Luka 10 - Ecorit Aŋejuk 2003

Ifak Yesu Aati Atomuana Hattarik Harrihai

¹ Ihalu erre huna onyimu nyia Lamonye omuk aati hama, atomuana hattarik harrihai ette ifahina isi arrihai arrihai to osiere honyi liborejin gala 'daŋ iko imasik 'daŋ hunno ojiari inyi alari.

² Ette inyi jiaran jihosi, “Aŋida amana, ati omutari egiamak. Omojoti jio Lamonye mana oŋida ifahu adioŋok arriai idioŋori imana honyi.

³ Ifuatta! Efak ni itai ihuo akioro ihiji lewwo.

⁴ Hèyatti olobooni kuyya edee hemimojok iko amuha buo hèwotiati ihiji ikoi ifonyari obo atulo tekoi.

⁵ Elle ijiŋana itai jio obo ahaŋ, ijiatta do, ‘Ijiara nelik taji hatawana jio ahaŋ ana!’

⁶ Alla awon atulo diya alla awak nelik taji, ijiara efuanya hatai ono nelik taji odulo jihonyi; buo labeŋ, ocohuno adi efuanya hatai ono nelik taji jihatai.

⁷ Itoŋoti jio ahaŋ nyia, oŋiyete buo fe imatati erre hunne isiori isi jihatai, nyio, osiru aduma jio egiamak te egiama hosi. Hèluttati ahaŋitek ababo.

⁸ Kuyya elle ijiŋana itai jio obo abore gala buo aati honyi arraŋuni itai, oŋiyete ariŋ enne isiori isi jihatai.

⁹ Itaŋidarata aŋuak hosi, iramana aati abore gala nyia jio, attu Olobie ono Hollum liger hosi.

¹⁰ Ati elle ijiŋana itai jio obo abore gala buo aati honyi obeŋi arraŋuni itai, ifuatta ikianati ilofirihi hosi jio,

¹¹ ‘Ara duadi bu attuduha abore gala hatai anna adafa 'to ihejek hohoi, epipuak hohoi ajihatai. Ati omijana jio attu Olobie ono Hollum liger hatai!’

¹² Eramak ni itai jio, Iholoŋ ono Aŋocio Hiram, obolo adi amehino Hollum jio Sodom agalik amehino honyi jio abore gala ania.

Aborejin Gala hunno Obeŋ 'to Iruhi

¹³ “Orroho adi bebe jihoi Korasin! Orroho adi buo fe bebe jihoye Besseyida! Nyio, hara nyia ihanie eduariti hunyia ihanie jihatai iborejin gala Taya iko Sidon, ŋanyia isi idehini eyyata hosi berien, ette iyyafana asuwali ette ipur ahuattek hosi te enuara itahutaniere jio eha isi eyyata hosi.

¹⁴ Ati Iholoŋ ono Aŋocio Hiram, obolo adi amehino Hollum jio Taya iko Sidon agalik amehino honyi jihatai.

¹⁵ Buo jihoi Kapernaum! Iwak iyye ikaf ahuan hoi many lidou? Ati ibirori adi iyye many imaji hayaak!”

¹⁶ Attati Yesu jiaran jio lejifak honyi, “Lia, elle itayirio 'to jihatai, itayirio buo fe inyi jihoŋ; buo lia, elle iha 'to itai, iha buo fe inyi ani; buo lia, elle iha 'to ani iha buo fe inyi lia, elle ifahu 'to ani.”

Acohuno ono Aati Hula Atomuana Hattarik Harrihai

¹⁷ Attati aati hula atomuana hattarik harrihai icohuno ta amuno onno obolo bebe ette jiaran, “Lamonye, ara duadi bu aminiaŋa oniŋie nyia isi elle ekiana hohoi jihosi ta afure hoi!”

¹⁸ Itarraŋ nyia Yesu isi jiojio, “Eŋonyu ni Sittan okuahuno tedou ihuo ahilai.

¹⁹ Itayiriete! Esiarak ni jihatai aduaran, irriyere amunuok iko atone buo fe oŋida igalihina egoliti 'daŋ huno amiottononi. Obeŋ adi obo ariŋ iriafu itai.

²⁰ Hèmunoti jio oniŋie aminiaŋa itai; ati omunoti jio igioronie afureta hatai idou.”

Omuno Yesu

²¹ Ta asaa nyia, ifut nyia amuno jio Yesu to Loholio Olibo, ette inyi jiaran, “Monye, Lamonye olo edou iko afau, ajio ni jihoi humo, te edimana hoi erre huna jio alofiorojok iko jio aati hulle iheni 'to, buo iyye ette itahutana isi jio aati asai. Aafe, Monye, ara inyi ihuo iwak nyia iyye.

²² “Isiarak Monyoŋ erre 'daŋ jihoŋ. Obeŋ obo omijak ŋai Lonyi, arari fe Monye hama, buo fe obo obeŋ omijak ŋai Monye arari fe Lonyi hama iko hia hullo onyimu Lonyi itahutaniere ŋai Monye.”

²³ Attati inyi iyito jio lejifak honyi ninyia awoni isi isi hama, ette jiaran, “Osiru amiji itai igonyuniere erre huna!

²⁴ Eramak ni itai jio, oluaji nyia ekianak Hollum iko oobuok hinyia awahi 'to igonyuna erre hunne igonyuna itai, ati obeŋi isi iŋonyuni. Awahi nyia buo fe isi itaniŋuna erre hunne itayiruna itai, ati obeŋi nyia isi itayiruni.”

Etarriamai ono A Samaritanani Oloyijio

²⁵ Attati ettiyanani ifahita ittuna. Awak nyia inyi italohuna Yesu, ette jiaran, “Hettiyanani, anyio adi enne ehan ni inyuraniere esu 'tulaŋ?”

²⁶ Itarraŋ nyia Yesu inyi ojio, “Anyio enne igioroni ifahita Mose? Ihenio iyye isi aŋai?”

²⁷ Buo atulo alia ette itarraŋ ojio, “ ‘Itabuara ataji hoi 'daŋ jio Hollum Lamonye hoi, to oloyiri hoi 'daŋ, ta agolon hoi 'daŋ, iko te egigilita hoi 'daŋ’; buo fe ‘Itabuara ataji hoi jio onyihari hoi ihuo onno obuarari inyi ahuan hoi.’ ”

²⁸ Ojio Yesu jihonyi, “Ittenu iyye, ihanie ihuo nyia, isu adi iyye.”

²⁹ Ati awak nyia inyi itahutana abisan honyi, ette inyi jiaran jio Yesu “Ŋai onyihari hoŋ?”

³⁰ Itarraŋ Yesu ojio, “Orubo nyia obo atulo to Yerusalem many Yeriko, ette omuk ahahalak irrauna inyi, ette ihororo erre honyi 'daŋ, ette ibak inyi, ette idiaharu inyi mugur mugur.

³¹ Jio asaa nyia ottu nyia obo ehumani te ekoi ania; ninyia igonyu inyi atulo alia, ette inyi ilor aŋati hikoi tole.

³² Ihuo nyia buo fe ottu nyia obo atulo to woyo ba Lefi tolia, ette leten imijio atulo lia, ette buo fe inyi ilor te ebotie ŋati.

³³ Attati obo a Samaritanani linyia olo 'to tolia ittuna many jio atulo lia, ninyia igonyu inyi, ette ataji honyi imehino.

³⁴ Ette inyi leten many jihonyi, ette iyalana eyali buo fe ijuhok afino itoŋos honyi, ette illulluronia atoŋos honyi, ette ikafana inyi ihide sigiria honyi, ette iyaru inyi jio obo aaji eyirit, ette imijio inyi onno oyyu.

³⁵ Jio ebotie holoŋ isiarak nyia inyi arobiyaa arrihai jio lamonye haji, ette jiaran jihonyi, ‘Omijie inyi onno oyyu, alla awoni omuk erre hunne inyiaŋak iyye inyi, attu adi ni iduma iyye alla acohuno ni tolo.’ ”

³⁶ Attati Yesu ifiyo Ettiyanani ifahita lia jiojio, “Alali jio hula hunihoi elle igigilo iyye jio ara olonyihari jio atulo alla arrauni ahahalak alia?”

³⁷ Buo inyi ette itarraŋ jio “Lia, ollo omehino 'to jihonyi.” Attati Yesu jiaran, jihonyi, “Ilo ihanie ihuo nyia.”

Aleten Yesu Imijuno Marta iko Maria

³⁸ Ninyia ofuarik Yesu iko lejifak honyi te ekoi, ojiŋak nyia inyi jio obo amiji, buo obo aŋotte afure honyi Marta ette ifuotuna inyi ihaŋ honyi.

³⁹ Owon nyia inyi iko haniye anna anya Maria ninyia itoŋo iger hejek Lamonye buo itayirio ettiyenio honyi.

⁴⁰ Ati obolorok nyia egiama Marta ette inyi ittuna jio Yesu ette jiaran, “Lamonye, ibeŋ ti iyye igigilo jio idehi haniyoŋ jihoŋ egiama ana 'daŋ? Iramak inyi hétettu ani iluak!”

⁴¹ Ati itarraŋ nyia Lamonye jihonyi ojio, “Marta, Marta! Ihawwa iyye buo fe ittigemio ahuan hoi te erre arriai,

⁴² ati ariŋ abotie anna awahi. Anyimu Maria ariŋ onno oyyu 'to, obeŋi adi iyari addi jihonyi.”