Luka 1 - Ecorit Aŋejuk 2003

¹ Jio Tofilo: Ihuo imijak iyye, igioroni nyia aati arriai eyabita hirre hunyia ihanie ihiji hohoi.

² Igioroni nyia isi erre hunia ihuo etaniŋu nyia hohoi jio hia, hunyia igonyuni 'to tetteri buo fe ittiyenie isi.

³ Oyyu buo fe, elle egiorok ni erre huna 'daŋ ababo jihoi, lettok Tofilo, nyio, attifotio nyia ni isi many tetteri.

⁴ Egiorok ni jihoi oŋida iyye imijak jio erre hunyia ittiyenie jihoi arai ahode.

Iramani Esiuna Yoane Etifuotoni Batisimo

⁵ To oŋitek hunyia arari Erode Ahobu olo Yudea, owon nyia obo ehumani afure honyi Sakariya, te ehumari ba Abija. Owoni nyia inyi iko Elisabeta, te ehumari ba Arone.

⁶ Olibori nyia isi buo fe amanyai onno obis te efahita huno Lamonye.

⁷ Ati obeŋi nyia isi isiuni hito nyio, iholofi nyia Elisabeta buo fe isi 'daŋ imaruahi.

⁸ To obo oloŋ ihanio nyia Sakariya egiama honyi ono ehumani ihosiere Hollum, ninyia imok oloŋ ono ehuma jio ehumak hutto woyo Abija.

⁹ Teya, ihuo ojiori emanyiti huno ehumak, onyimuni nyia inyi te ehutuŋai oŋida ojiŋak itua Haji emojit enne ittokon ono Lamonye itafuruhiniere nottogoŋ ihide ititiek.

¹⁰ To ninyia osuahiere inyi ottogoŋ omojo nyia eluluŋ waati illet.

¹¹ Attati ajilo olo Lamonye ileyehino jihonyi ollo owotia oŋiatai te etitiek onno osuahinierek nottogoŋ.

¹² Ninyia igonyu Sakariya ajilo lia, ette abaŋi inef inyi bebe ette inyi ikikiro.

¹³ Attati ajilo jiaran jihonyi, “Hèbaŋ Sakariya! Nyio, itaniŋu Hollum amojo hoi. Isihi adi ŋoruoi hoi, Elisabeta, eto 'le jihoi. Ittu adi iyye ifurana inyi Yoane.

¹⁴ Obolo adi etahabuyo iko namuno jihoi iko jio aati arriai elle isiuni inyi,

¹⁵ Ara adi inyi elettok to hosiere Lamonye. Obeŋ adi inyi amata afino kuyya obo abalu. Many luŋa hèsiuni inyi ifut adi inyi iko Loholio Olibo.

¹⁶ Ottu adi inyi inyiahuno aati Israele arriai jio Lamonye, Hollum hosi.

¹⁷ Adaha adi inyi to osiere Lamonye ta aduaran iko ta agolon ihuo Elija ekianani Hollum. Iloit adi inyi atajia monye jio aduri hosi, buo fe iloit lamiosok iruhori egigilita waati abisak. Ihuhumak adi inyi aati ta attuna Lamonye.”

¹⁸ Buo Sakariya ette ifiyo ajilo lia jiojio, “Aŋai 'tadi amijak ni jio ara eram ana ahode? Nyio, emaruak ni buo fe ŋoruoi hoŋ imaruak.”

¹⁹ Itarraŋ nyia ajilo inyi jiojio, “Ani Gabriele. Awotia ni ihosiere Hollum elle ifahu 'to nani iramaniere iyye asayyo ayijok huna.

²⁰ Ihuania, ibeŋ iyye iruk eram hoŋ, ottuho adi etuk hoi, ibeŋ adi iyye ikiana many ofuonnierek erre hunia irahan ahode alia attuba asaa hosi.”

²¹ Itilai nyia aati Sakariya, many ilafuhorik jio nyio illiŋia inyi fur itua Haji emojit enne ittokon.

²² Ninyia attu inyi allet, ittallik nyia inyi ikiana jihosi; attati isi imijana jio, oleyehino obo ariŋ jihonyi totua Haji emojit enne ittokon. Ittallik nyia inyi ikiana jihosi, ania, ette inyi ihuhuta jihosi ihuhuta ta ahas.

²³ Ninyia atuho asaa ono egiama honyi to tua Haji emojit enne ittokon, acaharu nyia inyi miji hosi.

²⁴ Ihalu omuk oŋitek oyedu nyia ŋoruoi honyi, Elisabeta, ette itoŋo itua haŋ ayafajin miyet.

²⁵ Ette Elisabeta jiaran, “Eii! Eluak ani Lamonye, iduha inyi nariri hoŋ tehiji waati addi.”

Iramani Esiuna Yesu

²⁶ Jio ayafa etilleji onno oyedurori Elisabeta, ifak nyia Hollum ajilo Gabriele ibore gala Nasaret atta fau Galilea.

²⁷ Iyaru nyia inyi asayyo jio obo oduoti, afure honyi Maria, onno hobeŋ ottironio iko obo alle. Ocoroni nyia inyi jio obo atulo to woyo ba Hobu Dafide afure honyi Yosefu.

²⁸ Ottu nyia ajilo jihonyi ette ifony inyi ojio, “Ogolo Maria! Owen Lamonye iko iyye buo fe omuno iyye bebe!”

²⁹ Ati ihawwa nyia Maria te ekiana ono ajilo, ette ifiyo ahuan honyi jio, nanyio hirre huna.

³⁰ Buo ajilo ette jiaran jihonyi, “Maria, hèbaŋ; nyio, omuno Hollum iyye bebe.

³¹ Inef adi iyye ohe, itte ittuna isiuna eto 'le. Ittu adi iyye ifurana inyi Yesu.

³² Ara adi inyi elettok, iloŋoi, adi inyi Lonyi Hollum elle Illomohi 'to 'daŋ. Isio adi Hollum Lamonye jihonyi elohobu hohonyi honyi Dafide.

³³ Tania, ottu adi inyi ilohobu ihaŋ Yakobo 'tulaŋ; obeŋ adi nolobie honyi owon iko esidi.”

³⁴ Buo Maria ette iramana ajilo lia jiojio, “Habeŋ ni attironio iko obo alle, ofuonni 'tadi erre hunia aŋai?”

³⁵ Itarraŋ nyia ajilo inyi jiojio, “Ottu adi Loholio Olibo jihoye, ottu adi aduaran Hollum imuluhana iyye. Tania, iloŋoi adi leto ololibo alia, Lonyi Hollum.

³⁶ Iko ogigilu Elisabeta, atta haŋ hatai, ojiori nyia iholofi. Ati ihuania awon iko ohe ono ayafajin ille, duadi bu imaruak inyi bebe.

³⁷ Nyio, obeŋ obo ariŋ anna agalik 'to Hollum.”

³⁸ Buo Maria ette jiaran, “Ani egiamani ono Lamonye. Ijiara hétehaniehe jihoŋ ihuo ijio iyye.” Buo ajilo lia ette idiaharu inyi.

Aleten Maria Imijuno Elisabeta

³⁹ To oŋitek hua odioto nyia Maria ette iruharu jio obo abore gala onno owon itua doŋiok hutta fau Yudea.

⁴⁰ Ette leten ihaŋ Sakariya ette ifony Elisabeta.

⁴¹ Ninyia itaniŋu Elisabeta efuanya Maria, ette leto otto hohe honyi iddidiaŋa. Buo Loholio Olibo ette ifut jihonyi.

⁴² Attati inyi ikiana woŋ woŋ jiojio, “Tehiji ŋoruo 'daŋ, obolo namuno jihoi iko jio leto elle ittu iyye isiuna!

⁴³ Nanyio iduoŋ eram ana jihoŋ ihua ana jio, oŋida honye Lamonye hoŋ ottu imijaru nani?

⁴⁴ Oduo etaniŋu ni efuanya hoi, ette leto otto hohe hoŋ, iddidiaŋa ta namuno.

⁴⁵ Hatawana namuno jihoi enne iruk 'to jio, ofuonni adi erre hunyia ocorok Lamonye jihoi irahan ahode!”

Itahabuyo Maria Hollum

⁴⁶ Attati Maria jiaran, “Itahabuyo ataji hoŋ Lamonye.

⁴⁷ Itamuno Hollum oloyiri hoŋ, nyio, inyi etalahani hoŋ,

⁴⁸ nyio igonyu inyi afiahaji hoŋ egiamani honyi! Tania, iloŋoi adi aati 'daŋ ani ahamunoni.

⁴⁹ Nyio, ihan Hollum alla agalik 'to 'daŋ erre hunno obolori 'to bebe jihoŋ olibo afure honyi.

⁵⁰ Owon amehino honyi jio aati hulla abaŋi 'to inyi, iko jio amisik huno lonyirok lonyiok hosi.

⁵¹ Itahutak inyi agolon honyi ta aani, ette ikikur etadarak iko egigilita hosi 'daŋ.

⁵² Itafiaha inyi elohobu hobuok hulle ittaha 'to buo ette ikaf afiahajak ahide.

⁵³ Isio inyi esamiti jio alociaŋak, buo ette ifuhara asamak ta ahas asai.

⁵⁴ Ogottiere inyi buo fe obeŋ itapuak erre hunyia ikiana inyi jio hohonyiok hohoi, buo ette italuak egiamani honyi Israele.

⁵⁵ Ogottiere inyi amehino honyi jio Abramo iko jio lonyirok honyi 'daŋ 'tulaŋ!”

⁵⁶ Itoŋok nyia Maria ayafajin ihuo hunihoi iko Elisabeta attati icaharu miji hosi.

Esiuna Ono Yoane Etifuotoni Batisimo

⁵⁷ Ninyia attubai oŋitek huno ayeduri Elisabeta, ohonya nyia nohe honyi, ette inyi isiuna leto 'le.

⁵⁸ Attati aati hutta haŋ hosi iko hutto onyihari itaniŋuna jio, itahutak Lamonye amehino honyi jio Elisabeta, ette isi 'daŋ muno ikonyi.

⁵⁹ Ninyia atuk olodole lia esabit abotie, ofuonni nyia onyihari iko aati hutta haŋ, ette ittubanio arabotie ikosi ibosiere leto. Awahi nyia isi ifurana inyi Sakariya, afure monyonyi.

⁶⁰ Ati iramak nyia Elisabeta isi jio, “Obeŋ! Afure honyi luŋa Yoane.”

⁶¹ Buo isi ette jiaran jihonyi, “Obeŋ obo atta haŋ hatai anya ihuo nyia.”

⁶² Attati isi ihuhuta jio Sakariya ta ahas ifiyere anani fure anna awak inyi ifurani jio leto alia.

⁶³ Ette Sakariya imojuna obo ariŋ enne igioronierek, ette igioronia jio, “Afure, honyi Yoane.” Tania, illillihai nyia isi 'daŋ bebe.

⁶⁴ Teya teya, inyiak Sakariya ikiana ette itterio etahabuyo Hollum.

⁶⁵ Inef nyia abaŋi aati onyihari hosi 'daŋ, buo asayyo huno erre huna ette isarrahina atua doŋiok 'daŋ hutta fau Yudea.

⁶⁶ Igigiloi nyia aati 'daŋ hunyia itaniŋuni 'to asayyo huna te eram hosi, ette buo fe ifiyo jiojio, “Ottu 'tadi leto alia irahan anyio?” Nyio, owon nyia aduaran ono Lamonye jihonyi.

Ikiana Sakariya Eram Hollum

⁶⁷ Ifut nyia Loholio Olibo jio Sakariya Monye Yoane, ette inyi ikiana asayyo Hollum jiojio:

⁶⁸ “Hétahabuyete Lamonye, Hollum olo Israele! Lattu inyi italuahiere aati honyi buo fe italahuniere isi.

⁶⁹ Isiarak inyi hohoi Etalahani ollo ogol 'to bebe ollo odetuno 'to to woyo Dafide egiamani honyi.

⁷⁰ Ihuo ikiana nyia inyi berien te etuhe hekianak honyi aliborok jio,

⁷¹ etaluahu adi inyi hohoi to miorok hohoi iko ta has waati hullo oliwarik 'to hohoi.

⁷² Ojio nyia amehino adi inyi jio hohonyiok hohoi buo fe agottiere ecorit honyi onno odua 'to.

⁷³ Te ettuŋo ninyia ocorok Hollum jio hohonyi hohoi Abramo

⁷⁴ jio, etaluahu adi inyi hohoi ta has miorok, buo fe oŋida hohoi ebeŋ ebaŋ elle egiama hohoi jihonyi.

⁷⁵ Oŋida bati hohoi elibo buo fe ebis to hosiere honyi many isidi manya hohoi.

⁷⁶ “Buo iyye lonyi hoŋ, iloŋoi adi iyye ekianani Hollum elle Illomohi 'to 'daŋ. Idaha adi iyye to nosiere Lamonye ihuhumaniere ekoi jihonyi.

⁷⁷ Iramak adi buo fe iyye aati honyi jio italahuni adi isi ta ahohina ono eyyata hosi.

⁷⁸ Nyio, ta amehino iko ta abijon taji Hollum jihohoi, iyaŋuno adi inyi jihohoi etalahuna onno ottu 'to tedou faa ihuo ataŋatio motie;

⁷⁹ isiaraniere afaŋan jio hia hullo owoni 'to idumele iko ibali ono naye; buo fe itahutaniere hohoi ekoi ono namanya enne iyaŋuno 'to nelik tajia.”

⁸⁰ Ninyia abolo leto alia, ette buo fe nahuan iko Oloholio honyi 'daŋ igolon. Amanya nyia inyi itua hidiofo many jio noloŋ ninyia oleyere inyi ihiji waati Israele.