BAFILIPI 1 - EBAIBO INZIENUKHU

¹ Ise Paulo na Timoteo, abakholi ba Yesu Kristo, khumuhandichilanga inywe abandu ba Nyasaye mu Yesu Kristo abali Filipi halala nabemeli nende abakhonyel'li:

² Nyasaye Papa wefwe nende Omwami Yesu Kristo bamuhelesie esirenda nemilembe.

Paulo asaayila abakristo ba Filipi

³ Khupilanga Nyasaye wanje embwo hali khasotso olwa mwitsul'langa inywe;

⁴ ne buli lwosi olwa musaayilanga mwesi, saayanga nobusangali,

⁵ khulwo obukhonyani bwenywe mumilimo chia Amang'ana Amalahi okhurula khwitukhu liokhuranga okhwola luno.

⁶ Kho ndi nobusubili mbu, Nyasaye owachiaka emilimo emilahi mwinywe, alatsilil'la okhuchihesia okhwola Khwitukhu lia Yesu Kristo alitsa.

⁷ Mubetsanga mumakani kanje khasotso! Khulwe yako ndi habwene okhumusangal'la inywe. Okhuba inywe mwesi mwamala okhusanga musirenda esia Nyasaye yali okhumba kata mukhubohwa khwanje khuno nende olwa ndali omulakhuule okhusoola Amang'ana Amalahi nokhukaralisia

⁸ Nyasaye nomukobokheli wanje mbu tooto amahofu kanditsanga khulwenywe mwesi nobuyanzi bwa Yesu Kristo.

⁹ Saayanga mbu obuyanzi bwenywe bwemete nibusilana halala nokhumanyilisia khwatooto nende obukhalachi obwa habwene,

¹⁰ kho mube abanyala okhwahula akali amalahi. Ma mube abasiiyikhu ababula esikha Khwitukhu elia Kristo alitsa.

¹¹ Obulamu bwenywe buletsulamwo ebiamo biobulunji, ebitsanga khulwa Yesu Kristo, khulwa obukhongo nende oluyali lwa Nyasaye.

Okhuba mwoyo ni Kristo

¹² Abaana befwe, Nyenyanga mumanye mbu amang'ana akekholekha khwise kamal'le okhuchila Amang'ana Amalahi nikatsilil'la okhulanda.

¹³ Khulwako abalindi abehango homuruchi nende abandi bosi abali hano bamanyile mbu ndi mubuhambe sichila ndi omurumikhili wa Kristo.

¹⁴ Ne okhubohwa khwanje khwachila abaana befwe abenji niboma ikholo mu Mwami, ma bametekhanga okhukamba amang'ana ka Nyasaye nolutswoni.

¹⁵ Nitooto baliho abandi abakambanga Kristo sichila bali neimbalikha nobusoolo, nebutswa abandi bakambanga nomwoyo omulahi.

¹⁶ Yaba bakambanga khulwo obuyanzi sichila bamanyile mbu Nyasaye waimba omulimo kwokhulinda Amang'ana Amalahi.

¹⁷ Ne abandi bakambanga Kristo khulwetsimemba nibarali nobwatooto tawe; bapaalanga mbu banyala okhunder'ra eminyakhano eminji olwandi mububohe.

¹⁸ Sikali esindu tawe! Sangalanga khulwako, mbu munjila tsiosi Kristo akambwangwa kata nikali mukhwekaatia nohomba mubwatooto. Ne ndatsitsachil'la okhusangalanga,

¹⁹ sichila manyile mbu khulwa amasaayo kenywe, nende obukhonyi bwo Mwoyo Omutsienukhu wa Yesu Kristo ndakhakholwe omulakhule.

²⁰ Okhwekomba khwanje okhukali nende okhunaya khwanje khuli mbu mwing'ana liosi ralema okhuhesia omulimo kwanje tawe, nebutswa mbe neikhola mutsinyinga tsiosi ma okhusila muno luno mbu mubulamu bwanje kata nifwa nohomba nimba mwoyo mbelesie Kristo oluyali.

²¹ Obukhala obwokhuba mwoyo nisina? Khu ise okhuba mwoyo ni Kristo. Ne okhufwa khwakhaba nobukhala okhuyomba.

²² Nebutswa nikali mbu khulwa okhuba omulamu nyala okhumeetekha okhukhola emilimo echiobukhala, kho simanyile ndakhaula elili hena tawe.

²³ Ndi hakari wetsinjila chibili. Rambilwe ndakhakhola sina! Ndekombanga okhusila okhulekha obulamu buno mbe halala na Kristo sichila nobulahi okhuyomba;

²⁴ nebutswa khulwenywe kakhenyekha mbu mbe omulamu.

²⁵ Ndi nende obusubili khwing'ana yili, ma kho manyile mbu ndakhamenya. Ndatsitsachil'la okhumenya n'nenywe mwesi, khe meete khwinywe obutsitsachil'li nokhusangala mubusubili.

²⁶ Ma nindi n'nenywe khandi, mube nebifune ebinji okhwepaaka khulwe ise mu Yesu Kristo.

²⁷ Luno, ling'ana likali lili mbu okhumenya khwenywe khubetsenje singa Amang'ana Amalahi ka Kristo kebaalanga, mbu kata nimba ninzitsa okhumukonya, nohomba niretsa, mbul'le mbu musinjilanga buralilu nelichoomo elala, ma mulwan'nanga halala khulwa obusubili bwa Amang'ana Amalahi.

²⁸ Muraria abasuku benywe tawe, hali khasotso mwome ikholo, ne mbwo kalabamanyia mbu balalekwa, nenywe mulaleka, sichila Nyasaye mwene niye omuhetsanga obulechi.

²⁹ Okhuba inywe mwahebwa esirenda okhurumikhila Kristo, ne sikhuli okhumusubila khwonyene tawe, habula nende okhusalila khulwa ye.

³⁰ Luno munyala okhusanga n'nase mubulwani. Obulwani bwene yibwo nibwo obwa mwandola ninwananga, ne singa muhul'langa nibwo obwa silwananga.