Matteyo 14 - Ecorit Aŋejuk 2003

Aye ono Yoane Etifuotoni Batisimo

¹ To oŋitek hua, itaniŋu nyia Erode, Elettok olo Galilea, eram ono ehanita Yesu,

² ette inyi iramana egiamak honyi jio, “Yoane Etifuotoni Batisimo alia luŋa. Itubuhuni inyi toye. Inyi anna awanari inyi iko agolon ihaniere eduariti.”

³ Nyio, itinefu nyia Erode Yoane, ette itifit, ette itifitana inyi ibabus. Ihan nyia inyi ihuo nyia, te eram ono Erodias, ŋoruoi illanyi Filipo.

⁴ Nyio, iramak nyia Yoane inyi jio, “Obeŋ obis jihoi itadetuniere Erodias!”

⁵ Awak nyia Erode ittohoro Yoane, ati abaŋ nyia inyi aati Yudei, nyio, iruhi nyia isi jio ara Yoane ahekianani Hollum.

⁶ Ohia nyia ŋarri Erodias ihosiere iluluŋ waati 'daŋ to ninyia awanari agari ta agiluna ono esiuna Erode. Omuno nyia Erode bebe

⁷ many ocoroniere inyi jihonyi jio, “Ettuŋo ni jio, esio adi ni iyye ariŋ enne iwak iyye!”

⁸ Ihuo iramak honyonyi jihonyi, ette inyi jiaran jio Erode jio, “Esiarak ani ihuania ahou Yoane Etifuotoni Batisimo itua arrany ana.”

⁹ Attati Hobu ijiriŋa, ati ihuo ittuŋo nyia inyi ihosiere tamonok honyi 'daŋ, ette inyi iramana oŋida ihani ihuo awak neto nyia.

¹⁰ Ania, ette inyi ifahina aati ibabus iŋotuniere ahou Yoane,

¹¹ ette iyaŋuno ahou honyi itua 'rany, ette isiarana jio neto nyia, buo inyi ette iyaru jio honyonyi.

¹² Teya ofuonni nyia lejifak Yoane, ette iyaru ahuan honyi ette inuhana. Attati isi ifuatan iramana Yesu.

Itaŋiyo Yesu Eluluŋ Waati enne Ittok

¹³ Ninyia itaniŋu Yesu eram ania, olo nyia inyi teya ta atogol jio obo amaji onno oyur 'to. Ati itayiruni nyia aati aleten honyi, ania, ette isi to borejin gala hosi ijifaru inyi te eejek.

¹⁴ Ninyia afany inyi ilotifor, ette inyi igonyuna eluluŋ waati enne ittok, ette ataji honyi imehino jihosi, ette inyi itaŋida aŋuak hosi.

¹⁵ Nyia kekai, ofuonni nyia lejifak jihonyi, ette jiaran, “Oyur amaji ana buo fe attu attari. Itatturok eluluŋi waati hunia itua misihi, ijiara ofuoi inyiaŋuniere aŋiyo hosi.”

¹⁶ Itarraŋ nyia inyi isi ojio, “Hèlaha isi ofuoi obo amaji. Itai, ta ahuattek hatai, isiatta obo aŋiyo jihosi.”

¹⁷ Oliahini nyia isi jihonyi jio, “Ewon hohoi iko emunio miyet buo aham arrihai ijiai.”

¹⁸ Attati inyi jiaran jihosi, “Iyaŋuniete isi jihoŋ dini.”

¹⁹ Attati inyi iramana aati hétetoŋohi imiyaŋ, ette iduhuna emunio huna miyet buo aham hula arrihai, ette ibonno ahide idou, ette isio ahumo jio Hollum, ette ibibeny emunio hunia, ette ihiharana jio lejifak honyi; buo lejifak ette isiarana jio aati.

²⁰ Anyai nyia isi 'daŋ many ifuaŋarik. Attati lejifak ihuhuruna ofitot itua afeehien 'tomon harrihai 'daŋ 'lullur.

²¹ Arai nyia aliawa hama hinyia oŋiyei 'to diya ihuo alif miyet (5,000), elle ebeŋ ehianak aŋoruo iko iŋiayai.

Adaharu Yesu Ta Ahide hari

²² Attati Yesu itadahina lejifak itogol oŋida allaŋi to osiere honyi ifohor tole ono atafar enne ittok, buo inyi itatturok eluluŋ waati.

²³ Ninyia itatturok inyi eluluŋ waati, ette inyi leten idoŋe inyi hama imojori. Ninyia ara akekai arasa nyia Yesu diya hama.

²⁴ Ta asaa ania, alama nyia atogol bebe itua tafar. Itaburaŋio nyia apoŋia poŋia hari atogol ania, nyio, ohut nyia oloyyami bebe ajihonyi.

²⁵ Ninyia iliaha ataŋatio motie, ette Yesu ittuna jio lejifak alla adahuno ta ahide hari.

²⁶ Ilafuhoi nyia isi bebe ninyia igonyuni isi inyi adahuno ta ahide hari, ette isi jiaran, “Etieŋ alia!” ette ituruho ta abaŋi.

²⁷ Teya teya, ette inyi ikiana jihosi ojio, “Itagoloto atajia hatai. Ani alia, hèbaŋata!”

²⁸ Attati Petro jiaran jihonyi jio, “Lettok, alla ara iyye hode alia, iramak ani adahuno jihoi ta ahide hari.”

²⁹ Teya, itarraŋ nyia Yesu inyi jiojio, “Waŋ!” Ania, ollu Petro to togol, ette idaharu jio Yesu ta ahide hari.

³⁰ Ati ninyia igonyu inyi oyyami ohut bebe, ette abaŋi inef inyi, ette inyi itterio adioro itua hari. Attati inyi iluaha, “Lettok, eluak ani!”

³¹ Teya Teya, ihalamak Yesu aani honyi, ette inef inyi, ette jiaran jihonyi, “Aii! Iyye ollo omuta eruk olo! Nyio ikuaya iyye?”

³² Ninyia adahini isi 'daŋ arrihai itogol, ette oyyami iwotia dee.

³³ Attati lejifak hutto tua togol itahabuyo Yesu, ette jiaran, “Hode, iyye Lonyi Hollum!”

Itaŋida Yesu Aŋuak Hutto Genesaret

³⁴ Ninyia allaŋi isi afohor hari tole, ette isi ifanyan Genesaret.

³⁵ Ninyia aheruni aati huttono abore gala ania Yesu, ette isi itisarrahina eram jio afau ania 'daŋ jio, ijiara iyaŋunie aŋuak 'daŋ jihonyi.

³⁶ Attanai nyia isi inyi hataŋatak aŋuak hia ittiriere ara duadi bu esidi boŋo honyi; buo aati hinyia ottiri 'to aboŋo honyi ette iŋidari 'daŋ.