Matteyo 27 - Ecorit Aŋejuk 2003

Iyarai Yesu Ihosiere Pilato

¹ Nyia motie berien iwwahuni nyia ehumak elettaha 'daŋ iko lahou arabotie ittohori Yesu.

² Ifiti nyia isi inyi ta aririk, ette iyaru jio Pilato, amondir olo gala Roma.

Aye ono Yuda

³ Ninyia amijak Yuda, etinyiaŋani, jio aŋotoni naye jio Yesu, ette inyi iloit ataji honyi, ette inyiaharu hunyia robiyaa atomuana hunihoi jio ehumak elettaha iko lahou,

⁴ ette jiaran, “Eyyau ni itinyiaŋaniere latulo ollo obeŋ eyyau jihonyi.” Itarraŋi nyia isi jihonyi, “Hunohoi anyio? Ottenu erre hoi hama!”

⁵ Attati Yuda iruoŋoro arobiyaa hua itua Haji emojit enne ittokon, ette leten igororo.

⁶ Ati, ohuruni nyia ehumak elettaha arobiyaa hua, ette jiaran, “Arobiyaa hoto huna. Tania, obeŋi efahita hohoi aŋatani isi ottunani ittunit ono Aaji emojit enne ittokon.”

⁷ Ninyia iwwahuni isi, ette iduhuna arobiyaa hua, ette inyiaŋuniere Amana ono Layyani Tobuaha, oŋida onuhattarik aterejok.

⁸ Ania, iloŋorik amana nyia “Amana Hoto” many iko ahana.

⁹ Itasirunierek ekiana Yeremia ekianani Hollum, ninyia ojiari inyi jio, “Iduhuni isi arobiyaa atomuana hunihoi, arobiyaa hunyia iduhuni onyiok Israele edumit honyi,

¹⁰ ette inyiaŋuniere Amana ono Layyani Tobuaha, ihuo iramak nyia ani Lamonye.”

Ifiyo Pilato Yesu

¹¹ Owotia nyia Yesu ihosiere mondir olo Roma, linyia ifiyo 'to inyi jiojio, “Iyye Hobu Yudei?” Itarraŋ nyia Yesu ojio, “Iyye ijio ihuo nyia.”

¹² Ati obeŋ nyia inyi itarraŋ erositi huno ehumak elettaha iko lahou.

¹³ Attati Pilato jiaran jihonyi, “Ibeŋ iyye itaniŋu erre arriai hunne itisiahinierek isi iyye?”

¹⁴ Ati obeŋ nyia inyi itarraŋ, ara duadi bu obo abotie jio etisiahita hua, many illillihari mondir bebe.

Aŋotonia Ye jio Yesu

¹⁵ Ohohitta nyia mondir olo Roma atulo babus abotie to oloŋ ono neyom ono allaŋan, alla awahi aati.

¹⁶ Owon nyia obo atulo babus elle idiefer bebe, afure honyi Yesu Barabas.

¹⁷ Ninyia attubanie aati arriai, ette Pilato ifiyo isi jiojio, “Iwahata itai ahohi ni alali, Barabas kuyya Yesu elle iloŋoi Olonyimoto?”

¹⁸ Omijak nyia inyi jio inefunie nyia isi Yesu jihonyi ta ahaini hosi.

¹⁹ Ninyia howon Pilato itua haji lokikoi, ifahu nyia ŋoruoi honyi jihonyi eram jio, “Hèjiŋak jio eram ono atulo ollo obeŋ ipali, nyio, ettigemi ani arigiai honyi duo arue.”

²⁰ Ati isusuye nyia ehumak elettaha iko lahou Yudei aati oŋida iramani Pilato ohohi jihosi Barabas buo itattoho Yesu.

²¹ Ati inyiak Pilato ifiyo isi jiojio, “Iwahata itai ahohi ni jihatai ŋai tehiji hula arrihai hulo?” Itarraŋi nyia isi jio, “Barabas!”

²² Buo Pilato ette ifiyo isi ojio, “Ehan 'tadi ni anyio jio Yesu elle iloŋoi Olonyimoto?” Itarraŋi nyia isi 'daŋ jiojio, “Isihonia inyi likruce!”

²³ Ati ifiyo nyia Pilato isi jio, “Anyio ipali enne ihan inyi?” Ati iwuwoŋitai nyia isi bebe jiojio, “Isihonia inyi likruce!”

²⁴ Ninyia igonyu Pilato jio ettallik inyi inyiak ihan obo ariŋ, nyio, itterio nyia aŋalafa, iduhu inyi omuk aari, ette ifinia ihosiere waati, ette jiaran, “Abeŋ ni awon jio aye atulo olo! Eram hatai ania!”

²⁵ Buo aati 'daŋ ette itarraŋ ojio, “Ijiara nooto honyi oŋiyo hohoi iko lonyirok hohoi.”

²⁶ Attati Pilato ihohina Barabas jihosi, ette itabak Yesu, ette isiarana inyi jihosi ijiara isihoni likruce.

Osuhotierek Oseŋer Yesu

²⁷ Attati oseŋer Pilato iyaru Yesu ihaŋ enne ittok ono Mondir, buo eluluŋ hosi 'daŋ ette ittubanio iger Yesu,

²⁸ ette ihouna aboŋojin honyi 'daŋ addi, ette itiyyafana inyi aboŋo anariet.

²⁹ Attati isi iyyir egoria hikua, ette itiyyafana ihou honyi, ette itaŋuahina atelek ihani iŋet honyi, ette irigoŋo ihosiere honyi, ette isuhotiere inyi jiojio, “Hobu Yudei Moŋ!”

³⁰ Omitani nyia isi amilak jihonyi, ette ibak ahou honyi ta atelek.

³¹ Ninyia attohuni isi asuhotiere inyi, ette isi ihouna noduo boŋo, ette itayyafana inyi aboŋojin honyi, ette irihoro inyi addi isihoniere likruce.

Isihoni Yesu Likruce

³² Ninyia afuoi isi, oruaŋanie nyia isi iko obo atulo olo Sirine, afure honyi Simone, ette oseŋer italoronia inyi akruce Yesu ta ajore.

³³ Ninyia afanyi isi jio amaji enne ifurani Golgota, onno ojio 'to jio, “Amaji Hotio Hou.”

³⁴ Diya, isiarani nyia isi jio Yesu afino enne iŋala iko obo ariŋ onno odua. Ati ninyia iniŋ Yesu, ette inyi ihara imat inyi.

³⁵ Isihoni nyia isi inyi likruce, ette ihihor aboŋojin honyi te ehutuŋai.

³⁶ Ania, ette isi itoŋo diya irririari inyi.

³⁷ Igioroni nyia isi etisiahita huna totto hide hou honyi jio, “Yesu olo, Hobu Yudei.”

³⁸ Isihoni nyia buo fe isi omuk ahahalak likrucehien: abotie tetteŋet honyi, buo ollobo tettehorroŋ honyi.

³⁹ Attati aati 'daŋ hunyia adahai 'to tolia inninniŋa ossi hosi, ette sehina jihonyi emoriti jiojio,

⁴⁰ “Ijio nyia bu iyye jio iremik iyye itattur Aaji emojit enne ittokon buo inyiak iduhonia ihalu oŋitek hunihoi! Italuahu bu ahuan hoi, elle ira iyye Lonyi Hollum! Ollu ifau to hide Kruce.”

⁴¹ Ihuo nyia buo fe, itafittaŋie nyia ehumak elettaha inyi, isi iko ettiyanak ifahita, buo lahou ojiori jio,

⁴² “Italuahu nyia inyi aati hullomuk, buo ittallik italuahuna ahuan honyi. Obiaŋara soho inyi hobu Israele? Ijiara inyi ollu to hide kruce, buo adi hohoi ette iruk jihonyi.

⁴³ Iyihi inyi jio Hollum buo fe akafatio ahou jio inyi Lonyi Hollum. Oyyu, hamijiete alla awak Hollum italuahuna inyi!”

⁴⁴ Ette buo fe ahahalak hinyia isihoni ikonyi likrucehien morio inyi ihuo nyia.

Aye ono Yesu

⁴⁵ Ninyia ara akil fanni, ette edumele iriok 'tir 'tir afau 'daŋ many otuk asahien hunihoi.

⁴⁶ Ninyia ara ihuo asaa etahunihi otto otoriai, ette Yesu iluaha jiojio, “Eloi, Eloi, lema Sabakttani?” onno ojio 'to jio, “Hollum hoŋ, Hollum hoŋ, nyio ibasak iyye nani”

⁴⁷ Attati omuk aati hinyia owotia 'to diya itayiruna inyi, ette jiaran, “Iloŋo latulo olo Elija!”

⁴⁸ Teya teya, ette obo olosi iduhuna espony, ette difonia itua fino enne iruattiŋo 'to, ette ihasana itelek, ette igumana jihonyi oŋida ojur.

⁴⁹ Ati ojiori nyia hullomuk jio, “Itilauna, hamijiete kuyya ollo ottu adi Elija italuahuna inyi!”

⁵⁰ Inyiak Yesu iluaha woŋ woŋ, ette iye.

⁵¹ Attati aboŋo etihi otto tua Haji emojit enne ittokon iguasa arrihai, to hide many ifau, ette afau ikikiro, buo amaruoi ette ibuara sar sar.

⁵² Buo elumio ette iŋa, ette itubuhuna aati Hollum arriai hunyia oye 'to;

⁵³ ette isi ijiŋuna addi telumio. Buo ninyia ibuhu Yesu toye, ette isi ifuatan Ibore Gala Elibo, buo aati arriai ette igonyuna isi.

⁵⁴ Ninyia igonyu ajafit iko oseŋer hunyia owoni 'to ikonyi ekikiro fau iko erre 'daŋ hunyia iduoŋi 'to, ette abaŋi inef isi, ette isi jiaran, “Lonyi Hollum duadi olo luŋa.”

⁵⁵ Owoni nyia buo fe aŋoruo diya hunyia omijie 'to alamarai. Ijifunie nyia isi Yesu to Galilea iluahiere inyi.

⁵⁶ Ihiji hosi owon nyia Maria Madalina, Maria honye Yakobo iko Yosefu. Owon nyia buo fe ŋoruoi Sebedeyo diya.

Anuhana ono Yesu

⁵⁷ Nyia kekai, ette lobo asamani olo Aremeteya ittuna alla anya Yosefu. Ara nyia buo fe inyi ahejifani Yesu.

⁵⁸ Olo nyia inyi jio Pilato imojuniere ahuan Yesu. Attati Pilato iramana jio oŋida isiarani jihonyi.

⁵⁹ Ette Yosefu ikafaru inyi, ette ibubunana inyi ta aboŋo enuhit aŋejuk,

⁶⁰ ette itaferihina inyi ilume honyi aŋejuk ninyia obuahak Yosefu itua moruo. Ette inyi ittaboronia amoruo enne ittok ihutuk ilume, ette leten addi.

⁶¹ Owoni nyia diya ba Maria Madalina iko Maria ebotie. Itoŋoi nyia isi buo attanyi jio elume nyia.

Erririak Hutte Ilume

⁶² Ara nyia ebotie holoŋ noloŋ Sabatto, ette ehumak elettaha iko Farisei ittubanio ihosiere Pilato,

⁶³ ette jiaran, “Lettok, egigilu hohoi jio, ninyia hèsu ologesem alia, ojio nyia inyi jio, ‘Itubuhuni adi nani ihalu oŋitek hunihoi.’

⁶⁴ Tania, ifak eram, ijiara ihumi irriria elume nyia many iholoŋ etahunihi. Nyio, ŋadi lejifak honyi ofuoi hahalaru ahuan honyi te lume, buo ette ifuatan iramana aati jio itubuhuni inyi toye. Agalik adi agesemi ana ninyia hosiere.”

⁶⁵ Attati Pilato iramana isi jio, “Iyatti erririak, ijiara ofuoi irriria elume nyia ihuo iremehina itai irriria.”

⁶⁶ Ania, ette isi fuatan, ette ihum duanyana elume ania, ette idiaharu erririak oŋida ihumi irriria.