 1 - EBIBILIA ENCHENU

Ogokwania

¹ Inche Paulo, omosibwa o Kristo Yeso, amo noyominto Timotheo, ngokorikera tore aye Filemoni, omwanchwa oito, omokori emeremo amo naintwe.

² Nkobarikera tore boigo Apia, mosubati ominto, na Arikipo, omorwani ore amo naintwe, na abanto b’ekanisa ere ase enyomba yao.

³ Obuya bobe asemore na omorembe bikorwa ase Nyasae Tata oito, na ase Omonene Yeso Kristo.

Obwanchani bwa Filemoni na okwegena kwaye

⁴ Botambe nigo ngoakera Nyasae one ng’a mbuya mono ekero ngokoinyora ase ogosaba kwane,

⁵ ekiagera nkoigwa nde amang’ana igoro y’obwanchani bwao, na okwegena kwao obwate ase Omonene Yeso, na buna okobiorokia ase abachenu bonsi.

⁶ Nasabire ng’a okobwatana gw’okwegena ore nakorokwo gokore emeremo, erinde omanye mono kobua kera egento ekiya kere asetore ime ase Kristo.

⁷ Naki oyominto, nigo nabete nomogoko omonge na okoremigwa ase engencho y’obwanchani bwao, ekiagera chinkoro chi’abachenu chiatimogetigwe naye.

Paulo ogosabera Onesimo

⁸ Ase ayio, ninde noboremu obonge ase Kristo kogochika eri ogwenerete okore.

⁹ Korende ase engencho y’obwanchani nanchire kobua kogosorora, buna inche Paulo inde omogaaka bono, naende inde omosibwa o Kristo Yeso.

¹⁰ Nagosoroire ase engencho y’omwana one, oyo naiborete ekero nare ase ebisibo biane, nere Onesimo.

¹¹ (Ere agwo kare tarenge kogokonya kende, korende bono nigo aranyare gotokonya mono, aye nainche.)

¹² Ere namotomire gocha asore, na nigo enga buna ninche omonyene netoma.

¹³ Naki inche nigo ndigetie abeere aiga amo nainche, erinde anyare gonkorera ribaga riao, ekero nsibire ase engencho y’enchili.

¹⁴ Korende tinarigetie gokora ing’ana rinde rionsi otatiga gwanchire aye, erinde obuya bwao tiboba obw’okobetererigwa, korende ase ogwancha kwao aye omonyene.

¹⁵ Aande nakio kiagerete agaatananwa korwa asore ase ekero egeke, erinde obe nere kare na kare,

¹⁶ korwa bono tari buna omosomba, korende goetania omosomba, buna oyominto omwanchwa, asende inche mono, na asore mono kobua, buna mwanyabanto, naende buna oyo bw’Omonene.

¹⁷ Gaki, onye kondengereretie inche buna omobwatani oo, omoroisie koreng’ana buna kware kondoisia inche.

¹⁸ Onye okomocheire kende, gose okoriete esira, oyeborie korwa asende.

¹⁹ Inche Paulo narikire aya nokoboko kwane omonyene, ning’akane. Amaene, ninyare kogotebia, ng’a nore nesira asende, engencho yaye aye bweka omonyene.

²⁰ Ee, oyominto, ninganetie obokonyi bokorwa asore, ekiagera noyo bw’Omonene ore. Ontimokie enkoro yane ase Kristo.

²¹ Igo nakorikeire aya, ekiagera inde nobomaene ng’a nomoigweri ore, naende imanyete ng’a nokore goetania ayio nagotebirie.

²² Amo nayio, ondoiserie aase ngocha komenya, naki nsemeretie ng’a goetera ase ogosaba kwaino nimbe nainwe.

Amakwania ’ogokoorera

²³ Epafara, oyosibetwe amo nainche ase engencho ya Kristo Yeso, ogokwanirie.

²⁴ Mariko na Aristariko, na Dema, na Luka, abakori emeremo amo nainche, bagokwanirie boigo.

²⁵ Obuya bw’Omonene oito Yeso Kristo bobe amo nemioyo yaino.