Oluyimba 1 - Endagaano Enkadde n’Endagaano Empya

¹ Oluyimba lwa Sulemaani olusinga ennyimba zonna.

Omwagalwa

² Leka annywegere n’emimwa gye kubanga okwagala kwo kusinga envinnyo,

³ n’amafuta go gawunya akaloosa akalungi; erinnya lyo liri ng’amafuta agattululwa, era abawala kyebava bakwagala.

⁴ Baako ne gy’ontwala, yanguwa! Kabaka ansembezezza kumpi nnyo antutte mu bisenge bye. Tunaasanyuka ne tukujagulizaamu; era tunaatendereza okwagala kwo okusinga envinnyo. Nga batuufu okukwegomba!

Abemikwano Omwagalwa

⁵ Ndi muddugavu, ndi mulungi, Mmwe abawala ba Yerusaalemi muli ng’eweema ez’e Kedali, era ng’entimbe za Sulemaani.

⁶ Temuntunuulira kubanga ndi muddugavu, olw’okuba omusana gunjokezza. Batabani ba mmange baansunguwalira; ne bandagira okukuuma ennimiro ez’emizabbibu. Ennimiro yange ngigayaaliridde.

⁷ Ntegeeza ggwe gwe njagala, gy’oliisiza ekisibo kyo, ne gy’owumuliza endiga zo mu ssaawa ez’omu ttuntu. Lwaki mbeera ng’omukazi eyeebisse amaaso nga nninaanye ebisibo eby’abanywanyi bo?

Abemikwano

⁸ Bw’oba nga tomanyi, ggwe omukyala asinga bonna obulungi, goberera ekkubo endiga lye zikutte, ogende oliisize embuzi zo ento, okumpi n’eweema z’abasumba.

Owoomukwano

⁹ Omwagalwa wange, nkugeraageranya n’embalaasi esika amagaali ga Falaawo.

¹⁰ Amatama go galabika bulungi ng’oyambadde ebikomo eby’oku matu, n’ensingo yo nerabika bulungi ng’erimu eby’omu bulago eby’omuwendo.

¹¹ Tunaakukolera eby’oku matu ebya zaabu, nga birina amapeesa aga ffeeza.

Omwagalwa

¹² Kabaka bwe yali ng’atudde ku mmeeza ye, akawoowo kange ne kamuwunyira bulungi.

¹³ Muganzi wange ali ng’ensawo eya kaloosa aka mooli gye ndi, ng’awummulidde mu kifuba kyange.

¹⁴ Muganzi wange ali ng’ekiganda eky’ebimuli ebya kofera ebivudde mu nnimiro ez’emizabbibu ez’e Engedi.

Owoomukwano

¹⁵ Laba, oli mubalagavu, omwagalwa wange oli mubalagavu olabika bulungi. Amaaso go mayiba.

Omwagalwa

¹⁶ Olabika bulungi muganzi wange, era onsanyusa. Ekitanda kyaffe kya muddo muto.

Owoomukwano

¹⁷ Emikiikiro gy’ennyumba yaffe mivule, n’enzooba zaffe nkanaga.