Kolosefoɛ 1 - AHYERƐLƐ KRONGRON

Pɔɔlo bisa Kolosefoɛ ahye

¹ Me Pɔɔlo, ɔnate Nyameɛ pɛ so nde Kristo Yesu somafoɛ ɔ. Krataa he fi me ne aliɛmaa Timoteo berɛ.

² Yɛfa yɛbrɛ anwoteefoɛ ne aliɛmaa mɔ bɔ bedi nahorɛ wɔ Kristo nu bɔ bɛwɔ Kolose ɔ. Adom ne asomdwee bɔ ofi yɛ Baba Nyameɛ [ne Awurade Yesu Kristo] berɛ ɔyɛ ɛmɔ deɛ.

Asennaa

³ Daa biala sɛ yɛ́bɔ mbaeɛ yɛma ɛmɔ a, yɛfa asennaa yɛma Nyameɛ bɔ ɔte y’Awurade Yesu Kristo Baba ne.

⁴ Ofikyɛ yate ɛmɔ gyidie bɔ ɔwɔ Kristo Yesu nu ne, ɔne ehurolɛ bɔ ɛmɔkuro anwoteefoɛ amukoraa bɛ dwirɛ ne nga;

⁵ ɔnate anyelasoɛ bɔ ɔwɔ berɛ ma ɛmɔ wɔ nyameɛso. Na ɛhe yeɛ ɛmɔate ye dada wɔ nahorɛ dwirɛ bɔ ye ole nzɛmba ne,

⁶ bɔ bɛfa bɛbrɛle ɛmɔ ne anu. Na onyi, yeɛ osu mmaa wɔ wiase amukoraa, kyɛbɔ wasu mmaa wɔ ɛmɔ nu fi kyẽa bɔ ɛmɔtele ná ɛmɔnwuni Nyameɛ adom wɔ nahorɛ nu ne,

⁷ kyɛbɔ ɛmɔasua bafi y’eliɛma somvoɛ Epafra, bɔ ɔte Kristo somvoɛ nahorɛniɛ ma ɛmɔ ne berɛ ɔ.

⁸ Na wasa wahã ɛmɔ ɔdɔ bɔ ofi Sunzum Krongron berɛ ne nwo dwirɛ wahyire yɛ.

⁹ Ɔnate ɛhe ati, ofi kyẽa bɔ yɛtele sɔ dwirɛ ne ɔ, yɛyyakyili ɛmɔ nwo mbaeɛbɔlɛ le. Na yɛsrɛ kyɛ ɔma ɛmɔnya ye apɛdeɛ nwo nimdeɛ mmorosoɛ wɔ sunzum nu nworɛ ne ndeaseɛ amukoraa nu.

¹⁰ Na ɛhe kɔmaa ɛmɔkɔhora kɔbɔ bra bɔ ɔfata Awurade, ná ɔsɔ ye nye wɔ atee biala so. Na ɔkɔmaa ɛmɔkosu mmaa wɔ nnwumaa paa mukoraati nu, ná ɛmɔanyi Nyameɛ nimdeɛ nu.

¹¹ Yɛsrɛ kyɛ ɔma ɛmɔ tumi amukoraa ma ɛmɔgyina pindinn, kyɛbɔ ye animnyam tumi te ne, ná ɛmɔahora bafa aboterɛ ne animia amukoraa bagyina wɔ anigye nu,

¹² ná yafa asennaa yama Baba ne bɔ wamaa yafata kyɛ yɛnya kyɛfa wɔ anwoteefoɛ bɔ bɛwɔ kanea nu b’agyapadeɛ ne bie ɔ.

¹³ Wapepɛ wale yɛ wafi awosii tumi nu, na waasikye yɛ wɔ Ɔwa bɔ okuro ye dwirɛ n’Ahennie nu;

¹⁴ na ye nu yeɛ yanya ngoalelɛ bɔ ɔte bɔnefakyɛ ɔ.

Enwu Kristo a né anwu Nyameɛ

¹⁵ Ye yeɛ ɔte Nyameɛ bɔ anyeɛ onnwu ye ne ye sɛso ɔ, abɔdeɛ amukoraa nu farebae.

¹⁶ Ofikyɛ ye nu yeɛ bɛbɔle nningyein amukoraa, bɔ ɔwɔ nyameɛso ne aseɛ so ɔ; bɔ benwu ye ɔ ne bɔ bennwu ye ɔ; ahennie oo, meneɛ oo, mbanyililɛ oo, tumililɛ oo, nningyein mukoraa bɛnate ye so yeɛ bɛbɔle ɔ, na bɛbɔle bɛ bɛmane ye.

¹⁷ Ye yeɛ né ɔwɔ berɛ koraka yeɛ bɛbɔ nikyee biala ɔ, na ye yeɛ otira bɛ mukoraa bɛ ngoa nyamaa nu ɔ.

¹⁸ Ɔte nipadua ne bɔ ye ole asɔre ne ti; ɔte nikyee biala ahyɛaseɛ, awufoɛ tingyelɛ nu farebae, na ɛhe maa ɔyɛ nningyein amukoraa nu bɔ oli moa ɔ.

¹⁹ Na ɔsɔle Nyameɛ nye kyɛ ye sue ne amukoraa kɔtena Kristo nu ɔ.

²⁰ Ɔnate ye so Nyameɛ ahwe nningyein mukoraa bɔ bɛwɔ aseɛ so ne nyameɛso wabata ye bɔbɔ ye nwo; na ɔnate ye mmeamudua nu mogya ne aso yeɛ wama sɔ asomdwee ye awa ɔ.

²¹ Na ɛmɔ de, ahaa né ɛmɔte ɛlɔenyɛlɛfoɛ mɔ ne pɔfoɛ mɔ, wɔ adwene nu ne bɔne nnwumaayɔlɛ mu.

²² Nakoso kekesaala ye de, ɔnate Kristo wue ne aso wahwe ɛmɔ wabata ye nwonaen nipadua, amaa ɔnate so wafa ɛmɔ wawa ye nyunu kyɛ mmenia bɔ bɛte krongron, bɔ ngekalewa nne bɛ nwo ná benni fɔ ɔ.

²³ Nakoso ɔsɛ kyɛ ɛmɔsɔ gyidie ne anu serɛ na ɛmɔahora bagyina pindinn. Na afei ɔnzɛ kyɛ ɛmɔtwe bɛ nwo befi nzɛmba ne anu anyelasoɛ nwo, na ɛhe yeɛ ɛmɔtele, bɔ babɔ ye nwo dawure bahyire abɔdeɛ mukoraa wɔ wiase, bɔ me Pɔɔlo nde ye nwo somvoɛ ye.

Pɔɔlo somvoɛ adwuma

²⁴ Na afei, ɔnate ɛmɔ ti me nye gye wɔ m’amaneɛnwunɛ nu; na menya Kristo amaneɛnwunɛ ne anu kyɛfa wɔ me nwonaen nu mema ye nipadua ne, bɔ ɔte asɔre ne.

²⁵ Ɔnate ɛmɔ ti Nyameɛ afa sɔ adwuma ye wawura me sa, na wamaa mayɛ somvoɛ mama asɔre ne, kyɛ mmɔ Nyameɛ dwirɛ ne dawure ma ebiala te,

²⁶ mvealeɛ nu dwirɛ bɔ ofi tete ne aworɛ ndoatoasoɛ so bafa bafea ɔ, nakoso kekesaala ye de baye bahyire anwoteefoɛ.

²⁷ Na Nyameɛ apɛdeɛ ole kyɛ, ɔkɔma anwoteefoɛ konwu animnyam anwonya bɔ ɔwɔ mvealeɛ dwirɛ ne anu wɔ Amaenmaensofoɛ nu. Mvealeɛ nu dwirɛ ne ole Kristo bɔ ɔwɔ ɛmɔ nu ne, na ɔte animnyam ne nwo anyelasoɛ.

²⁸ Ye yeɛ yɛbɔ ye nwo dawure ɔ, na yɛbɔ kuro sona biala kɔkɔ, yɛfa nworɛ mukoraa yɛkyirekyire sona biala, amaa ɔnate so yafa sona biala yawa Kristo nyunu wɔ pɛpɛɛpɛyɛlɛ nu.

²⁹ Na ɛhe anwo yeɛ meyɔ adwuma mefɛ ɔ, na mepere mekɔ me nyunu, kyɛbɔ ye anwoserɛ adwuma bɔ ɔyɔ ye me nu tumi so ne ɔte ɔ.