Matteyo 1 - Ecorit Aŋejuk 2003

Hohonyiok Yesu Kristo

¹ Igioroni jio abuk ana afureta hohonyiok Yesu Kristo to woyo ba Dafide, lonyi Abramo.

² Ara Abramo monye Isako, Isako monye Yakobo, Yakobo monye Yuda iko illarak honyi;

³ ara Yuda monye Peres iko Sera (huttolo ŋoruoi honyi Tamar), Peres monye Heseron, Heseron monye Ram,

⁴ Ram monye Aminadab, Aminadab monye Nason, Nason monye Salmon,

⁵ Salmon monye Bowas, (jio ŋoruoi honyi Rahab), Boas monye Obed (huttolo ŋoruoi honyi Rus), Obed monye Yese,

⁶ Yese monye hobu Dafide. Ara nyia Dafide monye Solomon tottolo ŋoruoi honyi ninyia ara 'to aŋoruoi Uriya;

⁷ Solomon monye Rehobuwam, Rehobuwam monye Abiya, Abiya monye Asa,

⁸ Asa monye Yehosafat, Yehosafat monye Yoram, Yoram monye Usiya,

⁹ Usiya monye Yotam, Yotam monye Ahas, Ahas monye Hesekiya,

¹⁰ Hesekiya monye Manase, Manase monye Amon, Amon monye Josiya,

¹¹ Josiya monye Yekoniya iko illarak honyi to ninyia anyarik isi ifau Babilonia.

¹² Ihalu anyaru hosi Babilonia, Yehoyakin monye Salatiel, Salatiel monye Serubabel,

¹³ Serubabel monye Abiud, Abiud monye Elayakim, Elayakim monye Asor,

¹⁴ Asor monye Sadok, Sadok monye Akim monye Eliud,

¹⁵ Eliud monye Eliasar, Elasar monye Mattan, Mattan monye Yakobo,

¹⁶ Yakobo monye Yosefu, Yosefu habi Maria, honye Yesu, Yesu elle iloŋoi Olonyimoto.

¹⁷ Tania itterio jio Abramo many jio Dafide, arai nyia asik 'tomon haŋuan, buo fe jio Dafide many iholoŋ ninyia anyarik isi Babilonia arai nyia buo fe asik 'tomon haŋuan. Attati teya many jio oloŋ ninyia isiorik Olonyimoto arai nyia buo fe asik 'tomon haŋuan.

Esiuna ono Yesu Kristo

¹⁸ Ara nyia esiuna ono Yesu Kristo ihua ana: Ocoroni nyia honyonyi Maria jio Yosefu. Buo ninyia hobeŋi isi ayamanie, onyurani nyia jio ayedu Maria ta aduaran ono Loholio Olibo.

¹⁹ Attati habi honyi Yosefu, jiaran apiaharu jihonyi dee nyio, ara nyia inyi atulo ollo obis 'to buo fe obeŋ awak itanyahina inyi ariri ihosiere waati.

²⁰ Ati ninyia hègigilo Yosefu erre hunia, oleyehino nyia ajilo olo Lamonye jihonyi ta arigia, ette jiaran, “Yosefu, otto woyo Dafide, hèbaŋ ayemuna Maria aŋoruoi hoi, nyio oyedu inyi ta aduaran ono Loholio Olibo.

²¹ Isiu adi inyi leto, buo ifurak adi iyye inyi Yesu, nyio italahu adi inyi aati honyi te iyyata hosi.”

²² Iduoŋi nyia erre huna 'daŋ, itasiruniere ekiana ono Lamonye ninyia ikianari inyi te etuk ekianani honyi jio,

²³ “Oyedu adi obo oduoti onno hobeŋ ottironie iko obo alle. Ottu adi inyi isiuna eto 'le. Ifurani adi inyi Imanuele,” (onno ojio 'to, “Owon Hollum ikohoi”).

²⁴ Ninyia ahenyu Yosefu, ette inyi ihanio ihuo ifak ajilo olo Lamonye inyi, ette iyemuna Maria.

²⁵ Isiu nyia Maria lonyi honyi hobeŋ Yosefu ottironie ikonyi; buo Yosefu ette ifurana leto alia Yesu.