Luka 12 - Ecorit Aŋejuk 2003

Ihumata Mijio Etihanak Huattek

¹ Ninyia attubanie alif waati arriai, many ifudarik nyik nyik, many irririei eejek hosi, ette Yesu ikiana do jio lejifak honyi jio, “Ihumata mijio olobou ono Farisei. Ajio ni etihanio hosi huattek.

² Asalani adi erre 'daŋ hunne imuho 'to, buo fe omijani adi erre 'daŋ hunne idimai 'to.

³ Ofuonni adi itayiruna ta afanni erre 'daŋ hunne ikianati itai idumele. Itakuati adi buo fe to sihidihien hasik, erre 'daŋ hunne ihahayati itai itua hasik hatai.

Oŋida Ebaŋ Ŋai

⁴ “Eramak ni itai mottiarak hoŋ, hèbaŋata hia hullo ottohori 'to ahuan, buo ihalu ittallihi ihanio omuk erre hunna agalihini ta arrohoji.

⁵ Etahutak adi ni itai jio oŋida ibaŋata ŋai. Abaŋata Hollum, ollo owon 'to iko agolon ittohori, buo ihalu 'tohoro ibironia ihima onno osio 'to 'tulaŋ. Aafe eramak ni itai, abaŋata luŋa inyi!

⁶ “Obeŋi soho itinyiaŋani olodili miyet ta amillimi arrihai? Ati obeŋ Hollum oguhi obo olodil.

⁷ Ara duadi bu oofir hutto hossi hatai, iheni isi 'daŋ. Tania, hèbaŋata, nyio agalik ayiji tulo abotie olodili arriai!

Eruhonia iko Ehara Kristo

⁸ “Eramak ni itai, lia elle iruhok 'to ani ihosiere waati, iruhok adi buo fe Lonyi Tulo inyi ihosiere ajilohien Hollum.

⁹ Buo lia, elle iha 'to ani ihosiere waati, iha adi buo fe Lonyi Tulo inyi ihosiere ajilohien Hollum.

¹⁰ “Lia, elle ittarrohojio 'to afure Lonyi Tulo, oremehini adi ihohina eyyata honyi; buo lia, elle ittarrohojio 'to afure ono Loholio Olibo, obeŋi adi oremehini ihohina eyyata honyi.

¹¹ “Alla afuoi itiwwahio itai ihasik imojiti, ihosiere mondiri, kuyya buo fe ihosiere lettaha, hèhawwati jio ifuata dai itai itarraŋ aŋai kuyya anyio adi enne ifuata itai ikiana.

¹² Nyio, jio nasaa nyia, ittiyanak adi Loholio Olibo itai erre hunne ifuata ikiana.”

Etarriamai ono Lasamani ollo Obeŋ Hou

¹³ Attati lobo atulo tehiji iluluŋ jiaran jio Yesu, “Hettiyanani iramak illaŋ ehor ikoŋ erutaa hunyia idiaharu monye hohoi.”

¹⁴ Buo Yesu ette itarraŋ inyi jiojio, “Illa, ŋai ihanak ani ahaŋotoni hiram kuyya ahaharani saŋ hunia jihatai?”

¹⁵ Attati Yesu jiaran jihosi 'daŋ, “Ihumata imijio, hèlaha obo eŋaru ojiŋak itajia hatai; nyio obeŋ amanya tulo ara ta aluaji hirre hunno owoni 'to jihonyi.”

¹⁶ Attati Yesu iramana jihosi etarriamai ana: “Owon nyia obo asamani iko amana honyi anna aŋidari amat honyi.

¹⁷ Otto inyi igigilo ta ahuan honyi jiojio, ‘Abeŋ ni awon iko amaji ittunaniere amat hoŋ 'daŋ. Ehan adi ni anyio?’

¹⁸ Ette inyi jiaran, ‘Ehan adi ni ihua ana, etattur adi ni amuguo hoŋ, ette ni iduhonia omuk hunne ettaha hunna alari ni ittunaniere emma iko erre hoŋ 'daŋ hunnomuk.

¹⁹ Attati ni jiaran jio ahuan hoŋ, osiru miji! Owoni erre 'daŋ jihoi hunne iyarai aŋasi arriai. Abalai ta allalla, oŋiye, amatai, buo fe omunoi!’

²⁰ Ati ojio nyia Hollum jihonyi, ‘Jai, obeŋ hou! Arue ono ahana iduhari adi esu hoi addi; ofuonni 'tadi erre hunne ittunak iyye ahunohoi irahan ahunaŋai?’ ”

²¹ Otto Yesu itisidonia ekiana honyi jiojio, “Ara adi inyi ihuo nyia jio hia, hulle ifuroni 'to esamiti ahunosi, buo obeŋi asami to hosiere Hollum.”

Iyihina jio Hollum

²² Attati Yesu jiaran jio lejifak honyi, “Ihuania, eramak ni itai, hèhawwati ta anyio enne iwahata itai, ta esu hatai, kuyya ta aboŋojin hunne iyyafatiete itai ihuattek.

²³ Nyio, agalik ayiji ono esu ayiji ŋiria, buo fe ayiji huan agalik ayiji boŋojin.

²⁴ Ike imijata olohurahi; obeŋi isi oyehini enyomo buo fe obeŋi odeŋuni amat; obeŋi buo fe amuguo iko ebecio jihosi, ati itaŋiyo Hollum isi! Igalihina itai aheny ta ayiji!

²⁵ Ŋai jihatai ollo oremik 'to noŋitek huno esu honyi te ehawwa?

²⁶ Elle ittallihoto itai ihan ariŋ ollo omuta 'to a lia, nyioti ihawwati itai te erre hunnomuk?

²⁷ Ike imijata obolori ayaburita hutto mur aŋai. Obeŋi isi igiamai buo fe obeŋi ihuhumie aboŋojin hosi. Ati eramak ni itai jio ara duadi bu hobu Solomon iko esamiti honyi 'daŋ, obeŋi nyia aboŋojin honyi ilamani ihuo ayaburita hunia.

²⁸ Ati elle itiyyefio Hollum amiyaŋ otto mur, onno owon 'to ahana buo motie osuahini iyali, obeŋ 'tadi inyi itiyyef itai agalik bebe? Aii! Itai aati hullo omuta eruk!

²⁹ “Hèhawwati, buo fe hèfuurati motie motie aniyo adi enne iŋiyete itai kuyya enne imatati itai.

³⁰ Nyio, ottifiai aati atimok Hollum erre hunia, ati omijak Monyatai jio iwahata itai erre hunia.

³¹ Ottifiati do Olobie Honyi, buo arai adi erre hunia 'daŋ ahunatai.

Esamiti Huttedou

³² “Itai eluluŋ onno omuta 'to, hèbaŋata, nyio, omuno Monyatai esiarana jihatai Olobie.

³³ Itinyiaŋana asaŋ hatai, isiatta arobiyaa hua jio alociaŋak. Ihuhumuna olobooni hatai hunno obeŋ 'to ojiori emaruak. Ottunana esamiti hatai idou, amaji onno obiaŋarik isi omumutararai, nyio, ittallik olohoho ifanyan diya, buo fe eŋenyu ittallik ittarroho.

³⁴ Nyio, odulo adi ataji hoi jio amaji onno ottunarik esamiti hoi.

Egiamak hulle Irririai 'to

³⁵ “Ihumata irra, ottodonia aboŋojin egemita buo fe itawulohina allomohien hatai,

³⁶ ihuo egiamak hulle itilai 'to acohuno lettok hosi to hafula ono nayama. Ninyia lattu inyi ette ikukuk ekat, ette isi iŋahina ekat jihonyi kuak.

³⁷ Hotomunohi egiamak hullo ottu elettok hosi nyurani homijei, buo fe itilai ta acohuno honyi! Ahode eramak ni itai, ottodok adi inyi aboŋojin honyi ehoriti ŋiria ette iloŋuna isi iŋiyo, ette isiarana isi aŋiria.

³⁸ Hotomunohi isi alla acohuno inyi ara duadi bu te ehiji harue kuyya hobeŋ ataŋatio motie afaŋ buo onyurak isi ihuo nyia.

³⁹ Ati omijana jio, hara duo onno omijak lamonye haji jio ottu adi olohoho ihaji honyi baya; obeŋ duo inyi obusak olohoho ahahalaru erre hutta haŋ honyi.

⁴⁰ Ihumata buo fe irra, nyio, ottu adi Lonyi Tulo ta asaa enne itimoti itai.”

Egiamani Oloyijio Kuyya Egiamani Olorroho

⁴¹ Ette Petro jiaran, “Lamonye, ikiana soho etarriamai ania to hohoi hama, kuyya ta aati 'daŋ?”

⁴² Itarraŋ Lamonye ojio, “Ŋai 'tadi alla ara ahegiamani oloyijio buo fe ilofioro? Inyi adi elle ihanak lamonye haŋ isioriere aŋiyo jio egiamak hullomuk alla attuba asaa ŋiyo.

⁴³ Hotomunoi egiamani lia alla attu elettok honyi inyurana inyi ihanio egiama ania.

⁴⁴ Hode eramak ni itai, ihanak adi inyi egiamani alia elettok ollo oŋuahatio 'to erre honyi 'daŋ.

⁴⁵ Buo alla ajio legiamani alia ta ataji honyi jio, ‘Illiŋia elettok hoŋ icohuniere’ ette itterio ebibahio egiamak hullomuk, aliawa iko aŋoruo 'daŋ, ette ŋiyo ette imata many orumari.

⁴⁶ Attati elettok egiamani alia icohuno nyia obo oloŋ, ta asaa onno otimo egiamani alia buo fe obeŋ igigilo ta attuna honyi. Ittigemio adi elettok alia inyi, ette ifuhara inyi jio egiamak arrohojak.

⁴⁷ “Legiamani ollo omijak 'to anyio anna awak elettok honyi oŋida inyi ihan, ati obeŋ inyi ihuhum ahuan honyi kuyya obeŋ ihan ihuo awak elettok, ofodohi adi inyi bebe.

⁴⁸ Buo lia, ollo otimo 'to awak elettok honyi anyio, buo ihan erre hunno osiruni 'to ta afodohio, ofodohi adi inyi kai. Jio lia, elle isiori arriai, awahi adi buo fe jihonyi arriai; buo jio lia, elle isiori arriai bebe, awahi adi buo fe jihonyi arriai bebe.

Iyaŋuno Yesu Abuanya

⁴⁹ “Attu ni isuahiniere afau, ati ojio atua hoŋ ŋaduo inyi ihuania awulo!

⁵⁰ Owon obo batisimo anna ajio ni efuotu, ati obeŋ ataji hoŋ oyiri many otuhori inyi!

⁵¹ Igigiloti itai jio attu ni iyaŋuno nelik fau? Eramak ni itai, obeŋ. Ati eyaŋuno ni abuanya.

⁵² Ahana many moi, ibibuanya adi ahaŋ ono aati miyet; oliwarik adi hula hunihoi hula arrihai, buo fe hula arrihai oliwarik hula hunihoi.

⁵³ Oliwarik adi monyie lonyirok hosi, buo fe lonyirok oliwarik monyie hosi. Oliwarik adi honyie ŋarriok hosi, buo fe ŋarriok oliwarik honyie hosi; oliwarik adi aŋoruo, honyie habiok hosi; buo fe honyie oliwarik aŋoruo lonyirok hosi.”

Amijana Saa Nyia

⁵⁴ Attati Yesu jiaran jio eluluŋ waati, “Elle igonyuna itai edohuo ofuonni tetteddorro holoŋ, buo itai ijiatta jio alo ahide sayo, buo inyi ette sayo hode.

⁵⁵ Elle igonyuna itai oyyami ohutuno otto junub, buo itai ijiatta jio alo oloŋ nahan, buo inyi ette nahan hode.

⁵⁶ Itai etihanak huattek hulo! Imijana itai etamijanita hirre hutteduo iko hutta fau, nyioti itimoti itai awoyo hiram ono asaa ana?

Itimuoru Olosuari Hoi

⁵⁷ “Nyio ibiaŋata itai iŋototo ariŋ onno obis 'to jihatai ihaniere?

⁵⁸ Elle itiloŋoro obo atulo iyye ilokikoi, imuarati luŋa ikonyi hèbiaŋata itai ifanyata imaji lokikoi, ŋadi inyi ipihoro iyye many ihosiere haŋotoni hirre buo aŋotoni hirre ette isiarana iyye jio bolis, buo isi ette ifitana iyye ibabus.

⁵⁹ Eramak ni iyye, ibeŋ adi iyye ihouno many idumaniere iyye edumiti 'daŋ hunno oŋotok aŋotoni hiram jihoi.”