Matteyo 25 - Ecorit Aŋejuk 2003

Etarriamai ono Oduo Huna 'Tomon

¹ Inyiak fe Yesu ittiyenio jio, “Jio oŋitek hua, ara adi Nolobie ettedou ihua ana. Owoni nyia omuk oduo 'tomon hunyia iyarai 'to allomohien hosi irraŋuniere ayamani.

² Ihiji hosi, ibuyaŋai nyia miyet, buo huna miyet ilofioroji.

³ Ania, ette hunne ibuyaŋai 'to iyaru allomohien hosi buo obeŋi asararai iko obo ajas ta ajirikisi.

⁴ Buo hunne ilofioroji 'to iyarai allomohien hosi buo asararai iko ajirikisi jas.

⁵ Illiŋia nyia ayamani ittuniere, ania ette oduo hunia ijeŋita, ette ijotoro.

⁶ Ninyia ara attiŋ harue, afany nyia eram woŋ woŋ jio, ‘Ojiŋuna, ifuanna arraŋuna inyi!’

⁷ Ohenyuni nyia oduo hunia 'daŋ, ette ihuhumio allomohien hosi.

⁸ Attati oduo hunne ibuyaŋai 'to imojo jio hunne ilofioroji 'to, ‘Eluahina hohoi obo ajas hatai, afuoi allomohien hohoi dunyari.’

⁹ Buo alofiorojok ette itarraŋ isi jio, ‘Jai! Obeŋ inyi oremik jihohoi ikatai. Ifuatta inyiaŋuna obo jihatai to tobolia.’

¹⁰ Ninyia hofuoi isi ihuania inyiaŋuniere ajas, ette ayamani fanyan. Attati hunyia arrai 'to jiŋara iko ayamani ihaji anna awanari agari ono ayama, buo ette ihianana ekat.

¹¹ “Ojio gaa, ette oduo huna miyet ifanyan, ette jiaran, ‘Lettok, lettok, aŋahi jihohoi ekat.’

¹² Ati itarraŋ nyia inyi isi jio, ‘Hode, eramak ni jihatai jio atimo ni itai.’ ”

¹³ Attati Yesu itisidonia ekiana honyi jio, “Ihumata mijio nyio, ibiaŋata itai imijana anani holoŋ kuyya anani saa adi onno ottuniere inyi.”

Etarriamai ono Egiamak Hula Hunihoi

¹⁴ “Jio oŋitek hua, ara adi Olobie ettedou ihuo ana. Owon nyia obo atulo linyia awak 'to leten obo amaji. Iloŋu nyia inyi egiamak honyi, ette isiarana erre honyi 'daŋ ihas hosi.

¹⁵ Isiarak nyia inyi agurusi jihosi 'daŋ ababo ihuo oremehini isi ittoŋotio. Jio obo, arobiyaa alif miyet (5,000), buo jio obo alif arrihai (2,000), buo fe jio obo alif abotie (1,000).

¹⁶ Teya teya, ette egiamani linyia ifuotu 'to alif miyet leten ipocori agurusi hunia, ette ipocouna alif miyet ihide hosi.

¹⁷ Buo fe linyia ifuotu 'to alif arrihai opocou alif arrihai ihide hosi.

¹⁸ Buo linyia ifuotu 'to alif abotie, ette ibok ewure, ette idimana agurusi lettok honyi diya.

¹⁹ “Ihalu ayafajin arriai, ette elettok egiamak hulia icohuno imijaniere owoni arobiyaa honyi baya jihosi.

²⁰ Attati egiamani linyia ifuotu 'to alif miyet ittuna, ette isiarana alif miyet hunnomuk, ette jiaran, ‘Lettok, isio nyia iyye ani alif miyet. Ihuania, apocou ni alif miyet ihide hosi.’

²¹ Buo inyi ette jiaran jihonyi, ‘Oyyu bebe! Iyye egiamani elle iyyu 'to. Ittoŋotio iyye agurusi hunno omutari 'to onno oyyu. Tania, ehanak ni iyye ahattoŋoni olo agurusi arriai. Waŋ hamunoi arabotie ikoŋ.’

²² Ette buo fe egiamani linyia ifuotu 'to arobiyaa alif arrihai ittuna, ette jiaran, ‘Lettok, isio nyia iyye ani arobiyaa alif arrihai. Ihuania, apocou ni omuk alif arrihai ihide hosi.’

²³ Buo inyi ette jiaran jihonyi, ‘Oyyu bebe! Iyye egiamani elle iyyu 'to. Imijak iyye attoŋotio arobiyaa hunno omutari 'to onno oyyu. Tania, ehanak adi ni iyye ahattoŋoni olo agurusi arriai. Waŋ hamunoi arabotie ikoŋ.’

²⁴ Attati egiamani linyia ifuotu 'to arobiyaa alif abotie ittuna, ette jiaran, ‘Lettok, amijak ni ira iyye atulo olorroho. Idioŋo iyye amat hunne ibeŋ iyye iyehi, buo fe ihuna jio hunne ibeŋ iyye igilli.

²⁵ Abaŋ nyia ni, ania, edimaniere ni arobiyaa hoi itua iwure. Hibe arobiyaa hoi huna.’

²⁶ Ati itarraŋ nyia elettok honyi jiojio, ‘Iyye egiamani olorroho buo fe ira oloboyo. Imijak iyye luŋa jio, adioŋo ni amat hunna abeŋ ni ayehi buo fe ahuna hunna abeŋ ni egilli.

²⁷ Nyio nyiati ibeŋ iyye ittunak arobiyaa hoŋ hunia itua beŋk? Ŋaduo ni ihuania efuotu isi iko efoniti hosi oduo acohuno ni.

²⁸ Ihuania, iduhuna addi arobiyaa hunia jihonyi. Isiatta jio lia, ollo owon 'to iko arobiyaa alif 'tomon.

²⁹ Nyio, lia, ollo owon iko obo ariŋ, ofonihini adi jihonyi, buo adi inyi ette iwanan iko asaŋ arriai. Ati jio ollo obeŋ riŋ jihonyi, iduhari adi addi ara duadi bu ariŋ ollo odiha ollo owon 'to jihonyi.

³⁰ Buo egiamani olorroho olo, opuasara inyi allet idumele. Ijiara inyi olo iluaha diya buo fe oŋuruta aala honyi ta adiaha.’

Aŋocio Hiram Esidi

³¹ “Alla attu Lonyi Tulo ta akuatan honyi, iko ajilohien honyi 'daŋ, itoŋo adi inyi iseger ilohobu honyi.

³² Ottubanie adi aati hutta fauhien 'daŋ ihosiere honyi. Attati inyi ibuany aati eluluŋi arrihai ihuo enne igigeliere eyyahani akioro jio eedie.

³³ Ittaŋak adi inyi aati abisak oŋiatai, buo hullomuk arraŋai.

³⁴ Attati Hobu ijiaran jio aati hutto oŋiatai honyi, ‘Ifuanna, itai hullo omuno Monyoŋ! Ifuanna harutana Olobie ninyia ihuhumani ahanatai many tetteri fau.

³⁵ Aniama nyia ni, buo itai ittata isio ani aŋiria. Eboto nyia ni, buo itai ittata iwohina ani aari. Ara nyia ni atamononi, ati ifuotuna nyia itai nani.

³⁶ Obeŋ nyia boŋo jihoŋ, buo itai ittata isiarana aboŋo jihoŋ iyyafatiere. Aŋuai nyia ni, buo itai ittata mijio ani onno oyyu. Efita nyia ni ibabus, buo itai ittata ifuanna mijaru ani.’

³⁷ “Attati abisak adi itarraŋ inyi jio, ‘Lamonye, nyia baya egonyu hohoi iyye iniama, buo hohoi ette iŋojaŋa iyye aŋiria, kuyya nyia baya iboto iyye, buo hohoi ette iwohina iyye aari?

³⁸ Nyia baya buo fe egonyu hohoi iyye atamononi, buo hohoi ette ifuotuna iyye ihaŋitek hohoi. Kuyya nyia baya obeŋ aboŋo jihoi, buo hohoi ette isiarana iyye obo iyyafatiere?

³⁹ Nyia baya buo fe egonyu hohoi iyye iŋuai kuyya ifita ibabus, buo hohoi ette ifuatan imijuno iyye?’

⁴⁰ Buo Hobu ette adi itarraŋ jio, ‘Hode, eramak ni itai jio, elle ihanata nyia itai ihuania jio illarak hoŋ hulo, ara duadi bu ollo ofiaha 'to tehiji hosi, ara inyi ihuo elle ihanata nyia itai jihoŋ!’

⁴¹ “Attati inyi adi jiaran jio hia hutto ehorroŋ honyi jio, ‘Ifuatta addi jihoŋ, itai hulle ipitak Hollum hulo. Ifuatta ihima onno osio 'to 'tulaŋ, ninyia inahini ahono Sittan iko ajilohien honyi.

⁴² Nyio, aniama nyia ni, buo itai ibiaŋata isiatta ani aŋiria. Eboto nyia ni, buo itai ibiaŋata iwohina ani hari.

⁴³ Ara nyia ni atamononi, buo itai ibiaŋata ifuotuna nani ihaŋitek hatai. Obeŋ nyia aboŋo jihoŋ, buo itai ibiaŋata isiatta obo jihoŋ iyyafaniere. Aŋuai nyia ni buo fe efita ibabus, ati ibiaŋata nyia itai ifuanna mijaru nani.’

⁴⁴ “Itarraŋi adi isi inyi ojio, ‘Lamonye, nyia baya egonyu hohoi iyye iniama, kuyya ibuoto, kuyya obeŋ boŋo, kuyya iŋuai, kuyya ifita ibabus, buo hohoi ebeŋ eluak iyye?’

⁴⁵ Itarraŋ adi Hobu isi jio, ‘Hode, eramak ni itai jio, elle ibiaŋata nyia itai iluahata obo jio afiahajak hulia, ara inyi ihuo enne ibiaŋata itai iluahata nani.’

⁴⁶ Isi hulia, hulle ifuhari adi ittigemio onno osio 'to 'tulaŋ, buo adi abisak ofuoi jio esu onno osio 'to 'tulaŋ.”