OBADIA 1 - EBAIBO INZIENUKHU

¹ Kano namang'ana koburoobi bwa Obadia; ako MWAMI Nyasaye yaboola khwihanga lia Edomu. OMWAMI urumile omurumwa uwe khumahanga, ma khuhuliye amang'ana kaake mbu: “Mwerechekhe! Chenda khutsie khulwana Edomu!”

OMWAMI yakhahaane esinyasio khu Edomu

² OMWAMI abool'langa Edomu mbu, “Ise naakhukhole okhuba omutofu; ma buli mundu nakhuchaayenje.

³ Omwekhonyo kukwo kwakhukaata ibe. Litookho lilio noluhinga olwasirwa khulwanda; hango haho hali hekulu khusikulu, khulwe yako obool'langa mumwoyokwo mbu, ‘Niwina owakhanyala khukhwesa okhwitsa hasi?’

⁴ Kata nikali walomba hango haho okhuba ikulu singa esitsu sieinditsu, kho ebe enyala okhulolekha eli halala nende tsinyininyini, nebutswa nakhukhwese okhwitsa hasi.

⁵ “Olwabeebi betsanga butukhu, babukulanga yibio ebiabakhenya. Olwa abandu baakulanga emisabibu, bamalanga balekhakhwo mitititi. Nebutswa abasuku benywe babukula biosi.

⁶ Abolwibulo lwa Esau emianduchienywe chiyaakilwe, amabiikhilo kenywe kabukuywe.

⁷ Aba muhambananga n'nabo bamukaat'te; bamwilusisie okhurula musibala sienywe. Abandu ba mwali n'nabo nomulembe bamal'le okhumuleka. Abalinabo bamwalitsanga n'nabo bakhurechele nende omureko; baboolanga yaka khuibe, ‘Obuchesi bwabetsanga n'nabwo buli hena?’

⁸ “Litukhu lia nambaane esinyasio khu Edomu, nakhuye abasaatsa abechesi bali mubo, ma nyononie obulwenyukhu bwabwe.

⁹ Abasaatsa bobulwani ba Temani nabarisibwe okhusila, ne buli musikari wosi wa Edomu aleerwa.”

Ebifune ebiachila Edomu nahebwa esinyasio

¹⁰ “Sichila mwali okhuyaaka nende okhwira abekho benywe, abolwibulo lwa Yakobo, mulamumwa nende okhubula okhuhebwa oluyali khulwe inziayo.

¹¹ Mwali khusinjila sibeka khwitukhu eliabasuku bafunaka ebilibwa biabwe. Inywe mwali ababi singa abandu besibala siebucheni, abali okhuchinga obuhinda bwa Yerusalemu, ma nibakabulana abene.

¹² Ibe siwali nokhoyele khusangal'la linyakhano liabekho benywe bali Yuda tawe. Siwakhakhoyele okhusangala litukhu liabali khumululwa tawe. Ibe siwali nokhoyele okhubatsekha olwa bali mukhutsunwa tawe.

¹³ Ibe siwali nokhoyele okhwinjila mwitookho liabandu banje, khulwokhusangal'la okhutsunwa khwabwe nende okhubukula obuhinda bwabwe litukhu liabasalila tawe.

¹⁴ Ibe siwakhasinjiye mumasanganjila khulwo okhutiila abatemanga okhwehonokosia tawe. Ibe siwakhabahan'ne mumakhono kabasuku khwitukhu liesibi tawe.”

Nyasaye yakhakhalachile amahanga kandi

¹⁵ “Litukhu lili ahembi okhwola elie Ise, OMWAMI ndakhakhalachile amahanga kosi. Ibe Edomu, ake ibe wakhol'le kakhakholwe khuibe. Wakharunge kosi akawakhola.

¹⁶ Abandu banje banywa esikombe esilulu khulwokhuhebwa esinyasio, nibali khusikulu sianje esitsienukhu. Nebutswa amahanga kosi akali ahembi n'nalio, kalanywa esikombe esilikhwo esilulu okhusila khulwokhuhebwa esinyasio; bosi nabanywe ma nabafwe.

Isiraeli linyoola obulechi

¹⁷ “Nebutswa khusikulu sia Sayuni abalala bakhahonokokhe, ne hakhabe habundu hatsienukhu. Abandu bolwibulo lwa Yakobo bakhabukule liloba liabwe eliabalaamilwa.

¹⁸ Abandu ba Yakobo nende Yosefu, bakhafwane singa omul'lo; bakhamume, abandu lwa Esau, singa omul'lo kusambanga amakokha. Abulakhwo owolwibulo lwa Esau owakhahonokokhe tawe. Ise, OMWAMI mal'le khuboola.

¹⁹ “Abandu okhurula elubeka lwenandete wa Yuda balabukula Edomu; abandu okhurula khundulo khwebikulu ebili emasaba bakhabukule Filisiti; Abaisiraeli nababukule esibala sia Efuraimu nende Samaria; abandu ba Benjameni bakhabukule Gileadi.

²⁰ Abasikari abatikhila esioba okhurula esinyolu wa Isiraeli bakhakalukhe ma baleke esibala sia Foenisia okhwola esinyolu wa Sarafeta. Abahambe okhurula Yerusalemu abali Saridisi bakhaleke amataala kenandete wa Yuda.

²¹ Abasikari bobulechi nabatsie Yerusalemu nabalwane abandu ba Edomu ma nababaamihe. Ne OMWAMI omwene nabe omuruchi.”