SEFANIA 1 - EBAIBO INZIENUKHU

¹ Kano niko amang'ana ako MWAMI yahelesia Sefania mumatukhu ka Yosia omusiani wa Amoni yali nali omuruchi wa Yuda. (Sefania yali owolwibulolwomuruchi Hesekia okhubir'ra mu Amaria, Gedalia nende Kushi.)

Litukhu lio MWAMI okhuhaana Obukhalachi

² OMWAMI yaboola mbu, “Nzitsanga okhumulula ebindu biosi khusibala.

³ Nakhuye abandu bosi, netsinyama namanyonyi nende tsisuche tsiosi etsiomunyanza, khandi nangoke hasi abandu ababi bosi. Nakhuye abandu bosi, ne abulaho kata mulala owakhasikala tawe. Ise OMWAMI mal'le okhuboola.

⁴ “Nambaane esinyasio khubandu abali Yerusalemu nende bosi abali Yuda. Nambinieho obwekayakayi bwa Baali hosi habuba nibusili, kata sialiho owakhetsul'lekhwo amera kabesaalisi abanasibala bamurumikhilanga tawe.

⁵ Nanzire omundu wosi owakhanina khusilama sieinyumba khulwo khwekayakaya eliuba, omwesi nende tsinyininyini. Khandi naakhuye yabo bosi abandekayakayanga nende okhwesuha mbu basanganga n'nase; ne khandi nibesuha nibarumikhilanga eliira liomunyasaye olangwa Moleki.

⁶ Nambamuma yabo bosi abamal'le okhungalukhana ma sibanondanga tawe, kata khandi sibetsangakhwo handi nohomba okhureeba mbu mbebaal'le akabakhola tawe.”

⁷ Litukhu lio MWAMI okhuhaana obukhalachibwe lili ahembi; kho mwehotselesie imbeli uwe. OMWAMI yerechekhanga okhuhaana abandube singa omusango ma ulangile abasuku okhuyaaka Yuda.

⁸ OMWAMI aboolanga mbu, “Litukhu liokhusinza yilio, nambaane esinyasio khubandu abakhongo, khubasiani bomuruchi nende yabo bosi abalondanga ifwo yabandu betsimbia tsindi.

⁹ Nanzire yabo bosi abekayakayanga singa abanasibala nende yabo abebanga nibeera kho bayaake ebindu biokhwitsusia ehekalu yanyasaye wabwe.

¹⁰ “Litukhu yilio, namuhul'le liyoka liokhulakaya ndirul'langa khusilibwa sie Tsisuche esili Yerusalemu. Namuhul'le etsikhwisi nitsikhupwanga okhurula habundu haiyia mwitookho, khandi namuhul'le liyoka likali liokhwikala amarwi ndirulanga mubikulu.

¹¹ Mwekhuule nimulakaya olwa muhul'la akene yaka inywe abamenya emwalo welitookho sichila abakholi bobukhala bosi nababe nibafwiye!

¹² “Munyinga yene yiyo nambukule etaya khulwo khukhosia nikhaabanga abali mu Yerusalemu. Ndakhahaane esinyasio khubandu abarabukulanga obukono mumang'ana kosi khandi abapaalanga bamanya kosi, ababool'langa mumwoyo mbu ‘OMWAMI siakholangakhwo amalahi noho amabi tawe.’

¹³ Emiandu chiabwe chiakhayaakwe netsinyumba tsiabwe nitsituywa. Sibakhamenyekhwo mutsinyumba tsiabombokhanga nohomba okhunywa ewaini okhurula mumikunda chiemisabibu chiabarakanga.”

¹⁴ Litukhu likhongo lio MWAMI lili ahembi, lili ahembi okhusila khandi liitsanga bwangu! Litukhu yilio liakhabe eliokhutsunwa okhukali, sichila kata abasikari abalulu bakhalakaye khulwokhwesikoka.

¹⁵ Yilio liakhabe litukhu lielirima likali, litukhu liamanyakhano nende okhusaalila, litukhu liokhukhuywa nende okhumumwa, litukhu liesiilima nende okhubelela, litukhu elilimile nende eliamalumbesi amenji,

¹⁶ litukhu elitsuyemwo amayoosi ketsitulumbete tsielihe, nende okhulakaya khwabasikari abaseeranga amatookho akasirwa netsiminga nende okhukoka eminaara emirambi.

¹⁷ OMWAMI aboolanga, “Ndakhaleere amakhupako amakali khubandu akakhachile bulimundu yakhahabasienje naruna halonda singa omubofu. Bamala okhukhola tsimbi imbeli wanje ne luno amatsahi kabwe kalasundukha singa amaatsi, ne emibili chiabafiye chilakona hasi khumaloba nichibolanga.”

¹⁸ Litukhu liene yilio olwo MWAMI alimanyia oburima bubwe, kata efetsa yabwe yosi nende etsahabu sibiakhabahoniekhwo tawe. Esibala siosi siakhamumwe khulwelirima lilie elifwana omul'lo. Yakhareho esihesi, esihesi siamatetekhana khubuli mundu wosi omenya khusibala.