SAKARIA 1 - EBAIBO INZIENUKHU

OMWAMI alanganga Abandube okhumukalukhila

¹ Mumwesi kwamunane mumuhika kwakhabili olwa Dario yali omuruchi wa Perisia, OMWAMI yahaana amang'ana kano khumuroobi Sakaria omusiani wa Berekia omwitsukhulu wa Ido.

² OMWAMI Wokhunyala Biosi yabool'la Sakaria abool'le abandu mbu, “Ise OMWAMI ndali okhusinyikhila abakuka benywe okhusila,

³ nebutswa luno mbabool'langa mbu, ‘Kalukhe khu ise OMWAMI wenywe, ne nase nangalukhe khwinywe.

⁴ Murabba singa abakuka benywe balinji tawe. Khale muno abaroobi babahelesia amang'ana kanje nibababool'la mbu balekhe okhumenya obulamu obusiamu khandi obwetsimbi tawe. Nebutswa sibayenya okhumbulila nohomba okhulonda amalako kanje tawe.

⁵ Kho abakuka benywe bali hena? Kata abaroobi basimenya inziayo noho?

⁶ Okhubir'ra mubarumikhili banje abaroobi ndahelesia abakuka benywe amalako nende amachetsiyio, nebutswa sibakalonda tawe ma nikachila nibanyoola esinyasio. Kho beyama ma nibamanya mbu ise OMWAMI Wokhunyala Biosi ndali okhubahelesia esinyasio esia bali nibakwan'ne okhunyoola khandi singa obwa ndali ninjoomele okhukhola.’ ”

Libisulo lietsisululi eliomuroobi yalola

⁷ Mumuhika kwakhabili olwa Dario yali omuruchi omukhongo, khwitukhu liamakhumi kabili nakhane eliomwesi kwelikhumi namulala, nikwo omwesi kwa Shebati, OMWAMI yaamanyia ling'ana mwibisulo mubutukhu.

⁸ Ndalola omundu nanin'ne khusululi inzakhanyu. Yali nasinjiye hamihatasi echiali mwibanda, ne emukongowe tsialiho etsisululi tsindi tsinzakhanyu, etsielikokhe, netsindafu.

⁹ Kho nimureeba mbu, “Omwami wanje, etsisululi tsino tsikhali nasifune sina?” Naye niyangalusia mbu, “Nakhumanyie esifune siatsio.

¹⁰ Tsino nitsio etsio MWAMI yarumile okhulambuula esibala.”

¹¹ Natsio nitsikalusia om'malaika mbu, “Khuchend'e khusibala siosi ne khunyooye mbu esibala siosi sibula obukhonyi nende obunyali.”

¹² Ma om'malaika naboola mbu, “E OMWAMI Wokhunyala Biosi, luno nemihika amakhumi kane nakataru okhurula nohambila Yerusalemu nende amatookho ka Yuda lirima. Notsilil'le luhono sina nosili okhubabeela tsimbabasi?”

¹³ OMWAMI nakalusia om'malaika uyo namang'ana amalahi, akokhulemia omwoyo,

¹⁴ ne om'malaika tsana niyambool'la nandie ako MWAMI Wokhunyala Biosi yali nabooye mbu: “Ndayanza Yerusalemu litookho lianje litsienukhu okhusila, khandi ndihendel'langa,

¹⁵ ne ndi nelirima khumahanga akahul'langa bulahi khandi akali mumulembe. Okhuba olwa ndali nindekhele okhusinyikhila abandu banje hatututu, amahanga yako katsilil'la okhukhupia abandu banje esibi okhusila.

¹⁶ Kho ngalukhile Yerusalemu okhumanyia tsimbabasi khwitookho. Ehekalu yanje elakalusibwa mung'ono ne litookho lilombokhwa obuhia.”

¹⁷ Om'malaika khandi yambool'la nandie mbu: “OMWAMI Wokhunyala Biosi aboolanga mbu amatookhoke kalahindihala khandi, ma khandi alakhonya Yerusalemu nabukula litookho okhuba elilie omwene.”

Libisulo lietsinzika

¹⁸ Mwibisulo lindi, ndali okhulola tsinzika tsine tsiechulukhi.

¹⁹ Nireeba om'malaika owali nal'lomanga n'nase mbu, “Esifune sietsinzika yitsi nisina?” Niyangalusia mbu, “Tsino tsisinjilanga mubukono bwamahanga kesibala amakufu akali okhusalania abandu ba Yuda, nende Isiraeli, nende Yerusalemu.”

²⁰ Ma OMWAMI niyamanyia abaruli bane.

²¹ Nase nireeba mbu, “Abandu bano betsele okhukhola sina?” Naye niyangalusia mbu, “Betsele okhuriisia nende okhuleka amahanga akali okhumuma esibala sia Yuda ma nikasalania abandu basio.”