2 PETERO 1 - EBAIBO INZIENUKHU

¹ Ise Simoni Petero, omurumikhi khandi omurumwa wa Yesu Kristo, mandikanga okhubir'ra mubutsienukhu bwa Nyasaye wefwe nende omuhonia Yesu Kristo khwinywe abamala okhuhebwa obusubili bwobukusi obutinyu singa obwefwe.

² Esirenda sia Nyasaye nende omulembe bibe khwinywe mubwitsulu okhubir'ra mukhumumanya Nyasaye nende Yesu Omwami wefwe.

Omulango kwa Nyasaye nende okhwahulwa

³ Obunyali bwa Nyasaye obutsienukhu bwakhuhelesia ebindu biosi ebiakhwenyanga khe khumenye obulamu obwokhusubila Nyasaye okhubir'ra mukhumumanya khwefwe okhwe uyo owali okhukhulanga mbu khusange mubukhongo nende obulahi bubwe omwene.

⁴ Munjila iyo wakhuha ebihanwa ebikali ebiobukusi ebia yakhusubisia, mbu khulwa ebihanwa yibio mube abanyala okhulekhana nende okhwekomba okhubi okhuliho musibala, ma mwitse okhusanga n'naye liiba lilie eliobunyasaye.

⁵ Khulwe esifune siene yisio, mukhole esinani okhumeeta obulahi khubusubili bwenywe, ne khubulahi bwenywe mumeetekhwo obumanyi;

⁶ khubumanyi bwenywe mumeetekhwo okhwelinda abene; khukhwelinda abene khwenywe mumeetekhwo okhwefwila; khukhwefila khwenywe mumeetekhwo obunyasaye;

⁷ khubunyasaye bwenywe mumeetekhwo obuyanzi bwobuta khandi khubuyanzi bwobuta mumeetemwo obuyanzi obwinji.

⁸ Nimuba namang'ana yako kosi mubwinji kalamukhola okhuba abakholi abalahi khandi abobukhala mukhumumanya Omwami wefwe Yesu Kristo.

⁹ Omundu orali namang'ana yako nomubofu, sanyala okhulola khandi wayibil'la mbu wamala okhutsienulwa okhurula mutsimbi tsitsie tsiakhale.

¹⁰ Khulwe yako, abaana befwe, muteme butinyu okhulomba omulango kwa Nyasaye khwinywe nende okhwahula khwe khwinywe okhuba okhwokhuhindila mubulamu bwenywe; nimuba nimukhola mbwo simwakhakwa okhurula khubusubili bwenywe tawe.

¹¹ Munjila iyo namuhebwe obunyali bwosi obwokhwinjila mu Bwami bwe inziayo obwo Mwami ma Omuhonia wefwe Yesu Kristo.

¹² Khulwe yako nanzilil'le okhumwitsusianga amang'ana yaka khasotso, kata nikaba mwamala okhukamanya, ma muli abaralilu mukatooto aka mwanyoola.

¹³ Ndolanga nobulahi khwise, okhumusimulusia nende okhumwitsusia khumang'ana yaka oluhono lwasimenyele.

¹⁴ Manyile mbu nanyanguhe okhura sibeka omubili yiku okufwitsanga, singa obwo Mwami yali okhumbool'la habulafu.

¹⁵ Nakhole kosi akanyala okhumunyool'la injila yokhwitsul'la amang'ana yaka amatukhu kosi inyuma wokhufwa khwanje.

Abarumwa balola obukhongo bwa Kristo

¹⁶ Olwakhwali okhumwechesia amang'ana kokhwitsa khwo Mwami wefwe Yesu Kristo, sikhwarumikhilanga tsimbakha tsiabutswa tawe. Khwalola obukhongo bubwe nende tsimoni tsiefwe abene.

¹⁷ Khwaliho olwa Nyasaye Papa yamuhelesia oluyali nende obukhongo, olwomwoyo kwetsa khuye okhurula khu Nyasaye owo Bukhongo obukali, nikuboola, “Uyu niye Omwana wanje owandayanza; owasangal'langa okhusila.”

¹⁸ Khandi ifwe abene khwali okhuhulila omwoyo yikwo okhurula mwikulu olwakhwali nikhuli n'naye khusikulu esitsienukhu sila.

¹⁹ Khe amang'ana kabaroobi baboola kakhumanyianga ling'ana yilio; nenywe mukholanga obulahi nikali mukabukulanga, sichila kali singa etaya eyakhanga ahesilima sili okhwola Litukhu yili olwabwakhasie ma obulafu bweyasulwe yamukamba bwakhakhe mumioyo chienywe.

²⁰ Okhuyomba yako, kata mbwo, mwitsulile mbu saliho omundu wosi onyala okhwinoosia akoburoobi obuli mu Mahandiko Amatsienukhu tawe.

²¹ Okhuba amang'ana koburoobi sikarulakhwo khubulalilo bwomundu tawe, nebutswa abandu abali hasi wobunyali bwo Mwoyo Omutsienukhu baboola amang'ana akarula khu Nyasaye.