BAEFESO 1 - EBAIBO INZIENUKHU

¹ Ise Paulo omurumwa wa Yesu Kristo khulwo okhwenya khwa Nyasaye, muhandichilanga inywe abandu ba Nyasaye abali Efeso abali abasubilwa mu Yesu Kristo.

² Nyasaye Papa wefwe nende Omwami Yesu Kristo bamuhe esirenda nomulembe.

Tsikhabi tsio Mwoyo mu Kristo

³ Chende khwitsoomie Nyasaye, khandi Samwana Omwami wefwe Yesu Kristo! Okhuba mu Kristo, wakhukasia nende buli ikhabi yosi eyo Mwoyo musibala sio Mwikulu.

⁴ Nyasaye yali niyakhwela ifwe mu Kristo esibala nisisili okhulongwa, mbu khube abatsienukhu khandi ababula esikha siosi imbeliwe. Khulwo obuyanzi bubwe,

⁵ Nyasaye yali niyakhwahula khale mbu mu Yesu Kristo, khukholwe abaana baabe – yikhu nokhulalila khwe khandi nelichoomolie.

⁶ Niko akachila khumwitsomie Nyasaye khulwe esirenda sioluyali lulwe, khulwe esihanwa esia yakhuha butswa mu Mwanawe Omuyanzwa.

⁷ Khulwo okhufwa khwa Kristo, khuli nobununulwi, mbwobuno mbu okhulekhelwa tsimbi tsiefwe. Esirenda sia Nyasaye nesikhongo okhusila,

⁸ esia yakhuhelesia musichelo esikali. Mubuchesi bubwe bwosi nobulwenyukhu,

⁹ Nyasaye yakhola aka yali niyachooma okhukhola ma nakhumanyia libiso liokhwenyakhwe, elia yali nachomele okhuhesia okhubir'ra mu Kristo.

¹⁰ Obuloosie yibwo obwa Nyasaye yakhahesie olwe litukhu liokhukakhola liakhabe niliol'le, nokhuleera ebilonje biosi halala, siesindu siosi esili mwikulu nende musibala. Kristo nali omurwe kwabio.

¹¹ Ebindu biosi biekholekhanga okhulondokhana nende lichoomo nende okhulalila khwa Nyasaye. Naye Nyasaye yakhwahula fwesi khale khube abandu baabe khulwo obuyanzibwe mukhuhambana khwefwe nende Kristo, khulwe lichoomo lilie, okhweleta khulienya lilie okhurula mukhuchiaka.

¹² Kho ifwe abaranjil'la okhunaya khu Kristo chende khwitsoomie oluyali lwa Nyasaye.

¹³ Inywe khandi mwakholwa abandu ba Nyasaye olwa mwali nimuhuliye amang'ana kobwatooto ne niko Amang'ana Amalahi akamuleer'ra obuhonia. Mwasubila Kristo ma Nyasaye namurakhwo esimanyilo okhumanyia mbu muli abaabe khulwa okhumuha Omwoyo Omutsienukhu owayali okhukhusubisia.

¹⁴ Omwoyo tsana niye esihambilo siokhunyoola kosi aka Nyasaye yasubisia abandube. Ne ling'ana lino likhusubisianga mbu Nyasaye yakhanunule bosi abali abaabe. Khwitsoomie obukhongo bubwe.

Okhusaaya khwa Paulo khu Baefeso

¹⁵ Khulwe yako, nase okhurula olwa ndahulila akobusubili bwenywe mu Mwami Yesu, nende obuyanzi obwa muli n'nabwo khubandu ba Nyasaye bosi,

¹⁶ sindekhanga okhumukhupila Nyasaye embwo khulwenywe tawe. Mwitsul'langa mumasaayo kanje;

¹⁷ nireeba Nyasaye wo Mwami wefwe Yesu Kristo, Papa wefwe Omwene oluyali, amuhelesie Omwoyo owokhumukhola abachesi mbu mumumanye Nyasaye.

¹⁸ Sabanga Nyasaye mbu amufunule emioyo chienywe chilole obulafu bubwe, kho mumanye obunayi obwa yamulangila singa buli, nende singa tsikhabi tsili etsioluyali etsia yasubisia abandu baabe,

¹⁹ nende obwo obunyalibwe obukhongo buli. Obunyali yibwo obukholanga emilimo mwifwe, abasubila, khandi buhelana netsingufu etsiobunyalibwe obukhongo okhusila,

²⁰ obwa yasimukusis'sia Kristo okhurula mukhufwa, namwikhasia khumukhonokwe omusaatsa musibala siomwikulu.

²¹ Kristo yamihanga ikulu muno okhuyomba oburuchi bwosi obwomwikulu, obunyali, nobwami netsingufu; ali neliira eliyomba amera kosi akobunyali musibala sino nende esitsanga.

²² Nyasaye wahelesia Kristo obunyali khubindu biosi namuhana khwikanisa mbu abe omurwe khubindu biosi.

²³ Ekanisa nomubili kwa Kristo, okhwitsula khukhwe okhwitsusianga ebindu biosi buli habundu hosi.