Tito 1 - Ecorit Aŋejuk 2003

¹ Ani alia Paulo, egiamani Hollum buo fe ara elefahata Yesu Kristo. Onyimuni nyia nani buo fe ifahuni iluahiere neruk ono lonyimot Hollum buo fe itahutaniere jihosi nelahode enne ittiyenio neruk hohoi;

² anna ara 'to te eyihina jio nesu onno osio 'to 'tulaŋ, ninyia acorok Hollum many berien. Hollum, ollo obeŋ 'to ogesem.

³ Ania, buo ninyia attu oloŋ anna awak inyi, ette inyi italeyehina asayyo hunia jihoŋ. Isiori nyia isi jihoŋ, buo ni ette ittittoyo isi te elohittok ono Hollum Etalahani hohoi.

⁴ Te neruk onno owon 'to jihohoi, egiorok ni awaraga ana jihoi Tito, ira iyye ihuo lonyi hoŋ ahode. Ijiara Hollum Monye iko Kristo Yesu etalahani hohoi, isiori jihoi ayiji taji iko nelik taji.

Egiama Tito Krit

⁵ Edehi nyia ni iyye Krit jio, oŋida iyye ihuhumak erre hunyia hobeŋi 'to otuhonie, buo fe oŋida inyimu elettaha hulo eluluŋi heruhok jio aborejin gala 'daŋ ihuo eramak nyia ni iyye jio:

⁶ ijiara luŋa elettok obeŋ owon iko epali, hèlaha iriaha; ijiara buo fe luŋa aduri honyi arai a heruhok. Hèlaha arai ahutuhak kuyya amiosok.

⁷ Ara elettok iluluŋ heruhok a hattoŋoni igiama Hollum. Hèlaha luŋa inyi owon iko obo epali. Hèlaha inyi itadara kuyya orroho ta ajore, kuyya aharumani, kuyya a hamunoni ŋalafa kuyya buo fe a hamunoni robiyaa.

⁸ Ijiara luŋa ifuotutta aati ihaŋ honyi, buo fe ara oloyijio. Ijiara luŋa inyi ihum igigilo onno oyyu, amanya onno obis, amanya onno olibo buo fe ihum ittoŋotio ahuan.

⁹ Ijiara luŋa inyi ogottiere asayyo hunna arai 'to hode ihuo ittiyanani nyia jihonyi; oŋida bati inyi oremik iluak aati hullomuk te ettiyenita hunno obisi 'to, buo fe itahutak epali hia hulle ihari 'to ettiyenita hunia.

¹⁰ Nyio, oluaji aati hullo obeŋi abaŋi elettaha; agalik ti aati hunyia ijifatie 'to emojiti Yudei. Itafittaŋie isi aati te ekikiana asai asai.

¹¹ Ijiara luŋa itaduahini isi nyio, ittarrohoji isi ahaŋitek 'daŋ te ettiyenio erre hunno obeŋi 'to osiruni jihosi ittiyeniere. Ittiyenie isi erre hunia irumaniere arobiyaa.

^12-13 Obo atulo Krit nyia ikilu ta ahuan honyi jio, “Arai aati Krit toloŋi agesomok, aciaŋi hunna afarai 'to buo fe aŋarujok hulle iboyoji.” Tania, iŋerejanie onno orroho jihosi, oŋida bati isi obisi jio neruk hosi,

¹⁴ ette biaŋan inyiak golihina jio eyabita Yudei iko efahita hunno ofuonni 'to jio aati hulle ihari 'to nelahode.

¹⁵ Olibori erre 'daŋ jio aati hullo olibori atajia; buo obo ariŋ obeŋ olibo jio aati hulle iboti tajia iko jio hullo obeŋi 'to owoni iko neruk; nyio, arrohoji ossi hosi buo fe atuajin hosi oye.

¹⁶ Ojiori isi jio emijak isi Hollum, buo ehanita hosi itahutani jio otimoi isi inyi. Orrohoji isi bebe; omesie isi Hollum, buo fe obeŋi osiruni ihaniere obo ariŋ onno oyyu.