DANIELI 1 - EBAIBO INZIENUKHU

Amang'ana ka Danieli nende abalinabe ( 1:1—6:28 ) Abasiani babuukha hango ha Nebukadinesa

¹ Mumuhika kwakhataru olwa Yehoyakimu yali omuruchi wa Yuda, Nebukadinesa omuruchi wa Babulonia yaseera Yerusalemu ma nafumbila litookho.

² Omwami yahaana omuruchi Yehoyakimu mumukhono kwa Nebukadinesa halala nende ebindu biomuhekalu ya Nyasaye. Khandi yabukula ababohe nabahila muhekalu yabanyasayebe ma naara ebindu ibiayali nabukuye mumabiikhilo komuhekalu.

³ Omuruchi yalaka Ashipenasi owali omusinjil'li wabakholibe yahule okhurula mubasumba Baisiraeli ababuukha abomunyumba yoburuchi nende abomutsinyumba tsioluyali.

⁴ Babe abasiani ababuukha ababula obulema bwosi, abelikondo lilahi, abalwenyukhu mubuchesi, abokhumanyilisia bwangu, abekibwa bulahi, abanyala okhukhola emilimo munyumba yoburuchi. Ashipenasi abechie okhusoma, nende okhuhandika ol'limi olwa Babulonia.

⁵ Omuruchi yalaka mbu sielitukhu bahebwenje ebiokhulia ebiaye mwene yalitsangakhwo nende ewaini eyomwene yanywetsangakhwo. Kali mbu bechibwe khulwemihika chitaru ma olunyuma barumkhile omuruchi.

⁶ Abalala khuyabo abali okhwahulwa bali, Danieli, Hanania, Mishaeli, nende Asaria ne bosi bali abolwibulo lwa Yuda.

⁷ Omusinjil'li wabakholi yabakulikha amera kandi: Danieli yakulikhwa Beliteshasa. Hanania nakulikhwa mbu, Shaduraka, Mishaeli nakulikhwa mbu, Meshaka, ne Asaria nakulikhwa mbu, Abedineko.

⁸ Danieli nakhalaka mumwoyokwe mbu arefwabiakhwo khulwokhulia ebiokhulia ebinolu ebiomuruchi yalitsangakhwo nende ewaini eyayanywetsangakhwo tawe. Khulwe yako yareeba Ashipenasi amuhuchil'le mbu alekhe okhwefwabia khulwokhulia ebiokhulia biomuruchi nende okhunywa ewaini yomuruchi.

⁹ Nyasaye yachila Ashipenasi nabeela Danieli esirenda ma namukhol'la aketsimbabasi.

¹⁰ Ne kata mbwo Ashipenasi yaria omuruchi kho yabool'la Danieli mbu, “Omuruchi, niye owabeye okhwahula ebiokhulia bienywe nende ewaini yenywe. Ne naba nakhulola norali nom'mbili omulahi singa ababuukha basio yetsukhan'na niyanzira.”

¹¹ Kho Danieli nabool'la omusinjil'li webiokhulia owa Ashipenasi yali nareeyeho khu Danieli, Hanania, Mishaeli, nende Asaria mbu,

¹² “Omwami, okhukol'lesia khulwamatukhu likhumi ne okhulekhe khulitsenje tsifwa tsionyene nende okhunywa amaatsi.

¹³ Ma okhuchelaanie nende abasiani ababuukha abalitsanga khubiokhulia biomuruchi ma okhukhalachile okhulondokhana nende obwoba noluutsi.”

¹⁴ Omusinjil'li uyo yahuchil'la amang'ana ka Danieli yako ma nabateema khulwamatukhu likhumi.

¹⁵ Amatukhu likhumi nikahweye, balolekha abakhomefu khandi abetsingufu okhuyomba ababuukha yabo bosi abali nibalitsanga khubiokhulia biomuruchi.

¹⁶ Kho okhurula olwene yilwo, omutendi yabahuchil'la batsilil'le okhulitsanga tsifwa nende okhunywa nende amaatsi musilenje siebiokhulia ebiomuruchi yali niyahaana khubo.

¹⁷ Nyasaye yahelesia abasiani bane yabo obumanyi nende obusitsa mumang'ana kobusomi nende akobuchesi kosi. Khandi yahelesia Danieli okhumanyilisia khwamabisulo nende amalooro.

¹⁸ Olwemihika chitaru chiomuruchi yali niyalaka chiali nichihweye, Ashipenasi yahila abasiani ababuukha yabo khu Nebukadinesa.

¹⁹ Omuruchi yal'loma n'nabo, ne Danieli, Hanania, Mishaeli, nende Asaria bamwonyonya okhusila okhuyomba abandi bosi, kho bamala nibahuchil'lwa okhurumikhila omuruchi.

²⁰ Ne mubuli ling'ana liosi eliobuchesi nohomba eliokhumanyilisia, eliomuruchi yareebangakhwo, yabanyoola nibali nokhumanyilisia okhuyomba abafumu bosi nohomba abalakuli bosi abali mwihangalie hali likhumi.

²¹ Danieli yatsilil'la okhumenya munyumba yoburuchi okhwola khumuhika okwokhuranga okwomuruchi Kirushi.