Hebrifoɛ 1 - AHYERƐLƐ KRONGRON

Nyameɛ fa Ɔwa ne so dwudwo

¹ Daa tete ne, mmerɛ pee nu ne atee ahoroɔ so yeɛ Nyameɛ nate ngɔmhyɛlɛfoɛ so dwudwo hyirele yɛ nana mɔ ɔ;

² nakoso ngyẽa bɔ oli nziɛ ye anu de, wafa Ɔwa ne aso yeɛ wadwudwo wahyire yɛ ɔ, ye bɔ wama agyapadeɛ amukoraa wayɛ ye deɛ, ye bɔ ɔnate ye so yeɛ ɔbɔle wiase amukoraa ɔ.

³ Ye yeɛ ɔte Nyameɛ animnyam hyireinn ne, ɔne ye sue kaenn, na ole ye tumi dwirɛ ne yeɛ otira nningyein mukoraa nu ɔ. Na ɔtele yɛ nwo fili yɛ bɔne nwo yiele nen, ɔɔtenane Tuminiɛ Nyameɛ sa famaa so wɔ nyameɛso.

Nyameɛ Awa ne tra abɔfo mɔ

⁴ Nyameɛ mane Baa ne trale abɔfo mɔ, kyɛbɔ dumaa bɔ ye sa aha ye ne koso bo bɛ deɛ so ne.

⁵ Ɔnate kyɛ, abɔfo mɔ nu beni yeɛ Nyameɛ ahã ahyire ye le kyɛ, “Ɛte Mma, na ɛnɛ mayɛ wɔ Baba” ɔ? Anaakyɛ, “Ngɔyɛ ye Baba, na ye wora wayɛ Mma” ɔ?

⁶ Nakoso mmerɛ bɔ Nyameɛ baasoma ye bamuɛbaa ne maa ɔba wiase ne de, ɔhane kyɛ, “Ɔsɛ kyɛ Nyameɛ abɔfo mukoraa bɛsɔne ye.”

⁷ Na bɔ Nyameɛ ha fale abɔfo mɔ nwo ɛhe: “Nyameɛ yɛ ye abɔfo mɔ mvrama, na ɔyɛ ye somvoɛ mɔ see bɔ ogye ɔ.”

⁸ Nakoso Ɔwa ne de, bɔ ɔha fale ye nwo ɛhe: “O Nyameɛ, w’ahennie bia wɔ berɛ afebɔɔ! W’Ahennie hɔtɔ ne te teenenee hɔtɔ.

⁹ Ekuro tenenee, na ekyi amumuyɛɛ. Ɛhe ati Nyameɛ, wɔ Nyameɛ aye wɔ; wafa anika ngoo wapopa wɔ maa wabo wɔ mmango mɔ deɛ so.”

¹⁰ Nyameɛ sa hane kyɛ yoo: “Wɔ, Awurade, ahyɛaseɛ ne, ɛtole aseɛ fapem, na anwuro te wɔ sa noa adwuma;

¹¹ bɛ mukoraa bɛkɔsɛkye, nakoso wɔ de, ɛwɔ berɛ daa; bɛ mukoraa bɛkɔyɛ daa kyɛ ataadeɛ yɛ daa ɔ,

¹² ekobubu bɛ kyɛ ɛtena, na bɛkɔsesã bɛ kyɛ ataadeɛ; nakoso wɔ de, kyɛbɔ ɛte ne ala yeɛ ɛte ɔ, na ɛwɔ berɛ afebɔɔ.”

¹³ Na abɔfo mɔ nu beni yeɛ Nyameɛ ahã ahyire ye le kyɛ, “Tena me sa famaa so kodwu kyɛ ngɔfa wɔ pɔfoɛ mɔ ngɔyɛ wɔ gya bo ndiasoɛ ɔ?”

¹⁴ Aso bɛ mukoraa bɛtte sunzum asomvoɛ mɔ, bɔ ɔsoma bɛ maa bɛkɔɔso mmenia bɔ bekonya ngoalelɛ ɔ?