ABALAWI 1 - EBAIBO INZIENUKHU

Emisango chiokhusambwa emichima

¹ OMWAMI yalanga Musa nali Mwiheema liokhubaho khwo MWAMI ma namuhelesia amalako kano

² khulwa Abaisiraeli okhulonda olwa bahaananga emisango chiabwe. Olwo omundu wosi mwinywe ahaananga omusango kwomuruko, okhwola aleere ndala khutsing'ombe tsitsie nohomba elala khumakondi kaake nohomba ndala khutsimbusi tsitsie.

³ Nikali ahaananga ndala khutsing'ombe tsitsie singa omusango kwokhusambwa, okhwola aleere ing'ombe echulukhi eralikhwo nobulema bwosi tawe. Okhwola achileere habwinjil'lo bwe Liheema liokhubaho khwo MWAMI kho OMWAMI abe onyala okhumuhuchil'la.

⁴ Omundu ohaananga omusango yikwo are omukhono kukwe omusaatsa khumurwe kwechulukhi y'yo ne nayo elahuchil'lwa singa omusango kwokhuhiniaho tsimbi tsitsie.

⁵ Yer're echulukhi y'yo mubwinjil'lo bwe Liheema, ne abasiani ba Haruni abakholanga omulimo kwobwesaalisi bahaane amatsahi khu MWAMI ma khandi bakasundule khutsimbeka tsiosi tsine etsiolusambwa oluli mubwinjil'lo bwe Liheema.

⁶ Ma mwene muruko yetsa okhunyenya ahiniekhwo liseelo ma akukhalanie mubitonye,

⁷ abesaalisi nabo barechekhe tsikhwi khulusambwa ma bahambiemwo omul'lo.

⁸ Abesaalisi betsa okhura ebitonye bieinyama mumul'lo, omurwe halala nesinya nibilimwo.

⁹ Mwene muruko okhwola asaabe ebiomunda nende ebilenje bieinyuma ne omwesaalisi orumikhanga olwene yilwo alasambila omusango kwosi omuchima khulusambwa. Okhuhunya khwebiokhulia ebihanwanga yibi khu yanzisianga OMWAMI.

¹⁰ Omundu naba nahaana elala khumakondike nohomba ndala khumbusi tsitsie okhwola libe limiiku nohomba ekhole sila obulema bwosi.

¹¹ Yer're limiiku yilio nohomba ekhole y'yio elubeka wesinyolu wolusambwa, ne abesaalisi basundule amatsahi komusango yikwo khutsimbeka tsiosi tsiolusambwa.

¹² Omundu uyo namal'le okhukhalania omusango yikwo, omwesaalisi orumikhanga olwene yilwo abiikhe ebitonye biosi bine khumul'lo, omurwe halala nende esinya nibilimwo.

¹³ Okhwola omundu uyo asaabe ebiomunda nende ebilenje bieinyuma, ma omwesaalisi ahaane omusango yikwo khu MWAMI, ma akusambile khulusambwa nikuchiman'ne. Okhuhunya khwebiokhulia ebihanwanga yibi khuyanzisianga OMWAMI.

¹⁴ Ne omundu naba nahaananga khu MWAMI linyonyi singa omusango kwokhusambwa, okhwola libe likhuulwi nohomba esituka.

¹⁵ Omwesaalisi alalihaana khulusambwa, naborola likosi lialio ma asambe omurwe kwalio khulusambwa. Omwesaalisi alanyul'lusia amatsahi kalio khulubeka lwolusambwa.

¹⁶ Alahinia libotselo nende emiilo chialio ma abifuube khulubeka webukwe wolusambwa ahelikokhe litsukhwanga.

¹⁷ Omwesaalisi alatiila tsimbaha tsialio ma aliabule, nebutswa aralikhalaniamwo hakari tawe. Ma omwesaalisi alisambile khulusambwa nilichiman'ne. Okhuhunya khwebiokhulia ebihanwanga yibi khuyanzisianga OMWAMI.