AYUBU 1 - EBAIBO INZIENUKHU

Setani yamutema Ayubu

¹ Yaliho omundu owamenyanga musibala sia Usi owalangwa mbu Ayubu. Omundu tsana yali omulunji khandi oralikhwo nesikha tawe. Yekayakayanga Nyasaye narakholakhwo obubi bwosi.

² Yali nabaana abasiani bane nabataru nende abakhaana bataru.

³ Yali namakondi etsielefu tsine natsitaru, netsingamia etsielefu tsitaru, netsing'ombe elefu ndala nende etsipunda etsimia tsirano nende abarumikhili abenji. Kho omundu tsana yali omuhinda okhuyomba abandu bosi abamenya Ebukwe.

⁴ Abasiani ba Ayubu bakhol'langa lisabo munzu ya buli mulala khubo. Buli mulala yalinji nelitukhulie eliokhukhol'la mwo lisabo. Balanganga abakhaana babwe bataru okhuba abacheni m'masabo tsana okhulia nokhunywa n'nabo.

⁵ Olwa amatukhu kelisabo kalinji nilihweye, Ayubu yabuukhanga mukamba tsuli okwelitukhu elialondangakhwo khulwo khuhaana emisango emisambe khubuli mulala khubaanabo khulwo khubasiiya. Yakholanga mbwo sichila yapaalanga mumwoyokwe mbu haundi mulala khubo yakhaba niyakholeye Nyasaye tsimbi khulwo khumunyeka sila okhumanyilisia.

⁶ Litukhu elala abamalaika ba Nyasaye beetsa okhwelolesia imbeli wo MWAMI, Setani naye niyetsela mubo.

⁷ Kho OMWAMI namureeba Setani mbu, “Orul'le hena?” Setani naye namukalusia naboola mbu, “Rula okhulambuula esibala y'yi ne y'yi, nokhuchenda khusio siosi.”

⁸ OMWAMI namureeba Setani mbu, “Wahengelesisiekhwo omurumikhili wanje Ayubu? Abulaho omundu wosi khusibala siosi ofwana singa ye. Nomundu omulunji khandi orali nesikha tawe. Yandekayakayanga ise narakholakhwo obubi bwosi tawe.”

⁹ Setani nakalusia OMWAMI naboola, “Opaalanga Ayubu akhwekayakayanga ibe butswa noho?

¹⁰ Ibe omulindanga halala nabeinyumbaye nende biosi ebiali n'nabio. Omulaamilanga ikhabi mukosi aka akholanga khandi emianduchie neminji musibala siosi.

¹¹ Nebutswa luno noba niwakhamuhiniakhwo biosi ebiali n'nabio, alakhunyeka ibe habulafu.”

¹² OMWAMI nabool'la Setani mbu, “Lola, biosi ebiali n'nabio bili mubunyalibwo, habula oramusaalisia Ayubu omwene tawe.” Kho Setani narula imbeli wo MWAMI.

Abaana ba Ayubu bamululwa halala nemiandu chiabwe

¹³ Litukhu lindi olwa abasiani ba Ayubu halala nababotso babwe bali nibaliitsanga nokhunywa ewaini munzu yomwana wabwe omukhulundu,

¹⁴ omurume yetsa khu Ayubu naboola, “Tsing'ombe tsiali nitsilimanga, etsipunda natsio nitsiayanga ahembi n'natsio.

¹⁵ Nonoho Abasabea betsele nibakhuseera ma nibatsibukula tsiosi. Khandi bali okhwira abaayi netsinganga. Nise sienyene ohonokokhele okhwitsa okhukhubool'la.”

¹⁶ Olwa yali nasiboola, omurumikhili undi khandi niyetsa naboola mbu, “Likulu likhupile amakondi nilikasamba halala nabaayi ma nilibeera bosi. Nise sienyene ohonokokhele okhwitsa okhukhubool'la.”

¹⁷ Olwa naye yali nasiboola, omurumikhili undi khandi niyetsa naboola mbu, “Abakalidayo betsele mumikanda chitaru nibetsa okhukhuseera ma nibabukula tsingamia. Khandi bali okhwira abarumikhilibo bosi. Nise sienyene ohonokokhele okhwitsa okhukhubool'la.”

¹⁸ Olwa yali nasiboola, omurumikhili undi khandi niyetsa naboola mbu, “Abaanabo abasiani nabakhaana bali nibaliitsanga nibanywa ewaini munzu yomwana wabwe omukhulundu,

¹⁹ ne lolako, omuyeka kweikhumaatsi kurul'le elubeka wemusitsiimi. Kufunakile inzu etsikona tsiosi tsine, nayo nekwila ababuukha yabo nibafwa bosi. Nise sienyene ohonokokhele okhwitsa okhukhubool'la.”

²⁰ Ma Ayubu nasinjila narandula tsingubotsie khulwesibeela. Yabeka omurwekwe olwale ma nakwa hasi mafungama ma niyekayakaya Nyasaye.

²¹ Yaboola mbu, “Musibala ndetsa esiahonyo khandi ndakharulemwo sila esindu. OMWAMI niye owahaana, khandi OMWAMI niye ubukuuye. Eliira lilie litsomibwe.”

²² Mu yako kosi akekholekha Ayubu siyayonakhwo, kata okhutula Nyasaye tawe.