Roma 3 - Ecorit Aŋejuk 2003

¹ Agalihini ti Yudei Alufajak ta anyio? Kuyya, owon ti obo ayiji jio aboso?

² Aafe, ara ihuo nyia te ekotia 'daŋ! Nyio, ahosiere do, isiarak nyia Hollum asayyo honyi jio Yudei.

³ Buo alla abeŋi omuk hulosi ogottierek asayyo Hollum hunia; itahutak ati inyi jio, obeŋ adi Hollum ogottiere ekenita honyi?

⁴ Obeŋ 'tuŋ! Duadi bu ogesemi aati 'daŋ, arasa Hollum ikiana ahode hode, ihuo igioroni ibuk Honyi jio; “Ijiara luŋa ekiana hoi itahutak abisan hoi. Elle itiwwahie iyye, ijiara luŋa omijani jio ibis iyye.”

⁵ Ejio adi anyio elle itahutani epalita hohoi jio obisi ehanita Hollum? Eremik ti jiaran jio, ipal Hollum elle ettigemio inyi hohoi? (Ekiana ni jihatai ihuo atulo.)

⁶ Obeŋ 'tuŋ! Alla abeŋ duo aŋocio Hollum obis, oremik duo inyi aŋai iŋot eram waati 'daŋ?

⁷ Buo elle iyaŋuno agesemi hoŋ akuatan jio Hollum te etahutana honyi 'tel 'tel elahode Hollum, nyioti arasai iŋotonia jihoŋ eyyau?

⁸ Nyioti ebeŋ ejio jio, “Héyyauna oŋida iyaŋuno ayiji”? Hode, ittarrohojie omuk aati afure hoŋ te etisiahina hosi nani jio, ekenita hoŋ luŋa hunia! Osiru luŋa aŋotonia epali jihosi.

Obeŋ obo Abisani

⁹ Anyio 'tadi? Egalik ti hohoi Yudei Alufajak ta anyio? Obeŋ riŋ! Eramak duo ni itai jio, owoni Yudei 'daŋ arabotie iko Alufajak igolon ono eyyau.

¹⁰ Ihuo igioroni Ibuk Hollum jio, “Obeŋ obo ollo obis 'to,

¹¹ obeŋ obo elle ilofioro 'to, kuyya elle itahabuyo Hollum.

¹² Ayitoni aati 'daŋ Hollum oruoŋitek. Ipali isi 'daŋ; obeŋ obo, ara duadi bu abotie, elle ihanio 'to onno oyyu.

¹³ Ifut enyobio onno orroho 'to bebe ihutuhe hosi. Ottutta agesemi onno orroho 'to ta ŋadiafa hosi; buo fe eyeri munu ottutta to hutuhe hosi.

¹⁴ Ifuti etuhe hosi iko epitita hunno oduari 'to 'tek 'tek.

¹⁵ Itawahai ahuattek hosi iriafuniere iko ittohori atulo.

¹⁶ Idiaharai isi arrohoji iko ettigemio jio amasik 'daŋ hunno ofuarik isi.

¹⁷ Otimoi isi amanya te nelik tajia.

¹⁸ Obeŋi atajia hosi abaŋi Hollum.”

¹⁹ Ihuania, emijak jiojio, ikianai erre 'daŋ hunne igioroni Ifahita, to hia, hulla amanyai te Efahita jio, oŋida obo atulo obeŋ owon iko obo eliet. Tania, oŋot adi Hollum eram tulo 'daŋ ta fau.

²⁰ Nyio, to hosiere Hollum, obeŋ tulo ara a habisani te ehanio hirre hunna awahi Efahita. Nyio, Efahita itamijanani hohoi eyyau.

Aŋai Itabisani Hohoi iko Hollum

²¹ Ati ihuania, italeyehini ekoi enne ihananiere Hollum aati ahabisak, buo obiaŋara te Efahita; duadi bu arai Efahita iko ekianak Hollum asuuti honyi.

²² Itabisak Hollum aati te eruk hosi jio Yesu Kristo. Ihan inyi ariŋ ania jio aati 'daŋ hulle iruhi 'to jio Kristo, nyio, obeŋ obo alufaji owon ihiji waati.

²³ Iyyauni aati 'daŋ, ania, alamajak akuatan Hollum isi 'daŋ.

²⁴ Ati te esiorio ono ayiji taji Hollum, itabisani isi 'daŋ to Kristo Yesu, elle italahu 'to isi.

^25-26 Isio nyia Hollum inyi irari ehumi, to nooto honyi, oŋida ohohini eyyata waati, te neruk hosi jihonyi. Ihan nyia Hollum ihuo nyia, itahutaniere abisan honyi. Nyio, nyia berien odik nyia inyi aati, buo fe ibasata eyyata hosi. Ati jio oŋitek huno ahana, ittallik Hollum ibasana eyyata waati; nyio, awak inyi itahutana abisan honyi. Te ekoi ania, itahutak Hollum jio, inyi ta ahuan honyi, abis inyi buo fe jio, eyaŋuno inyi abisan jio aati 'daŋ hulle iruhi 'to jio Yesu.

²⁷ Eremik ti itadara te eram nyio? Obeŋ nyio! Nyioti etadara? Ara ti inyi ta aniŋio Efahita? Obeŋ, etadara te eram ono neruk.

²⁸ Nyio, eruk jiojio, itabisani atulo jio Hollum te eruk, buo obiaŋara ta aniŋio hirre hunno ojiori efahita.

²⁹ Ara soho Hollum a Hollum olo Yudei hama? Obeŋ soho inyi buo fe ara a Hollum olo Alufajak? Aafe, ara buo fe inyi aholosi.

³⁰ Owon Hollum abotie. Inyi adi ihanak Yudei ahabisak to hosiere honyi te neruk hosi; buo fe itabisak Alufajak te neruk hosi.

³¹ Itahutak ti ania jio, etapuak Efahita te neruk? Obeŋ 'tuŋ! Ati, etagol atibuo efahita.