Abalawi 1 - EBIBILIA ENCHENU

Ekeng’wanso ki’ogosambwa

¹ Omonene akarangeria Musa, agakwana nere korwa ase Eema y’Omosangererekano, akamotebia,

² “Kwana n’Abaisraeli, obatebie ng’a ekero omonto onde bwensi korwa ase egati yabo akondetera inche Omonene eng’iti y’ekeng’wanso, ayerusie korwa ase chiombe gose ching’ondi, gose chimbori.

³ Onye nigo akorua ekeng’wanso ki’ogosambwa korwa ase amaicho e chiombe, arue eeri etari na kemocho ase omobere oye, ayerente agwo ase egesoero ki’Eema y’Omosangererekano, erinde inche mwanchere.

⁴ Omonto oria goika abeke okoboko kwaye igoro ase omotwe bw’eng’iti eria ekoruegwa ekeng’wanso ki’ogosambwa, erinde yancherwe ase okobwatania omonto oria na Nyasae.

⁵ Erio omonto oria anyenyere eeri eria ensae agwo ase obosio bwane inche Omonene, na abakuani, abamura ba Haroni, barente amanyinga bayasiarere chinsemo chionsi chi’egesasimero kere agwo ase egesoero ki’Eema y’Omosangererekano.

⁶ Naende arusie riiyo ri’eng’iti eria ekoruegwa ekeng’wanso, ayenachane ebitari,

⁷ na abamura ba Haroni omokuani baute omorero ase egesasimero, bachoke chinko ase omorero oyio.

⁸ Naende abakuani, abamura ba Haroni, babeke ebitari biria, amo nomotwe na ebitinya, igoro ase chinko chiria chire ase omorero bw’egesasimero.

⁹ Korende chinyama chi’enda, amo nebirenge, bisibigwe namache. Omokuani oria otenenerete asambe eng’iti eria yonsi ase egesasimero, ebe ekeng’wanso kegosambwa nomorero, kere ne rimisu rigiya rikongwenera inche Omonene.

¹⁰ “Onye omonto okorua ekeng’wanso ki’ogosambwa korwa ase amaicho e ching’ondi, gose chimbori, nigo ararente emingichi, gose egoree, etari na kemocho ase omobere oye.

¹¹ Erio ayenyenyere ase ensemo ya sugusu y’egesasimero, agwo ase obosio bwane inche Omonene, na abakuani, abamura ba Haroni, basiarere amanyinga aria ase egesasimero chinsemo chionsi.

¹² Naende anachane eng’iti eria ebitari, na omokuani oria otenenerete abichoke buya, amo nomotwe na ebitinya, igoro ase chinko chiria chire ase omorero bw’egesasimero,

¹³ korende chinyama chi’enda na ebirenge bisibigwe namache. Erio omokuani arue bionsi na kobisambera ase egesasimero. Ekio nekeng’wanso kegosambwa nomorero, kere ne rimisu rigiya rikongwenera inche Omonene.

¹⁴ “Onye ekeng’wanso ki’ogosambwa akonduera inche Omonene gekorusigwa ase chinyoni, rirorio arente amaruma gose amage ’amaruma.

¹⁵ Omokuani arente enyoni eyio ase egesasimero, na amine omotwe oye, ayobutore. Erio ayosambe ase egesasimero. Anyititorere amanyinga ase egesasimero ensemo,

¹⁶ korende embochero yaye, amo neubi ere imeo, abitugute ensemo ya moocha y’egesasimero, ase ribu rigotugutwa.

¹⁷ Erio atandorane egekuba, korende tarusia chimbaba, ayesambere ase egesasimero, igoro ye chinko chiria chire ase omorero. Ekio nekeng’wanso kegosambwa nomorero, kere ne rimisu rigiya rikongwenera inche Omonene.