ISAYA 1 - EBAIBO INZIENUKHU

¹ Esitapu yisi silimwo amang'ana akali khu Yuda nende Yerusalemu aka Nyasaye yabisul'la Isaya omwana wa Amosi mumatukhu ka Usia, Yotsamu, Ahasi nende Hesekia bali abaruchi ba Yuda.

Nyasaye akondokhela abandu baabe

² OMWAMI yaboola mbu, “Hulile akamboolanga inywe esibala nende likulu! Abaana bandakhusia bakholeye indiri.

³ Tsing'ombe tsiamanya mwenetsio, kata etsisikhili tsiamanya aha omwami watsio atsiayanga. Nebutswa abandu ba Isiraeli sibamanyile esindu tawe. Abandu banje babula obumanyilisi.”

⁴ Watiba ibe, lihanga lietsimbi, inywe abandu ababatsa khandi ababi! Tsimbi tsienywe tsimukhulul'langa hasi! Inywe mwasuula OMWAMI, Nyasaye wa Isiraeli omutsienukhu, nim'mukhupa emikongo chienywe.

⁵ Busina mutsilil'langa okhukhol'la indiri? Mwenyanga muhebwa esinyasio esikali noho? Inywe abandu ba Isiraeli, omurwe kwenywe kwitsuuyekhwo amafumire, ne omwoyo kwenywe kulwala halala namakani kenywe.

⁶ Habulakhwo habundu halamu khumubili kukwo okhurula khumurwe okhwola khubilenje tawe. Witsuuye namafumire nende tsinguma nende amakhwaku. Amakhwaku kenywe kasili okhusaabwa kata okhubohwa tawe. Indesi yosi esili okhubakhwakhwo tawe.

⁷ Esibala sienywe sikwiye likunda ne amataala kenywe kasambilwe nomulilo. Abacheni bamunuulanga esibala sienywe nibasasia siesindu siosi nenywe nimureyekhwo imoni.

⁸ Yerusalemu lionyene nilio elilekhelwe, nilifumbiywe nabasuku lili butswa singa esitsu esirali nomulindi m'mukunda kwemisabibu nohomba singa esikuuli m'mukunda kwamahondo.

⁹ OMWAMI Wokhunyala Biosi alabula okhulekha abandu balala okhuhonokokha, khane Yerusalemu liakhamululiiywe elala, singa butswa Sodoma nende Komora kamululwa.

¹⁰ Ibe Yerusalemu, abaruchi baabo nende abandu baabo bafwana singa abandu ba Sodoma nende Komora. Hulila aka OMWAMI ali mwiboola khwinywe. Rechelesie aka Nyasaye wefwe aboolanga khwinywe.

¹¹ Aboolanga mbu, “N'no mupaalanga ndakhenya emisango yitsi tsiosi etsia muhaananga khu ise? Ndanyoola amakondi amenji okhubira esichelo akamusambanga singa emisango halala netsisinya tsiemiruko etsianera. Musinyile namatsahi ketsichulukhi, namakondi netsimbusi.

¹² Niwina owamubool'la munder're yibi biosi olwa mwiitsanga okhundekayakaya? Niwina owamubool'la okhusenasena muhekalu yanje singa mbu?

¹³ Nakabutswa okhuleera emisango chienywe. Murulisisie nokhuhunya khwobwali obwamusambanga. Sinyala okhuhuchil'la amasabo kenywe akemiesi emiyia, ne Tsisabato, namabukana kenywe akokhwekayakaya tawe. Yako kosi kafwabibwa netsimbi tsienywe.

¹⁴ Amasabo kenywe kemiesi emiyia nende amatukhu kenywe amakhongo bisinyanga omwoyo kwanje. Bili omusiko omusiro okwaranyala okhuchinga.

¹⁵ “Olwa muchinguulanga amakhono kenywe mubusaayi sinamuhengekhwo tawe. Kata nimuba nimusaaya butinyu sinambuyie khukenywe tawe, okhuba amakhono kenywe ketsuuyekhwo amatsahi.

¹⁶ Mwesaabe abene mulabe tser're. Mulekha amabi yaka kosi akandolalanga nimukhola. Yee, mulekhe okhukhola amabi

¹⁷ ne mweke okhukhola amalunji. Mulole mbu obukhalachi bwahabwene bukhol'lwe. Mukhonye yabo abasandibwanga, muhe ababisandu akabenya okhunyoola, nimusoola abalekhwa.”

¹⁸ OMWAMI aboolanga mbu, “Hambe khuloosie halala amang'ana. Tsimbi tsiamubakha esipala esiakhanyu, nebutswa namusaabe namulabe tser're singa etsaluchi. Kata tsimbi tsienywe nitsiakhakhanya singa amatsahi tsilalaba singa obwoya bwamakondi amalafu.

¹⁹ Mulalia khubindu ebilahi ebiamanga khusibala nimuba nimumbulila ise.

²⁰ Nebutswa nimuba nimusuula nende okhukhol'la indiri muleer'rwa mwihe. Ise OMWAMI mal'le okhuboola.”

Yerusalemu ne Litookho lietsimbi

²¹ Litookho elialinji lisubilwa, leelo lifwana omukhasi orali omusubilwa khumusaatsawe. Olundi liali nilietsula nabandu abalunji, nebutswa leelo aberi bonyene basikalamwo.

²² Yerusalemu, walinji singa efetsa, nebutswa leelo obula obukhala singa efetsa eyakhupa olukukhu; walinji singa ewaini indahi, ne leelo oli butswa singa amaatsi.

²³ Abemeli baabo nabeindiri khandi nabalina babeebi; bahuchil'langa ebihanwa nende ebihetso. Sibasoolanga ababisandu musiina kata okhuhuhia olwa abalekhwa beekananga tawe.

²⁴ Kho luno hulile ako MWAMI Wokhunyala Biosi, Nyasaye wobunyali wa Isiraeli aboolanga: “Namurunjie es'sialia inywe, abasuku banje, ne sinamutsilil'le okhumbelesia omunyakhano tawe.

²⁵ Namuhelesie esinyasio. Namusiiye singa esibia sisiywanga mumul'lo, ne nambinie obubi bwenywe bwosi.

²⁶ Namuhelesie abaruchi nende abebaali singa yabo aba mwalinji n'nabo khale. Nilwo olwa Yerusalemu nalilangwe litookho lilunji khandi lisubilwa.”

²⁷ Nyasaye nahonie Yerusalemu nende abandu bamwo bosi abakheyama tsimbi, sichila ye nomulunji.

²⁸ Nebutswa OMWAMI alatubula bosi abakhola tsimbi nende okhumufukula; aleera bosi abamulekhanga.

²⁹ Mwakhabelela khulwa mbu mwekayakaya emisaala nende okhuraaka emikunda chiabanyasaye.

³⁰ Mulaniala singa omuruba okufwitsanga, singa omukunda okurasamwanga amaatsi.

³¹ Singa obwamakokha kahambibwanga mwo omul'lo neinzekhele, nimbwo abandu bobunyali balamumwa nemilimo chiabwe emibi abeene, ne abulaho owa khekal'la okhumumwa yikhwo.