Luka 18 - Ecorit Aŋejuk 2003

Etarriamai ono Aŋotte Ehidak iko Laŋotoni Hiram

¹ Attati Yesu iramana jio lejifak honyi obo etarriamai, ittiyeniere isi oŋida odulori amojo buo obeŋi oyuhoi.

² Ojio nyia inyi jio, “Owon nyia lobo aŋotoni hiram jio obo abore gala. Obeŋ nyia inyi abaŋ Hollum buo fe obeŋ abaŋ aati.

³ Owon nyia buo fe aŋotte ehidak jio abore gala ania ninyia attana 'to inyi jio, ‘Itabisak eram hoŋ iko aati hullo osuarik 'to ani!’

⁴ Iha nyia aŋotoni hiram alia tetteri etabisana eram aŋotte ania. Ati ihalu igigilo nyia inyi ta ahuan honyi, ette jiaran, ‘Abeŋ duo bu ni aniŋio Hollum buo fe abeŋ abaŋ aati;

⁵ ati te ettigemio ehidak ana nani, etabisak adi ni eram honyi iko osuari honyi, ŋadi inyi odulo ittigemio ani oŋitek 'daŋ!’ ”

⁶ Ette Lamonye jiaran, “itaniŋiete erre hunne ikiana laŋotoni hiram ollo obeŋ 'to oŋocio onno obis.

⁷ Ihuania, obeŋ 'tadi Hollum oŋotok eram onno oyyu jio aati honyi hullo odulori 'to ifiyo jihonyi aluahio ta afanni iko ta arue 'daŋ? Illiŋiahi 'tadi inyi iluahiere isi?

⁸ Eramak ni itai, oŋotok adi inyi eram onno oyyu kokuak tesi. Buo alla attu Lonyi Tulo, onyurak 'tadi inyi eruk owon ifau?”

Etarriamai ono Afariseitanani iko Eddudduhani Musuru

⁹ Iramak nyia buo fe inyi etarriamai ana jio aati hullo omijani 'to luŋa abisan hosi buo iyasie aati hullomuk.

¹⁰ “Ofuoi nyia lomuk aati arrihai imojo itua Haji emojit enne ittokon. Ara nyia lobo aholo Farisei buo obotie ahèddudduhani musuru.

¹¹ “Ihut nyia Afariseitanani eger kai, ette imojo, jiojio, ‘Hollum ajio ni jihoi humo, nyio, abeŋ ni ara ihuo aati hullomuk; hulla arai 'to ahanyak saŋ waati, ahemumunak, asomok kuyya buo fe ihuo eddudduhani musuru alia.

¹² Aferutta ni enyiahita arrihai te esabit abotie, buo fe esiorio jihoi aŋacio etattomonita huno erre 'daŋ hunna anyuratta ni.’

¹³ “Ati owotia nyia eddudduhani musuru alamarai ollo obeŋ ikoddaŋ ibonno ahide, ette inninnaŋ asuhe honyi ette jiaran, ‘Hollum, omehinie jihoŋ, ani leyyani!’

¹⁴ Eramak ni itai, olo nyia eddudduhani musuru alia ihaŋ honyi alla abis ihosiere Hollum, ati obiaŋara a Fariseitanani. Nyio, alla akaf obo atulo ahuan honyi ahide, itafiahaji adi inyi, buo elle itafiaha obo ahuan honyi akafi adi inyi ahide.”

Imimit Yesu Iŋiayai

¹⁵ Iyaŋunie nyia omuk aati ara duadi bu olodolioo jio Yesu, oŋida inyi ottirok ahas honyi jihosi. Ninyia igonyuni lejifak isi, ette isi iŋerejanio jio aati.

¹⁶ Ati iloŋu nyia Yesu iŋiayai ette jiaran, “Aŋatana iŋiayai ijiara ofuonni jihoŋ, hètihoto isi nyio, ara Olobie ono Hollum ahano aati hulla arai 'to ihuo isi.

¹⁷ Ahode ajio ni jihatai jio, lia ollo obeŋ 'to ifuotu Olobie ono Hollum ihuo enne ifuotuniere eto ollo odiha 'to, obeŋ adi inyi ojiŋak diya.”

Lasamani

¹⁸ Attati lobo elettok olo Yudei ifiyo ojio, “Hettiyanani ollo oyyu 'to, ehan 'tadi ni anyio ifuotuniere esu 'tulaŋ?”

¹⁹ Itarraŋ nyia Yesu inyi ojio, “Anyio iloŋo iyye nani oloyijio? Obeŋ obo ara oloyijio arari fe Hollum hama.

²⁰ Imijak iyye efahita, ‘Hèhanio erre somon, hèttoho, hèhoholio, hègesem, buo fe abaŋa monyohoi iko honyohoi.’ ”

²¹ Buo elettok alia ette jiaran, “Aniŋio ni efahita hunia 'daŋ many hara ni ahito.”

²² Ninyia itaniŋu Yesu erre hunia, ette inyi jiaran jihonyi, “Harasa obo ariŋ abotie enne hèbeŋ iyye ihan. Ilo itinyiaŋak erre hoi, itte iharana arobiyaa hua jio alociaŋak; ihuo nyia iwon adi iyye iko esamiti idou. Teya waŋ yo ijifatie nani.”

²³ Ati ninyia itayiru atulo alia erre hunia, ette inyi ijiriŋa, nyio, asam nyia inyi bebe.

²⁴ Igonyu nyia Yesu ejom honyi ette jiaran, “Ogol bebe jio aati lasamak ijiŋaniere Ilobie Hollum.

²⁵ Inyiak iliaha bebe jio akonnikonni ijiŋari te ettulit libira, agalik atulo asamani ijiŋaniere Ilobie Hollum.”

²⁶ Attati aati hunyia itayiruni 'to inyi ifiyo ojio, “Ŋai 'tadi ollo oremik 'to italahuno?”

²⁷ Ati itarraŋ nyia inyi ojio, “Oremik Hollum ihanio erre hunne ittallihi aati ihanio.”

²⁸ Buo Petro ette jiaran, “Imijie! Ediehuno hohoi ahaŋitek hohoi 'daŋ ijifatiere iyye.”

²⁹ Buo Yesu ette jiaran jihosi, “Hode ajio ni jihatai, atulo elle idehi 'to ahaŋ honyi, kuyya ŋoruoi, kuyya illarak, kuyya esiok honyi, kuyya aduri honyi, te eram ono Olobie Hollum,

³⁰ inyiak adi inyi ifuotuna ihuania arriai agalihini hua, buo moi ottu ifuotuna esu 'tulaŋ.”

Ikiana Yesu Enyiahi Etahunihi te Eram ono Aye Honyi

³¹ Iloŋu nyia Yesu lejifak honyi hula 'tomon harrihai ette jiaran jihosi, “Itayiriete! Efuo ihuania Yerusalem, buo diya, ofuoi adi erre 'daŋ hunyia igioroni ekianak Hollum to Lonyi Tulo irahan hode.

³² Isiori adi inyi ihas Lufajak, osuhotierek adi inyi, omorie adi inyi buo fe omicie amilak jihonyi.

³³ Abahie adi isi inyi ette ittohoro, ati ihalu oŋitek hunihoi ibuhu adi inyi toye.”

³⁴ Ati obeŋi nyia isi omijani erre hunia, nyio, idimani nyia awoyo hiram ekenita hunia jihosi, buo fe isi obeŋi omijani nanyio enne ikiana Yesu.

Itaŋida Yesu Emimojoni Oloŋodo

³⁵ Ninyia iliaha Yesu Yeriko, owon nyia lobo oloŋodo linyia itoŋo 'to iger hikoi buo imimojo.

³⁶ Ninyia itaniŋu inyi eluluŋ waati ofuoi tekoi, ette inyi ifiyo ojio, “Anyio riŋ ania?”

³⁷ Itarraŋi isi inyi ojio, “Yesu olo Nasaret ollo ottu tolo.”

³⁸ Attati inyi iloŋo woŋ woŋ ojio, “Yesu! Lonyi Dafide! Omehinie jihoŋ!”

³⁹ Buo aati hutto hosiere ette iŋerejanio jihonyi, ette iramana inyi hotoduai. Ati ifudak nyia inyi ewuwoŋita bebe jiojio, “Lonyi Dafide! Omehinie jihoŋ!”

⁴⁰ Ania owotiari Yesu, ette iramana isi ijiara iyaŋunie oloŋodo lia jihonyi. Ninyia lattu inyi aŋati, ette Yesu ifiyo inyi jiojio,

⁴¹ “Iwak iyye ani ehan anyio jihoi?” Itarraŋ nyia inyi jiojio, “Lettok awak ni inyiak imijio.”

⁴² Ette Yesu jiaran jihonyi, “Inyiaha fe imijio! Itaŋida eruk hoi iyye.”

⁴³ Teya teya, inyiak inyi imijio, ette ijifaru Yesu buo itahabuyo Hollum. Ninyia igonyu eluluŋ waati erre hunia, ette isi buo fe itahabuyo Hollum.