Yakobo 1 - Ecorit Aŋejuk 2003

¹ Ani alia Yakobo, egiamani olo Hollum buo fe a holo Yesu Kristo, Lamonye. Efonya ni aati Hollum 'daŋ, hulle isarrahini 'to afau 'daŋ.

Neruk iko Olofioro

² Illarak iko haniyarak hoŋ, omijana jio osiru itai amiji elle irumana itai awoi ikemiti 'daŋ;

³ nyio, imijana itai jio alla akemi eruk hatai, iyaŋuno adi inyi adihan jihatai.

⁴ Ihumata imijio, ijiara adihan hatai obobolororo oŋida bati luŋa ayiji ottuba jihatai, obeŋ riŋ aŋaramahi.

⁵ Buo alla abeŋi olofioro jio obo alatai, ijiara luŋa inyi omojo jio Hollum isiarani adi jihonyi. Nyio, imorot Hollum jio aati 'daŋ buo fe isiorio ta ayiji taji.

⁶ Ati elle imojoti itai, iruhoto luŋa, hèkuayati. Lia, ollo okuaya 'to, ara inyi ihuo apoŋia poŋia hari enne ittok, onno ohucio oyyami.

^7-8 Atulo ollo obuanya egigilo honyi buo fe ittallik inyimuna ariŋ anna awak inyi ihanio, hèlaha atulo ihuo alia, igigilo jio efuotu adi inyi obo ariŋ jio Lamonye.

Elociaŋ iko Asaman

⁹ Ijiara atulo Kristiani elle ilociaŋ 'to omuno alla akaf Hollum inyi ahide.

¹⁰ Ijiara buo fe asamak Kristiani omunoi elle itafiaha Hollum isi. Otuhoroi adi asamak ihuo ayaburita miyaŋ.

¹¹ Iduoŋ oloŋ, ette ibolori, ette isuak amiyaŋ, buo ayaburita honyi ette idouna, ette elamani hosi ituhoro. Ihuo nyia buo fe, ofuoi adi ituk asamak, buo isi ihanie egemita hosi huttoloŋi.

Akiemio iko Esusuyo

¹² Hotomunohi hia hullo odihuni 'to ettigemita nyio, alla amiri isi ekemiti hunia, ara adi nesu edumit hosi. Nesu ninyia ocorok Hollum jio hia hulle itabuori 'to atajia hosi jihonyi.

¹³ Elle iduoŋi esusuta ihuo hunia jio obo, hèlaha luŋa inyi ojio, “Ofuonni esusuta huna jio Hollum.” Nyio, ittallihi ikem Hollum ta arrohoji, buo fe Hollum ittallik ikem obo atulo ta arrohoji.

¹⁴ Ati iduoŋi esusuta jio atulo elle italohuni ewahiti honyi hunno orrohoji 'to, ette itisiabara inyi.

¹⁵ Buo elle ifuti ewahiti hunno orrohoji 'to hunia itua tulo, ette isi iyaŋuno eyyau; buo elle ifut eyyau itua tulo, iyaŋuno inyi naye.

¹⁶ Illarak iko haniyarak hoŋ, hèlaha inyobi itai!

¹⁷ Nyio, ottu esiorio onno oyyu 'to agalik 'daŋ tedou. Ottu inyi jio Hollum, Layyani olo efaŋiti huttedou. Obeŋ Hollum iloitotio, buo fe obeŋ iyaŋuno edumele te eloitotio.

¹⁸ Ta awahan ottononyi, efuotu nyia nesu aŋejuk te ekiana honyi ono elahode jio, oŋida era etterita ifuotuniere olohuo anna agalik 'to erre 'daŋ hunyia oyyeu inyi.

Etaniŋio iko Ehanio

¹⁹ Illarak iko haniyarak hoŋ, ogiluna erre huna! Ijiara itai 'daŋ ababo ihumata itayirio onno oyyu, hèrruhata ekiana, ottoŋoto ejoria.

²⁰ Obeŋ eloŋojita aŋatak atulo ihaniere onno oyyu ihuo awak Hollum.

²¹ Tania, idehina luŋa erre hunno orrohoji 'to iko ajujon tajia. Oniŋiete Hollum, ifuotuna ekiana enne ihanak inyi itajia hatai; ekiana ania oremik italahuna itai.

²² Hènyobiete ahuattek hatai te etayirio ekiana honyi ijiai; ihaniete luŋa ihuo ojio inyi.

²³ Elle itayiriete itai ekiana, buo ibiaŋata ihaniete ihuo ojio inyi, isata itai ihuo atulo elle iŋiŋiala 'to ahuan honyi ta amiraya.

²⁴ Ihum inyi iŋiŋel ahuan honyi, ette leten addi, teya teya ette iguoro owon arijiori honyi aŋai.

²⁵ Ati elle ihumata itai ihen buo fe iduloro ehenio efahita hunno oyiji 'to, hunne iyaŋunie 'to ahohino jio aati, buo ibiaŋata isata a hetayirak ijiai, hullo oremihini 'to iguoro, ati ihaniete itai ihuo ojiori efahita; itamuno adi Hollum itai.

²⁶ Elle igigiloi omuk hulatai jio, egiama isi ihuo awak Hollum, buo ittallihi inef aŋadiafa hosi, ara egiama hosi asai. Inyobie isi ahuattek hosi.

²⁷ Ijiara luŋa ekoi manya enne itamuno 'to Hollum Monye hotoliboro bebe bebe. Ogottiette luŋa onno oyyu ahohio iko ehidahi hunno owoni 'to iko ettigemio. Hèlaha arrohoji afau ana ittarroho itai.