Matteyo 28 - Ecorit Aŋejuk 2003

Ebuhuna Toye

¹ Ihalu oloŋ Sabatto, ninyia iliaha ataŋatio motie ono Dominika, ette Maria Madalina iko Maria ebotie iwany imijuniere elume.

² Teya teya, odioto nyia olokitik onno orroho bebe, ette ajilo olo Lamonye ittuna tedou, ette ittabororo amoruo ania addi, ette itoŋo ihide honyi.

³ Opipiak nyia omom honyi ihuo ahilai buo aboŋojin honyi obuori biny biny ihuo eriri.

⁴ Inef nyia abaŋi erririak many ikikirorik, ette rahan ihuo ayaak.

⁵ Ati ojio nyia ajilo jio aŋoruo hua jio, “Hèbaŋata, amijak ni jio ittifiati itai Yesu linyia isihoni likruce.

⁶ Abeŋ inyi tene, itubuhuni inyi ihuo ninyia ojiari inyi. Ifuanna omijata amaji ninyia awanari inyi.

⁷ Ihuania, ifuatta kokuak iramaniere lejifak honyi jio, ‘Itubuhuni inyi toye buo ihuania alo inyi Galilea to osiere hatai, ifuatta adi igonyuna inyi teya!’ Isi hunia erre hunne eramak ni itai.”

⁸ Ania, ette isi iruharu kokuak telume buo abaŋi. Ati omunoi nyia isi bebe, ette iŋioron iramaniere jio lejifak.

⁹ Oruaŋanie nyia isi iko Yesu turunyaŋ, ette inyi jiaran jihosi jio, “Ogotto.” Ofuoni nyia isi many jihonyi, ette inef eejek honyi itahabuyere inyi.

¹⁰ Attati Yesu jiaran jihosi jio, “Hèbaŋata, ifuatta iramana illarak hoŋ, ijiara ofuoi Galilea, buo diya, ofuoi adi isi igonyuna ani.”

Iramani Erririak Erre hunyia Iduoŋi 'to

¹¹ Ninyia hofuoi aŋoruo hunia, acaharai nyia omuk hulo erririak ibore gala iramaniere ehumak elettaha erre 'daŋ hunyia iduoŋi 'to.

¹² Ottubanie nyia ehumak elettaha iko lahou, ette iwwahuna, ette isiarana agurusi arriai jio erririak,

¹³ ette jiaran jio, “Iramana aati jio, ofuonni nyia lejifak honyi nyia arue, ette ihahalaru ahuan honyi, buo itai ijototi.

¹⁴ Buo elle itaniŋu mondir eram ania, ekiana adi hohoi jihonyi. Ebeŋ adi hohoi eŋatak obo eram ottu jihatai.”

¹⁵ Ania, ette isi ifuotuna agurusi hunia, ette ihanio ihuo iramani nyia jihosi, buo eram ania ette isarrahina jio aati Yudei 'daŋ many ahana.

Oleyehino Yesu jio lejifak honyi

¹⁶ Ofuoi nyia lejifak hula 'tomon habotie Galilea, jio adoŋe ninyia iramak Yesu jihosi ifuari.

¹⁷ Ninyia igonyuni isi Yesu, ette isi itahabuyo inyi, ati okuayai nyia omuk hulosi.

¹⁸ Attati Yesu ihutonia, ette jiaran jihosi jio, “Isiarani jihoŋ elohittok ettedou iko atta fau.

¹⁹ Tania, ifuatta jio aati 'daŋ, imasik 'daŋ, ihanata isi ahejifak hoŋ, itifuotonia isi batisimo ta afure Monye iko ono Lonyi iko ono Loholio Olibo.

²⁰ Ittiyeniete buo fe isi oŋida abaŋi erre 'daŋ hunyia eramak ni itai. Awon adi ni ikatai many isidi fau.”