Luka 11 - Ecorit Aŋejuk 2003

Ittiyenio Yesu Amojo

¹ To obo oloŋ omojo nyia Yesu jio obo amaji. Ninyia attohu inyi, ette obo olo lejifak honyi jiaran jihonyi jio “Lamonye, ittiyenie hohoi amojo ihuo ninyia ittiyeniere Yoane lejifak honyi.”

² Buo Yesu ette jiaran jihosi, “Elle imojoti itai ijiatta: ‘Monye: Ijiara abaŋi afure hoi onno olibo 'to. Hétettu olobie hoi.

³ Isiara jihohoi motie motie aŋiyo enne ewak hohoi.

⁴ Ohohi eyyata hohoi ihuo enne edehiniere hohoi aati 'daŋ hulle ihanie 'to onno orroho jihohoi. Buo fe hèyaru hohoi jio ekemiti hunno ogoli 'to.’ ”

⁵ Ette Yesu jiaran jio lejifak honyi, “Kuyya alla alo obo alatai ihaji motte honyi ta attiŋ harue ette jiaran, ‘Illa, ehurok ani omuk emunio hunihoi,

⁶ nyio, hetek motte hoŋ ifanyan to momoriya. Obeŋ obo aŋiyo enne esio ni jihonyi!’

⁷ Buo elle itarraŋ inyi totua haji honyi jiojio, ‘Hèttigemio ani! Ihiana ekat, eferio buo fe hohoi, nani iko aduri hoŋ. Ettallik ni idioto isiaraniere jihoi obo ariŋ.’

⁸ Eramak ni itai, ara duadi bu obeŋ inyi awak idioto isiaraniere iyye emunio nyio ira iyye ellanyi, elle ibeŋ iyye iloriri idulori imojo, odioto adi inyi ette isiarana jihoi erre 'daŋ hunne iwak iyye.

⁹ “Ihuania, ajio ni jihatai, ifiyete, isiori adi jihatai. Ottifiati, inyurana adi itai. Ikukuhoto, aŋahini adi ekat jihatai.

¹⁰ Nyio, lia elle ifiyo 'to, ifuotu adi, lia ollo ottifia 'to, onyurak adi inyi, buo fe lia elle ikukuk 'to aŋahini adi jihonyi.

¹¹ Jihatai monyie, alla amojo lonyi hoi iyye ahami, isio adi iyye inyi amunu?

¹² Kuyya alla amojo inyi atelio, isio adi iyye jihonyi etoni?

¹³ Elle imijana itai hulle irrohojata 'to esiorio hirre hunno oyiji 'to jio aduri hatai; aŋai 'tadi Monye ettedou, obeŋ 'tadi esiorio honyi Loholio Olibo jio hia hulle ifiye 'to inyi agalik!”

Yesu iko Belsebul

¹⁴ Ifuhatio nyia Yesu aminiaŋati enne ittallik 'to ikiana; buo ninyia ajiŋu aminiaŋati ania addi, ette atulo lia itterio ekiana. Illilliha nyia eluluŋ waati,

¹⁵ ati ojiori nyia lomuk hulosi jio, “Ifuhatio inyi aminiaŋa ta aduaran ono Belsebul, hobu miniaŋa.”

¹⁶ Buo omuk awahi ikemio inyi, ette isi iwahan jihonyi obo etamijani onno ottu 'to tedou.

¹⁷ Ati omijak nyia Yesu egigilita hosi, ette inyi jiaran jihosi “Elle ibibuanya obo afau eluluŋi eluluŋi hunno orriomonie, otturo adi inyi. Buo elle ibibuanya obo ahaŋ inyi hama buo aŋalafai, oturo inyi.

¹⁸ Ihuania, alla awon olobie ono Sittan iko eluluŋi hunno orriomonie isi hama, odulo 'tadi inyi aŋai? Ijiatta itai jio efuhatio ni aminiaŋa addi ta aduaran Belsebul,

¹⁹ elle efuhatio ni aminiaŋa addi ta aduaran Belsebul, buo lejifak hatai ifuhatie isi ta aduaran ŋai? Tania, arai adi lejifak hatai ahaŋotok hiram hatai.

²⁰ Ati elle efuhatio ni aminiaŋa ta aduaran Hollum, itahutak ania jio alum Olobie ono Hollum ihiji hatai.

²¹ “Elle irriria olottir ahaŋ honyi te erremiti honyi, itoŋoi adi erre honyi dee.

²² Ati elle iburanio obo atulo ollo ogol 'to agalik inyi, ette itattur inyi, ohoru adi lia erremiti hoduo iyihi inyi jio oluahi adi inyi, ette buo fe ihihor erre 'daŋ hunno ohoru inyi jio olottir alia.

²³ “Atulo ollo obeŋ 'to ara aholoŋ, oliwari inyi ani luŋa; buo lia ollo obeŋ 'to oluak ani isuduhaniere, ikukurio inyi luŋa.”

Acohuno ono Aminiaŋati

²⁴ “Alla ajiŋu aminiaŋati jio obo atulo, ilor inyi ta amaji onno oyoho 'to ittifiari amaji eyirit. Buo alla abeŋ inyi onyurak, ette inyi jiaran, ‘Acaharu adi ni ihaji hoŋ eduo ediehuno ni.’

²⁵ Ninyia acohuno inyi, onyurak nyia inyi aaji honyi alibo bebe buo fe ilaman.

²⁶ Attati inyi leten iloŋuno omuk aminiaŋa hattarik hunno orrohoji 'to agalihini inyi, ette isi ijiŋana, ette imanya diya. Tania, ninyia atuho 'daŋ, orroho nyia jio atulo alia agalik ninyia tetteri.”

Amuno Ahode Hode

²⁷ Ninyia ikiana Yesu erre huna, odioto obo aŋotte teluluŋ, ette jiaran jihonyi, “Hotomunoi aŋotte enne isiu 'to iyye buo fe itadasu iyye!”

²⁸ Ati itarraŋ nyia Yesu jiojio, “Ati hotomunohi hia hulle itaniŋuni 'to ekiana Hollum buo fe oniŋie inyi!”

Awahan Waati Eduarit

²⁹ Ninyia ifudanie eluluŋi waati jio Yesu, ette inyi jiaran jihosi, “Orrohoji aati hulo ahana! Nyio, awahi isi itahutani jihosi obo eduarit. Ati obeŋi adi itahutani jihosi obo arari fe eduarit ninyia ihan jio Yona.

³⁰ Ihuo ninyia arari Yona etamijani jio aati hutto bore gala Ninife, ara adi buo fe Lonyi Tulo etamijani jio aati hulo ahana.

³¹ Odioto adi Nobu ono Seba Iholoŋ ono Aŋocio Hiram, ette itisiahina aati hulo ahana. Nyio, ottu nyia inyi ta fau honyi anna alama 'to itayiruniere olofioro huno Hobu Solomon. Eramak ni itai, owon obo ariŋ dini anna agalik 'to Solomon.

³² Odiotoi adi aati Ninife Iholoŋ ono Aŋocio Hiram, ette itisiahina aati hulo ahana, nyio, ihari nyia isi eyyata hosi ninyia itayiruni isi ettittoyo ono Yona. Eramak ni itai, owon obo ariŋ dini anna agalik 'to Yona!

Afaŋan ono Ahuan

³³ “Obeŋ obo atulo itawulohi allomo ette idimana inyi, kuyya imuhok inyi ta arrany. Ati oyihak nyia inyi allomo ania ifilili jio oŋida aati hullo ojiŋuni 'to attua igonyuni afaŋan.

³⁴ Arai noŋite hoi ihuo allomo ihuan hoi. Alla ayiji oŋite hoi, obolo adi afaŋan ihuan hoi 'daŋ; buo alla arrohoji oŋite hoi, obolo adi edumele ihuan hoi 'daŋ.

³⁵ Ihuania ihuma imijio, hèlaha afaŋan ottonohoi ara edumele.

³⁶ Elle ifut afaŋan ihuan hoi 'daŋ obeŋ obo aŋati iriok, afaŋ adi inyi 'tel 'tel ihuo elle inuok allomo iyye ta afaŋan honyi.”

Itisiak Yesu Farisei buo fe Itisiak Ettiyanak Ifahita

³⁷ Ninyia latuhok Yesu ekiana, iloŋoro nyia obo olo Farisei inyi iŋiria; ette inyi ijiŋara, ette itoŋo iŋiyere.

³⁸ Illilliha nyia olo Farisei alia ninyia igonyu inyi jio, olo Yesu ŋiyo buo obeŋ ofinia.

³⁹ Tania, ette Lamonye jiaran jihonyi, “Itai Farisei, iwasata itai oruoŋ miolo iko ono oloŋet buo atajia hatai ifuti iko arrohoji buo eŋaru;

⁴⁰ Obeŋi hossi! Obiaŋara nyia Hollum ollo oyyeu 'to oruoŋ, oyyeu buo fe atua?

⁴¹ Ati isiatta enyati hutto miolohien iko hutto loŋeti hatai jio alociaŋak, buo erre 'daŋ ette adi ilibori jihatai.

⁴² “Ati orroho adi bebe jihatai Farisei! Nyio, isiatta itai Hollum aŋati etattomoni ono etamidihita jasio hatai ihuo; asamar, abasala iko hunnomuk ihuo hunia; buo ibasana abisan ŋocio hiram iko abuaran tajia jio Hollum. Ihaniete erre hunia buo hèbasana erre hunnomuk.

⁴³ “Orroho adi bebe jihatai Farisei! Nyio iwahata itai itoŋo isegeri lettaha hutto tua hasik Imojiti buo fe iwahata jio oŋida aati ifuanyai itai ta abaŋi itua suk.

⁴⁴ Orroho adi bebe jihatai! Nyio, irata itai ihuo elumio hunno obeŋi 'to oleye. Adahai aati totto hide hosi buo obeŋi omijani.”

⁴⁵ Attati lobo olo ettiyanak ifahita jiaran jihonyi, “Hettiyanani, elle ikiana iyye ihuo nyia, imorio buo fe iyye hohoi!”

⁴⁶ Buo Yesu ette itarraŋ inyi ojio “Orroho adi buo fe bebe jihatai ettiyanak ifahita! Nyio, itakafiete itai aati erre hunno oddiŋi 'to te ewwahatio, buo ibiaŋata iluahata isi ikafari ara duadi bu ta afialai ijiai.

⁴⁷ Orroho adi bebe jihatai! Nyio ihuhumana itai elumio hekianak Hollum hinyia ottohori hohonyiok hatai.

⁴⁸ Iruhonia itai ehanita hohonyiok hatai buo fe iruhoto ehanita hua; nyio, ottohori nyia isi ekianak Hollum buo itai ittata iduhonia elumio hosi.

⁴⁹ Tania, ojiori Ofioro Hollum jio, ‘Efak adi ni jihosi ekianak hoŋ iko lefahat hoŋ; buo ottohori adi isi lomuk buo ittigemie lomuk.’

⁵⁰ Onyurani adi aati hulo ahana ettigemio, nyio ta naye hekianak Hollum 'daŋ hinyia ottohori many tetteri fau.

⁵¹ Itterio ta attohoro ono Abele many jio ono Sakariya, linyia abahini ihiji ono etitiek ehumi iko Amaji Elibo. Aafe, eramak ni itai, onyurani adi aati hulo ahana ettigemio tesi 'daŋ!

⁵² “Orroho adi bebe jihatai ettiyanak efahita! Nyio, iduhuna itai addi eŋanyit ofioro; buo itai ta ahuattek hatai ibiaŋata ijiŋana, buo fe itihoto hulla awahi 'to ijiŋana diya!”

⁵³ Ninyia alo Yesu teya, ette ettiyanak ifahita iko Farisei ikiana onno orroho jihonyi, ette buo fe ififiyo inyi erre arriai,

⁵⁴ nyio ottifiai nyia isi omuk erre italohuniere inyi.